កីឡាករ​វ័យក្មេង សាន គឹម​ហេង​ រក​គ្រាប់​ឲ្យ​ក្រុម​​វិសាខាជាប់ៗ​គ្នា​ប៉ុន្មាន​ប្រកួត​ចុងក្រោយ

កីឡាករ​វ័យក្មេង​មួយ​គឺ សាន គឹម​ហេង បានសម្រេច​ចិត្ត​រួមជាមួយ​ក្រុមបាល់ទាត់​វិសាខា​អែ​ហ្វ​ស៊ី សមាជិក​ថ្មី​ក្នុង​ពានរង្វាន់​លី​គ​កំពូល​កម្ពុជា រដូវ​កាល​ឆ្នាំ​២០១៨ (Metfone Cambodian League 2018) កាលពី​ដើមរដូវ​កាល​កន្លងទៅ ខណៈ​កីឡាករ​រូបនេះ​រក​គ្រាប់​បាល់​ប៉ុន្មាន​ប្រកួត​ចុងក្រោយ​ឲ្យ​ក្រុម​។

ជ័យជម្នះ​កាលពី​ចុង​សប្ដាហ៍​កន្លង​ទៅ​នេះ​បាន​រុញ​ឲ្យ​ក្រុម​វិសាខា ឡើងឈរ​ចំណាត់ថ្នាក់​លេខ​៣​ក្នុងចំណោម​សមាជិក​ទាំង​១២ ក្រុម​ក្រោយ​ប្រកួត​បាន​៨​លើក ឈ្នះ​៥​លើក​ស្មើ​១​លើក​និង​ចាញ់​២​លើក​មាន​១៦​ពិន្ទុ​ក្នុង​ដៃ​។ ចំណែក​កីឡាករ សាន គឹម​ហេង វិញ​រកបាន​គ្រាប់​បាល់​៥​គ្រាប់​ម្នាក់ឯង​នៅ​ប៉ុន្មាន​ប្រកួត​ជាប់ៗ​គ្នា​នេះ​ក្នុង​នោះ​រូបគេ​បាន​ទាត់​ចូល​ក្រុម​វេ​ស្ទើ​ន​១​គ្រាប់ អគ្គស្នងការដ្ឋាន​នគ​របាល​ជាតិ ១​គ្រាប់ ក្រសួងការពារជាតិ​២​គ្រាប់​និង​ចុងក្រោយ​ទាត់​ចូល​ក្រុម​ណាហ្គា​វើ​ល​១​គ្រាប់​។



កីឡាករ​វ័យ​១៨​ឆ្នាំ​រូប​នេះ​ ធ្លាប់​បាន​លើក​ឡើង​ថា «​នៅពេល​ទទួលបាន​ឱកាស​ចូល​លេង​ពី​លោកគ្រូ​បង្វឹក ខ្ញុំ​ប្រឹងប្រែង​អស់ពី​សមត្ថភាព​ដើម្បី​ក្រុម​។ ខ្ញុំ​នឹង​ខិតខំ​ប្រឹងប្រែង​ពង្រឹងសមត្ថភាព​ឲ្យ​កាន់តែ​ប្រសើរ​ឡើង​ថែមទៀត​ដើម្បី​រក​គ្រាប់​បាល់​ឲ្យបាន​ច្រើន​សម្រាប់​ក្រុម​វិសាខា​»​។ កីឡាករ សាន គីមហេង ធ្លាប់​ជា​យុវជន​នៅ​សាលា​បាល់ទាត់​ជាតិ​បាទី ព្រមទាំង​ធ្លាប់​ជាប់​ឈ្មោះ​ក្នុង​ក្រុម​ជម្រើសជាតិ​កម្ពុជា​តាំងពី​យុវជន​ក្រោម​អាយុ​១៣​ឆ្នាំ (U13) ដល់ U18 កាលពី​ឆ្នាំ​២០១៧​កន្លងទៅ​ផងដែរ​។

យ៉ាងណា​ក្តី​តំណាង​ក្លិប​មួយ​នេះ​បញ្ជាក់ថា ​កីឡាករ សាន គឹម​ហេង នៅ​មិនទាន់​អាច​ដាក់​ឲ្យ​ប្រកួត​ក្នុង​លី​គ​កំពូល​កម្ពុជា បាន​គ្រប់​ប្រកួត​នោះ​ទេ ដោយ​ទុក​ឲ្យ​ហ្វឹកហាត់​ជាមួយ​ក្រុម​មួយ​រយៈ​ពេល​សិន​ទើប​អាច​លេង​បាន​ព្រោះ​គេ​សុទ្ធតែ​នៅ​ក្មេងខ្ចី​នៅឡើយ​។ កីឡាករ សាន គឹម​ហេង ធ្លាប់​បាន​រំលឹក​ថា ​រូបគេ​មាន​ក្តី​ប្រាថ្នា​ទៅ​បន្ត​អាជីព​នៅ​ប្រទេស​ជប៉ុន នៅ​ថ្ងៃ​អនាគត​ផងដែរ។



មុន​រដូវ​កាល​ឆ្នាំ​២០១៨ ចាប់ផ្តើម​ក្រុម​វិសាខា បាន​បង្ហាញ​មុខ​កីឡាករ​ទាំងអស់​ក្នុងការ​ត្រៀម​ប្រកួត​ដោយ​ក្នុង​នោះ​មាន​អ្នកចាំទី កែវ សុខ​សិលា ពី​ភ្នំពេញ​ក្រោ​ន​, រស់ សំអឿន ពី​បឹងកេត​, ង៉​យ ស្រ៊ី​ន ពី​ណាហ្គា​វើ​ល ព្រមទាំង​កីឡាករ​កូរ៉េខាងជើង​៤ មាន​ខ្សែប្រយុទ្ធ Choe Myong-ho ខ្សែបម្រើ Kim Kyong-hun ខ្សែការពារ​កណ្ដាល Jang Song-hyok​ខ្សែប្រយុទ្ធ Ri Hyok-chol និង​ខ្សែបម្រើ Pak Song Chol​។ ចំណែក​កីឡាករ​ចាស់​មាន ជា វ៉ាន់​សាក់​, ស៊ិន សុផាន់​ណាត​, ទៀង ទី​នី​, ធឿន ស៊ុន​ហួរ​, នុត ស៊ីនួន​. ម៉ែន សីហា​, សុះ ហាំ​ប៉ាន់​, មាឃ ឆដា​រ៉ាវុធ​, ចិន វណ្ណៈ​, សាន្ត បូរ៉ា​, ម៉ាត់ សាក់​រើ​, សេន ឡេះ​, នៅ សុ​សិលា​, ខុន រស្មី​, អ៊ីវ វិមាណ​, សួន ឈុន​ឆេង​, អ៊ិន វិ​ច្ឆ័​យ​, នួន សុថា​ន​។ ថ្មី​នេះ​ក្លិប​បាន​នាំយក​កីឡាករ​ឆ្នើមៗ​២​រូប​ទៀត​គឺ កែវ សុខ​ផេង និង សុខ សុវណ្ណ ចូលក្នុង​ក្រុម​ផងដែរ​។

ក្រុម​វិសាខា បាន​បង្កើត​ឡើង​តាំងពី​ថ្ងៃទី​៥ ខែកុម្ភៈ ឆ្នាំ​២០១៧ ក្រោម​ការឧបត្ថម្ភ​គាំទ្រ​ពី​សំណាក់​ឯកឧត្ដម ស សុខា តំណាង​រាស្ដ្រ​ខេត្តព្រៃវែង និង​ជា​អនុប្រធាន​សហព័ន្ធ​សហភាព​យុវជន​កម្ពុជា​។​បច្ចុប្បន្ន​ក្លឹប​មាន​កីឡាករ​បាន ២៥​នាក់​សម្រាប់​ចូលរួម​លី​គ​លំដាប់​ទី​២​របស់​កម្ពុជា​ឆ្នាំនេះ​។ លោក ហុក សុចិ​ត្រា អតីត​គ្រូបង្វឹក​ក្រុម​ជម្រើសជាតិ​កម្ពុជា ដើរ​តួ​ធ្វើជា​អ្នកចាត់ការ​ទូទៅ​របស់​ក្រុម ខណៈ​លោក ហុក សុ​ជីវ័ន ជា​ប្អូនប្រុស​បង្កើត​ធ្វើជា​គ្រូបង្វឹក​៕

Source: Kampuchea Thmey Daily