ការកើតមានជំងឺអាសន្នរោគមួយនៅក្នុងប្រទេសហ្សំប៊ី បានសម្លាប់មនុស្សអស់១១៤នាក់ និងបណ្តាលឲ្យមនុស្សជាង៥.០០០នាក់ ទៀតធ្លាក់ខ្លួនឈឺលើសពីរយៈពេល៨ខែ។ នេះជាការលើកឡើងដោយរដ្ឋមន្ត្រីសុខាភិបាលលោក Chitalu Chilufya កាលពីថ្ងៃសុក្រ។
លោកបានប្រាប់អ្នកយកព័ត៌មានថា យើងបានឆ្លងកាត់រយៈពេល១៤ថ្ងៃជាប់គ្នាដោយមិនមានមួយករណីណាថ្មីត្រូវបានកត់ត្រានោះទេ។ លោកបានបន្តថា ជាចាំបាច់ត្រូវតែតាមសង្កេតពិនិត្យក្នុងស្តង់ដារកម្រិតខ្ពស់នៃអនាម័យដើម្បីចៀសវាងការវិលត្រឡប់មកវិញនៃជំងឺនេះ។ កាលពីខែមេសា ប្រទេសហ្សំប៊ី បានដកបុគ្គលិកយោធា ហើយត្រូវបានបញ្ជូនទៅកាលពីខែធ្នូ ដើម្បីជួយសម្អាតរដ្ឋធានីនិងទីក្រុងដទៃទៀត ដែលស្ថិតនៅចំណុចកំពូលនៃការកើតជំងឺអាសន្ននោះ។
អាសន្នរោគអាចត្រូវបានព្យាបាលដោយផ្តល់សូលូស្យុង ជាតិទឹកតាមមាត់ ប៉ុន្តែជំងឺនេះរាលដាលឆាប់រហ័សណាស់ ហើយអាចសម្លាប់មនុស្សបានតែក្នុងរយៈពេលប៉ុន្មានម៉ោង ប្រសិនបើមិនព្យាបាល។ លោកប្រធានាធិបតី Edgar Lungu ដាក់ចេញបញ្ជាដោយផ្ទាល់ដើម្បីជួយប្រយុទ្ធទប់ទល់នឹងការរាលដាលអាសន្នរោគដោយស្ថិតនៅក្រោមវិធានការណ៍បន្ទាន់ ក្នុងការទប់ទល់នឹងជំងឺ ដែលបណ្តាលមកពីទឹកប្រើប្រាស់៕
រ៉យទ័រ
Source: Kampuchea Thmey Daily
0 Comments