បន្ទាយមានជ័យ ៖ ក្នុងពិធីសម្ពោធពិព័រណ៍ពាណិជ្ជកម្មផលិតផលខ្មែរ ក្នុងឱកាសយុទ្ធនាការទិញផលិតផលខ្មែរ រដូវកាលទី៣ ដែលបានរៀបចំនៅបរិវេណខាងមុខមន្ទីរពាណិជ្ជកម្មខេត្ត ក្រុងសិរីសោភ័ណ ខេត្តបន្ទាយមានជ័យដែលមានមន្ត្រី ពាណិជ្ជករ អាជីវករ ពលរដ្ឋនិងមហាជនចូលរួមរាប់រាយនាក់ លោក ប៉ាន ស៊ូរស័ក្ត រដ្ឋមន្ត្រីពាណិជ្ជកម្មបានមានប្រសាសន៍ថា បើចង់ឲ្យផលិតផលជាតិរស់ សូមកុំឆ្ងាញ់តែ រសជាតិផលិតផលបរទេសពេក លោកបានមានប្រសាសន៍នៅល្ងាច ថ្ងៃទី៧ ខែមិថុនា ឆ្នាំ២០១៨។
លោកឈួន ដារ៉ា អនុរដ្ឋលេខាធិការក្រសួងពាណិជ្ជកម្មមានប្រសាសន៍ថា យុទ្ធនាការទិញផលិតផលខ្មែរ គឺជាផ្នែកមួយ នៃគោលនយោបាយអភិវឌ្ឍន៍ទីផ្សាររបស់ក្រសួងពាណិជ្ជកម្ម ដែលបានផ្តួចផ្តើមឡើងដោយក្រសួងពាណិជ្ជកម្មយុទ្ធនាការនេះ គឺជាសំឡេងជួង ដើម្បីដាស់ពញ្ញាក់ស្មារតីប្រជាជនខ្មែរ ឲ្យងាកមកគាំទ្រ និងប្រើប្រាស់ទំនិញផលិតក្នុងស្រុក ជំនួសទំនិញនាំចូលពីបរទេសនឹងបានរួម ចំណែកពង្រឹងចង្វាក់ផលិតកម្មក្នុងស្រុក និងបង្កើតឱកាសការងារកាន់តែច្រើនជូនប្រជាជន តាមរយៈការផ្ដល់នូវចំណេះដឹង និងបទពិសោធន៍ល្អៗ ដល់ផលិតករក្នុងប្រទេស សំដៅធ្វើយ៉ាងណាផលិតនូវទំនិញ ដែលមានគុណភាពខ្ពស់ មានអនាម័យ និងមានសុវត្ថិភាពគ្រប់គ្រាន់ អាចប្រកួតប្រជែងជាមួយទំនិញនាំចូលពីបរទេសបាន។
លោក ឈួន ដារ៉ា បានបញ្ជាក់ទៀតថា ២ឆ្នាំកន្លងមកនេះ ក្រសួងពាណិជ្ជកម្ម បានរៀបចំព្រឹត្តិការណ៍នេះ ពីររដូវកាលរួចមកហើយ គឺរដូវកាលទី១ នៅក្នុងរាជធានីខេត្តចំនួន ៤រដូវកាលទី២ នៅក្នុងរាជធានីខេត្តចំនួន ៥ និងសម្រាប់ យុទ្ធនាការទិញផលិតផលខ្មែរ រដូវកាលទី៣ ក្រសួងពាណិជ្ជកម្ម បានកំណត់យករាជធានីខេត្តចំនួន ៦រួមមាន ខេត្តកណ្តាល កំពង់ឆ្នាំង បន្ទាយមានជ័យ ព្រៃវែង កោះកុង និងរាជធានីភ្នំពេញ ជាកន្លែងរៀបចំពិព័រណ៍ពាណិជ្ជកម្ម។
លោក លី សារី អភិបាលរងខេត្តបន្ទាយមានជ័យមានប្រសាសន៍ថា ក្នុងនាមរដ្ឋបាលខេត្ត លោកយល់ឃើញថា តាមរយៈការជំរុញពង្រឹងចលនាភូមិ១ផលិតផលមួយ និងបំណងនៃការរៀបចំពិព័រណ៍នេះ មានសារៈសំខាន់ ហើយបានផ្លែផ្កាមួយចំនួនដូចជា ស្ទាបស្ទង់ពីសេចក្តីត្រូវការរបស់អតិថិជនក្នុងការប្រើប្រាស់ផលិតផលបង្ហាញពីស្នាដៃនៃការបង្កើតថ្មីនៃផលិតផលដែលខ្មែរយើងអាចធ្វើបាននិង ការទំនាក់ទំនងនិងដៃគូក្នុងវិស័យពាណិជ្ជកម្មរវាងវិស័យឯកជននិងរដ្ឋ។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មមានប្រសាសន៍ថា រាជរដ្ឋាភិបាលកម្ពុជា នៅក្រោមការដឹកនាំរបស់ សម្តេចតេជោ ហ៊ុន សែន នាយករដ្ឋមន្ត្រី បានចាត់ទុកវិស័យឯកជន គឺជាក្បាលម៉ាស៊ីននៃកំណើនសេដ្ឋកិច្ចជាតិក្នុងន័យនេះ ក្រសួងពាណិជ្ជកម្ម ក៏ជាផ្នែកមួយដែលបានដាក់ចេញនូវគោលនយោបាយ និងកម្មវិធីកំណែទម្រង់ស៊ីជម្រៅសំខាន់ៗ ដើម្បីគាំទ្រ និងធានា ដល់ការលូតលាស់នៃវិស័យឯកជន។
លោកប៉ាន សូរស័ក្តិសូមអបអរ ចំពោះអគ្គនាយកដ្ឋានជំរុញពាណិជ្ជកម្ម ព្រមទាំងអាជ្ញាធរដែនដី និងភាគីពាក់ព័ន្ធ ដែលបានសហការរៀបចំ ពិព័រណ៍ពាណិជ្ជកម្មផលិតផលខ្មែរ ក្នុងឱកាសយុទ្ធនាការទិញផលិតផលខ្មែររដូវកាលទី៣ នេះឡើង ដើម្បី ជំរុញនិងលើកស្ទួយផលិតផលខ្មែរ នៅលើទីផ្សារក្នុងប្រទេស និងអន្តរជាតិ។
លោកមានជំនឿថា ប្រជាពលរដ្ឋខ្មែរនឹងងាកមកគាំទ្រផលិតផលជាតិ កាន់តែ ច្រើនឡើងៗ ប្រសិនបើជាផលិតករ និងសហគ្រិនយើងអាចធ្វើបាន ព្រោះនេះគឺជាកត្តាសត្យានុម័ត នៃការប្រកួត ប្រជែងទីផ្សារសេរី ដែលយើងទាំងអស់គ្នាត្រូវតែទទួលស្គាល់។ ដូច្នេះ សូមអំពាវនាវឲ្យពាណិជ្ជករ អាជីវករ ត្រូវបន្តយកចិត្តទុកដាក់ថែមទៀតលើការពង្រឹងគុណភាពផលិតផល និងសេវាកម្មរបស់ខ្លួន ហើយសូមសំណូមពរដល់ស្ថាប័នពាក់ព័ន្ធ និងប្រជាជនកម្ពុជាទាំងឡាយ សូមបន្តគាំទ្រផលិតផលខ្មែរថែមទៀត ព្រោះបើចង់ឲ្យផលិតផលជាតិរស់ សូមកុំឆ្ងាញ់តែ រសជាតិផលិតផលបរទេស៕
Source: Kampuchea Thmey Daily
0 Comments