កំពង់ចាម ៖ ដោយមើលឃើញ និងយល់យ៉ាងច្បាស់ពីទុក្ខលំបាករបស់ ប្រជាពលរដ្ឋ ក៏ដូចជាការចូលរួមជាមួយរាជរដ្ឋាភិបាលក្នុងកិច្ចការមនុស្សធម៌ផងនោះ លោក លោក លី សាម៉េត សមាជិកគណបក្សប្រជាជនកម្ពុជា រួមជាមួយលោកឧកញ៉ា ឌី ប៉ូ បាននាំយកនូវអំណោយជាថវិកា សម្ភារៈ និងអាវមួកគណបក្សប្រជាជនកម្ពុជា ជូនដល់ប្រជាពលរដ្ឋក្រីក្រជិត១០០០គ្រួសារ ក្នុងឃុំអំពិល។
ថ្លែងនៅក្នុងវេទិកានាព្រឹក ថ្ងៃទី១៧ ខែមិថុនា ឆ្នាំ២០១៨ នៅឃុំអំពិល ស្រុកកំពង់សៀម ខេត្តកំពង់ចាម លោកឧកញ៉ា ឌី ប៉ូ បានមានប្រសាសន៍ រំលឹកឡើងវិញអំពី របប៣ឆ្នាំ ៨ខែ ២០ថ្ងៃ ដែលប្រជាជនរស់នៅក្នុងរបបគុកឥតជញ្ជាំង ដែលពួកវាបានកាប់សម្លាប់ប្រជាជនស្លូតត្រង់អស់ជាង៣លាននាក់ ដោយមិនរើសមុខ បង្អត់បាយ ធ្វើទារុណកម្មយ៉ាងឃោរឃៅសាហាវព្រៃផ្សៃ។ ប៉ុន្តែដោយសារតែមានគុណដ៏ធំធេង របស់គណបក្សប្រជាជនកម្ពុជា និងមានសម្ដេចតេជោហ៊ុន សែន បានរំដោះប្រជាជន ចេញពីរបបដ៏ខ្មៅងងឹត នៅថ្ងៃ៧ ខែមករា ឆ្នាំ១៩៧៩ ហើយខំកសាងប្រទេសតាំងពីបាតដៃទទេ រហូតអភិវឌ្ឍន៍មានអ្វីៗគ្រប់បែបយ៉ាងដូចសព្វថ្ងៃនេះ។ លោកឧកញ៉ាស្នើសុំបងប្អូនលោកអ៊ំលោកយាយលោកតា កុំបំភ្លេចថ្ងៃកំណើតទី២ របស់ខ្លួនគឺថ្ងៃ៧មករានេះហើយ ដែលចារជាប្រវត្តិសាស្ត្រ។ លោកក៏បានអំពាវនាវផងដែរ សូមបងប្អូនប្រជាជនទាំងអស់ទៅបោះឆ្នោត នានៅថ្ងៃទី២៩ កក្កដាខាងមុខនេះ ដើម្បីគាំទ្រសម្តេចតេជា ធ្វើជានាយករដ្ឋមន្ត្រី ក្នុងអាណត្តិទី៦នេះ និងអាណត្តិក្រោយៗបន្តបន្ទាប់ទៀត។
លោក លី សាម៉េត ក៏បានប្រកាសថា សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាឱ្យមន្ត្រីនៅក្រោមឱវាទ ត្រូវតែបម្រើប្រជាពលរដ្ឋឱ្យបានល្អ គ្រប់ថ្នាក់មូលដ្ឋាននៅទូទាំងប្រទេស។ កត្តាដ៏សំខាន់នេះហើយ ទើបលោក បានប្រកាសបង្កើតទីប្រឹក្សាមួយ នៅឃុំអំពិល ដើម្បីជួយធ្វើអន្តរាគមន៍ ដល់ប្រជាពលរដ្ឋក្រីក្រជួបការលំបាក មានទុក្ខធុរៈ ដូចជាស្ត្រីឆ្លងទន្លេ និងបងប្អូនប្រជាពលរដ្ឋមានជំងឺខ្វះខាតថវិកាទៅមន្ទីរពេទ្យ លោកនឹងជួយជាបន្ទាន់តាមរយៈ ទីប្រឹក្សាដែលនៅទីនេះស្រាប់។
លោកក៏បានអំពាវនាវដល់ប្រជាពលរដ្ឋនៅឃុំអំពិល ជាពិសេសប្រជាពលរដ្ឋនៅទូទាំងប្រទេស បំពេញកាតព្វកិច្ចជាពលរដ្ឋល្អ ចូលរួមបោះឆ្នោតឱ្យបានគ្រប់ៗគ្នា ដើម្បីជ្រើសរើសថ្នាក់ដឹកនាំប្រទេស ដែលបានជួយរំដោះប្រជាពលរដ្ឋចេញ ពីរបបប្រល័យពូជសាសន៍ប៉ុល ពត ពិសេសមេដឹកនាំ ដែលដឹងសុខទុក្ខប្រជាពលរដ្ឋ ,រក្សាសុខសន្តិភាព និង អភិវឌ្ឍន៍ប្រទេសមានការរីកចម្រើនឥតឈប់ឈរ។ លោកថ្លែងយ៉ាងច្បាស់ថា មានតេជោសែនប្រទេសកម្ពុជាមានសុខសន្តិភាព និងបន្តអភិវឌ្ឍន៍ឈប់ឈរ ទូទាំងប្រទេស។
លោកលី សាម៉េត ថ្លែងបន្តថា នេះជាលើក ទី៣ហើយ ដែលលោកបានមកជួបសំណេះសំណាលជាមួយបងប្អូន ប្រជាពលរដ្ឋនៅឃុំអំពិល ហើយលោកសង្កេតឃើញថា បងប្អូនប្រជាពលរដ្ឋដ៏ល្អ គោរពច្បាប់ គោរពព្រះពុទ្ធសាសនា គឺដោយសារប្រទេសមានសុខសន្តិភាព។ សម្តេចតេជោ គឺជាឥស្សរជនជាន់ខ្ពស់ និងឥស្សរជនដទៃទៀត បានរំដោះប្រជាពលរដ្ឋចេញពីរបបវាលពិឃាត។
លោករ័ត្ន គឹមហៃ មេឃុំអំពិលបានឱ្យដឹងថា ឃុំអំពិល ជាឃុំមួយក្នុងចំណោមឃុំទាំង១៥ស្ថិតក្នុងស្រុកកំពង់សៀម ខេត្តកំពង់ចាម។ ឃុំអំពិល មាន១២ភូមិ មានប្រជាពលរដ្ឋចំនួន៤២៧១គ្រួសារ និងមានប្រជាពលរដ្ឋចំនួន ជាង១៨០០នាក់។ ប្រជាពលរដ្ឋនៅឃុំនេះ ភាគច្រើនមានមុខរបរធ្វើកសិកម្ម ធ្វើស្រែចម្ការ និង អាជីវកម្មលក់ដូរហើយលោកបានសន្យាថានឹងទៅចូលរួមបោះឆ្នោតជ្រើសតាំងតំណាងរាស្ត្រអាណត្តិទី៦ នាថ្ងៃទី២៩ កក្កដាខាងមុខនេះពិសេសបោះឆ្នោតជូនគណបក្សប្រជាជនកម្ពុជាលេខរៀងទី២០ដើម្បីអោយសម្តេចតេជោដឹកនាំប្រទេសជាតិបន្តទៀតពីព្រោះមានសម្តេចប្រទសជាតិមានសុខសន្តិភាព និងការអភិវឌ្ឍន៍៕
Source: Kampuchea Thmey Daily
0 Comments