ភ្នំពេញ ៖ ស្ត្រីជនជាតិថៃ២នាក់ ដែលត្រូវបានសមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃចាប់ខ្លួននៅព្រលានយន្តហោះអន្តរជាតិភ្នំពេញ ពាក់ព័ន្ធការដឹកជញ្ជូនគ្រឿងញៀនពីប្រទេសកម្ពុជាទៅប្រទេសជប៉ុន ត្រូវបានបញ្ជូនមកអយ្យការអមសាលាដំបូងរាជធានីភ្នំពេញហើយនាថ្ងៃទី០៦ ខែមិថុនា ឆ្នាំ២០១៨នេះ ដើម្បីចាត់ការតាមផ្លូវច្បាប់។
ជនសង្ស័យទាំង២នាក់ ម្នាក់ឈ្មោះ SORNSIN RUTHAIRAT អាយុ៣៨ឆ្នាំ និង ម្នាក់ទៀតឈ្មោះ TONGOON WORAPHA អាយុ៤២ឆ្នាំ រស់នៅក្រុងបាងកក ប្រទេសថៃ។
ទាក់ទិននឹងការឃាត់ខ្លួនស្ត្រីជនជាតិថៃ២នាក់ខាងលើនេះ លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀនបានឲ្យដឹងថា ក្រោយពីទទួលបានព័ត៌មានថា មានជនស្ត្រីថៃ២នាក់បាន ធ្វើដំណើរពីប្រទេសថៃ មកកាន់ខេត្តសៀមរាប នៃព្រះរាជាណាចក្រកម្ពុជា ដើម្បីមកជួបមេខ្លោងទទួលយកគ្រឿងញៀនប្រមាណជាង៤គីឡូក្រាម ក្នុងគោលដៅបន្តដឹកជញ្ជូនតាមជើងយន្តហោះទៅកាន់ប្រទេសជប៉ុនសមត្ថកិច្ច មន្ទីរប្រឆាំងគ្រឿងញៀន ឲ្យចុះទៅសហការជាមួយសមត្ថកិច្ចគយ និង នគរបាលអគ្គនាយកដ្ឋានអន្តោប្រវេសន៍ប្រចាំព្រលានយន្តអន្តរជាតិភ្នំពេញ រង់ចាំឃាត់ខ្លួនជនសង្ស័យតែម្ដង។ ជាលទ្ធផល ផ្នែកជំនាញបានឃាត់ស្ត្រីថៃ២នាក់ និង ចាប់យកវត្ថុតាងមានសារធាតុញៀន ប្រភេទមេតំហ្វេតាមីន ICE បង្កប់ក្នុងអាវរងាចំនួន៣មានទម្ងន់ជាង៤គីឡូក្រាម។
តាមចម្លើយសារភាពរបស់ជនសង្ស័យ គ្រឿងញៀនទាំងនេះ ត្រូវបានមេខ្លោងរៀបចំវេចខ្ចប់ដាក់ក្នុងអាវរងានៅខេត្តសៀមរាប ហើយពួកគេត្រូវនាំទៅកាន់ប្រទេសជប៉ុននៅវេលាម៉ោង២០និង៣០នាទីយប់ថ្ងៃទី០៣ ខែមិថុនាតាមជើងយន្តហោះនៅព្រលានអន្តរជាតិភ្នំពេញ ក៏ត្រូវសមត្ថកិច្ចកម្ពុជាស្ទាក់ចាប់ខ្លួនតែម្ដងមុនពេលក្រុមជនសង្ស័យឡើងជិះយន្តហោះ ចេញដំណើរទៅប្រទេសជប៉ុន។ឥឡូវនេះព្រះរាជអាជ្ញាអមតុលាការ កំពុងសាកសួរស្ត្រីថៃទាំង២នាក់នៅឡើយ៕
Source: Kampuchea Thmey Daily
0 Comments