អំណោយផ្ទះលើកទី៧៦ របស់សម្តេចតេជោ ហ៊ុន សែន បានសាងសង់រួច និងប្រគល់ជូនអតីតយុទ្ធជន

កំពង់ធំ ៖ ផ្ទះថ្មីមួយខ្នងទៀតហើយ ដែលសមាគមអតីតយុទ្ធជនកម្ពុជាខេត្តកំពង់ធំ បានសាងសង់រួចជាស្ថាពរ និងជាខ្នងផ្ទះលើកទី ៧៦ អំណោយដ៏ថ្លៃថ្លារបស់សម្តេចតេជោ ហ៊ុន សែន ត្រូវបានប្រគល់ជូនដល់ អតីតយុទ្ធជនដែលមានជីវភាពខ្វះខាត នៅស្រុកប្រាសាទបល្ល័ង្ក ខេត្តកំពង់ធំ កាលពីរសៀលថ្ងៃទី១៤ ខែមិថុនា ឆ្នាំ ២០១៨កន្លងទៅថ្មីៗនេះ។

ពិធីប្រគល់ខ្នងផ្ទះលើកទី៧៦ ដែលបានសាងសង់ដោយ សមាគមអតីតយុទ្ធជនកម្ពុជាខេត្តកំពង់ធំ តាមរយៈ ឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា ត្រូវបានប្រគល់ជូនដល់ លោក លោកព្រឹន្ទបាលឯក ទ្រី ទ្រឿន ដែលជាអតីតយុទ្ធជនពិការ ដែលធ្លាប់បម្រើក្នុងជួយកងទ័ព និងត្រូវបានយកចិត្តទុកដាក់ ពីសំណាក់លោកឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ។

លោកឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ បានអញ្ជើញប្រគល់ផ្ទះថ្មី ជូនលោក ទ្រី ទ្រឿន រស់នៅភូមិត្រពាំងថ្ម ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ដែលមានទំហំ ៤មx៦ម សាងសង់អំពីឈើ ដំបូល និងជញ្ជាំង ស័ង្កសី ក្រាលក្តារ ដែលបានចំណាយថវិកាក្នុងការសាងសង់អស់ចំនួន ៧,១៦៥,០០០ រៀល និងបាននាំយកអំណោយរបស់ សម្តេចតេជោ ហ៊ុន សែន ឧបត្ថម្ភបន្ថែម អង្ករ ៥០ គ.ក្រ ,ទឹកត្រីទឹកស៊ីអ៊ីវ ០៣ យួរ , មីយើង ០២ កេស , មុងជ្រលក់ថ្ម ០២ និងថវិកា ២០០,០០០ រៀល។

លោក ទ្រី ទ្រឿន មានភរិយាឈ្មោះ ស៊ុន សាវន អាយុ ៣៩ ឆ្នាំ មានកូន ០៦ នាក់ ក្នុងបន្ទុក សព្វថ្ងៃប្រកបមុខរបរធ្វើស្រែ និងស៊ីឈ្នួលជីកអណ្តូងដៃ យកប្រាក់ដោះស្រាយជីវភាពកូនកំពុងសិក្សាផង ហើយព្រឹន្ទបាលឯកទ្រី ទ្រឿន បានទទួលប្រាក់បៀវត្សប្រចាំខែពីរាជរដ្ឋាភិបាល ចំនួន៥២០,០០០ រៀល ក្នុងមួយខែៗ ផងដែរ ។

អាជ្ញាធរ ប្រជាពលរដ្ឋ និងក្រុមគ្រួសារ លោកព្រឹន្ទបាលឯក ទ្រី ទ្រឿន មានក្តីសោមនស្សរីករាយយ៉ាងក្រៃលែង និងសូមគោរពដឹងគុណចំពោះសម្តេចតេជោ ហ៊ុន សែន និងគាំទ្រសម្តេចធ្វើជានាយករដ្ឋមន្ត្រីគ្រប់ៗអាណត្តិ៕