តាកែវ ៖ ជនសង្ស័យករណីលួចម៉ូតូម្នាក់ ត្រូវបានប៉ូលិសស្រុកត្រាំកក់តាមប្រមាញ់រហូតឃាត់ខ្លួនបានយកមកកសាងសំណុំរឿងបញ្ជូនឡើងតុលាការតាមពាក្យបណ្តឹងជនរងគ្រោះ។
ហេតុការណ៍តាមចាប់ខ្លួនជនសង្ស័យលួចម៉ូតូតាមពាក្យបណ្តឹងនេះ ធ្វើឡើងនៅល្ងាចថ្ងៃទី១៨ ខែមិថុនា ឆ្នាំ២០១៨ វេលាម៉ោង១៧និង២០នាទី ត្រង់ចំណុចខាងក្រោយវត្តអង្គមេន្ត្រី ស្ថិតក្នុងឃុំរំចង់ ស្រុកសំរោង ខេត្តតាកែវ។ ប៉ូលិសស្រុកត្រាំកក់បានឲ្យដឹងថា ជនរងគ្រោះបានមកដាក់ពាក្យបណ្តឹងនៅអធិការដ្ឋាននគរបាលស្រុក ក្រោយកើតហេតុបាត់ម៉ូតូកាលពីថ្ងៃទី១៧ ខែមិថុនា ឆ្នាំ២០១៨ វេលាម៉ោង ២០និង៣០នាទីយប់នៅចំណុចផ្ទះជនរងគ្រោះ ដែលមានឈ្មោះស៊ឹម ម៉ុន ភេទស្រី អាយុ៣៧ឆ្នាំ ស្ថិតនៅភូមិព្រៃរំដេង ឃុំអង្គតាសោម ស្រុកត្រាំកក់ ខេត្តតាកែវ។ ក្រោយទទួលបានពាក្យបណ្តឹងសមត្ថកិច្ចបានស្រាវជ្រាវរហូតចាប់ខ្លួនជនសង្ស័យដែលមានឈ្មោះ ខៃ សំណាង ហៅ អាកាង ភេទប្រុស អាយុ ២៨ឆ្នាំ រស់នៅសង្កាត់រកាក្នុង ក្រុងដូនកែវ ខេត្ត តាកែវ ជាមួយនឹងវត្ថុតាងម៉ូតូម៉ាកសេ១២៥ ស៊េរីឆ្នាំ២០១០ ពណ៌ខ្មៅ ពាក់ស្លាកលេខតាកែវ 1D-5224។
បច្ចុប្បន្នជនសង្ស័យក្នុងករណីលួចម៉ូតូខាងលើនេះ ត្រូវបានកម្លាំងជំនាញអធិការនគរបាលស្រុកត្រាំកក់កសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមនីតិវិធី ចំណែកម៉ូតូបានប្រគល់ជូនជនរងគ្រោះវិញហើយ ក្រោយពីធ្វើកំណត់ហេតុនិងពិនិត្យឯកសារពាក់ព័ន្ធ៕
Source: Kampuchea Thmey Daily
0 Comments