ភ្នំពេញ ៖ អ្វីដែលជាក្តីសុបិនរបស់ប្រជាពលរដ្ឋនៅប្រឡាយស្ទឹងមានជ័យ ខណ្ឌមានជ័យបានក្លាយជាការពិតហើយ ក្រោមការយកចិត្តទុកដាក់របស់សម្តេចតេជោហ៊ុន សែន ដោយបងប្អូនទទួលបានដីកម្មសិទ្ធិស្របច្បាប់ពីរដ្ឋបាលរាជធានីភ្នំពេញ ដែលអាចអោយសាងសង់ផ្ទះស្នាក់នៅជាមួយនឹងផ្លូវ ភ្លើងនិងប្រព័ន្ធទឹកស្អាតផងដែរ។
ជាជំហានទី១នេះ ប្រជាពលរដ្ឋចំនួន១៥២គ្រួសារ ក្នុងចំណោមប្រជាពលរដ្ឋចំនួន៥៦២គ្រួសាររស់នៅអមសងខាងប្រឡាយស្ទឹងមានជ័យ បានឈានដល់ការចាប់ឆ្នោតទទួលយកដីកម្មសិទ្ធិហើយ ក្រោយពីអាជ្ញាធររាជធានីភ្នំពេញបានចាក់ដីបំពេញរួចក្នុងជំហានទី១នេះ។
ពិធីចាប់ឆ្នោតនេះបានធ្វើឡើងកាលពីព្រឹកថ្ងៃទី០៦ មិថុនានេះ ក្រោមអធិបតីភាពលោកឃួង ស្រេង អភិបាលរាជធានីភ្នំពេញ នៅក្នុងបរិវេណវត្តស្ទឹងមានជ័យ ខណ្ឌមានជ័យ។
លោកឃួង ស្រេងបានមានប្រទេសថា ក្រោមការយកចិត្តទុកដាក់របស់សម្តេចតេជោហ៊ុន សែន អ្វីដែលជាក្តីសុបិនរបស់ប្រជាពលរដ្ឋនៅប្រឡាយស្ទឹងមានជ័យ ខណ្ឌមានជ័យបានក្លាយជាការពិតហើយ ដោយក្នុងជំហានទី១នេះ ប្រជាពលរដ្ឋចំនួន១៥២គ្រួសារ ទទួលបានដីទំហំ៤គុណនឹង៦ម៉ែត្រជាកម្មសិទ្ធិស្របច្បាប់នៅនឹងកន្លែងតែម្តង។ លោកសូមអោយប្រជាពលរដ្ឋ ពេលបានកម្មសិទ្ធិស្របច្បាប់ហើយ នៅពេលសាងសង់ផ្ទះ កុំអោយទាស់ទែងគ្នា អាចដាក់ជញ្ជាំងជាប់ព្រំគ្នានិងអធ្យាស្រ័យអោយគ្នាទៅវិញទៅមក។
លោកឃួង ស្រេងបានបន្តថា សម្តេចតេជោហ៊ុន សែន ក្នុងនាមជាម៉ែ ជាឪប្រជាពលរដ្ឋជាង១៥លាននាក់បានយកចិត្តទុកដាក់ជាមួយប្រជាពលរដ្ឋខ្លាំងណាស់ ដោយបានកែប្រែបងប្អូនប្រជាពលរដ្ឋខ្លះពីកសិករទៅជាកម្មករបម្រើការងារនៅតាមរោងចក្រ។ ក្រៅពីនេះនៅបានប្រទានកម្មនូវអ្វីជាច្រើនទៀតជូនប្រជាពលរដ្ឋ។ ប្រជាពលរដ្ឋដែលរស់នៅតំបន់មិនរៀបរយនៅក្នុងរាជធានីភ្នំពេញក៏ត្រូវបានជួយជ្រោមជ្រែង និងរកតំបន់ដែលអាចរស់នៅបានដោយស្របច្បាប់ និងតំបន់ខ្លះប្រែក្លាយដោយអោយអភិវឌ្ឍនៅនឹងកន្លែងតែម្តង។ ជាក់ស្តែងនៅប្រឡាយស្ទឹងមានជ័យនេះ គឺប្រជាពលរដ្ឋត្រូវបានសម្តេចប្រគល់ស្របច្បាប់នៅហ្នឹងកន្លែងតែម្តង។
លោកឃួង ស្រេង ក៏បានថ្លែងការដឹងគុណផងដែរចំពោះបងប្អូនប្រជាពលរដ្ឋដែលបានចូលរួមសហការជាមួយអាជ្ញាធរ និងរាជរដ្ឋាភិបាលដើម្បីធ្វើអោយរាជធានីភ្នំពេញមានសោភណភាព។
លោកបន្តថា យើងមានប្រយោជន៍ដូចគ្នា ពោលគឺប្រជាពលរដ្ឋបានដី ជាប្លង់កម្មសិទ្ធិស្របច្បាប់នៅសងខាងប្រឡាយស្ទឹងមានជ័យ។ ចំណែកអាជ្ញាធររាជធានីភ្នំពេញវិញទទួលបានប្រឡាយដើម្បីរំដោះទឹកកុំអោយលិចលង់រាជធានីភ្នំពេញ ហើយប្រឡាយនេះមានសារៈសំខាន់ណាស់ក្នុងការរំដោះទឹក ពោលគឺអាចជួយរំដោះទឹកដល់តំបន់សាលាក្តីខ្មែរក្រហមថែមទៀតផង។
លោកបានសន្យាថា មិនអោយលិចលង់ភ្នំពេញទៀតទេ បើបងប្អូនប្រជាពលរដ្ឋចូលរួមជាមួយរដ្ឋបាលរាជធានី ក្នុងការទុកដាក់សម្រាមកុំអោយចូលលូនោះ។
ចំពោះប្រឡាយ លូ អាជ្ញាធររាជធានីបានគិតគូរយ៉ាងច្បាស់លាស់អស់ហើយ។ ក្នុងឱកាសនោះលោកឃួង ស្រេងក៏បានសូមអោយប្រជាពលរដ្ឋទាំងអស់អញ្ជើញទៅបោះឆ្នោតនៅថ្ងៃទី២៩កក្កដា២០១៨នេះអោយបានគ្រប់គ្នា ហើយបោះអោយចំគោលដៅ អ្នកណាធ្វើអោយប្រទេសជាតិមានសន្តិភាព មានការអភិវឌ្ឍ នរណាអ្នករំដោះបងប្អូនចេញពីរបបប៉ុលពត និងនាំសន្តិភាពមកដល់សព្វថ្ងៃនេះ។
ការដ្ឋានស្ថាបនាប្រឡាយស្ទឹងមានជ័យ មានប្រវែង១៤៩៨ម៉ែត្រ ដោយចាក់បេតុងបុកស៊ីផាយ ទទឹង៨ម៉ែត្រ។ លើគម្រោងនេះ បានបែងចែកជា៤ដំណាក់កាល ក្នុងនោះដំណាក់កាលទី១ មានប្រវែង៣២៦ម៉ែត្រ សងខាងប្រឡាយសរុបប្រវែង៦៥២ម៉ែត្រ ហើយក្នុងដំណាក់កាលទី១នេះ ក្រុមការងារបានសម្រេចការងាររបស់ខ្លួនបាន១០០ភាគរយហើយ។ ក្រៅពីចាក់បេតុងស៊ីផាយហើយនោះ ការចាក់ដីបំពេញដើម្បីផ្តល់កម្មសិទ្ធិជូនប្រជាពលរដ្ឋ ក្រុមការងារបានចាក់បំពេញបានមួយរយភាគរយហើយដែរ។
គួរបញ្ជាក់ថា ប្រឡាយស្ទឹងមានជ័យដែលរដ្ឋបាលរាជធានីភ្នំពេញគ្រោងនឹងធ្វើការអភិវឌ្ឍនេះ ឆ្លងកាត់ខណ្ឌចំនួន២ នោះគឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនឹង៦ម៉ែត្រជាកម្មសិទ្ធិស្របច្បាប់នៅនឹងកន្លែងតែម្តង។
ប្រឡាយស្ទឹងមានជ័យនឹងត្រូវសាងសង់ឡើង ដោយបុកបេតុងស៊ីផាយដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រជាប្រភេទផ្លូវបេតុង រៀបចំតបណ្តាញទឹក ភ្លើងអគ្គិសនីចូលផ្ទះប្រជាពលរដ្ឋ ដាក់បង្កោលភ្លើងសាធារណៈនៅលើផ្លូវនេះថែមទៀត។
ប្រឡាយស្ទឹងមានជ័យ បានដើរតួយ៉ាងសំខាន់ ក្នុងការនាំទឹកទម្លាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រ ចិញ្ចើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕
Source: Kampuchea Thmey Daily
0 Comments