ចៅក្រម​កំពូល​ពីរ​រូប​របស់​ម៉ាឡេស៊ី ​បាន​លាលែង​ពី​តំណែង​ចំ​ពេល​មាន​ការ​ជម្រុះ​មន្ត្រី​ជាន់ខ្ពស់

ចៅក្រម​ជាន់ខ្ពស់​បំផុត​ពីររូប​របស់​ប្រទេស​ម៉ាឡេស៊ី​ បាន​លាលែង​ពី​តំណែង​របស់​ពួកគេ​ ខណៈ​រដ្ឋាភិបាល​របស់​លោក​នាយករដ្ឋមន្ត្រី Mahathir Mohamad បាន​ជម្រុះ​មន្ត្រីជាន់ខ្ពស់​ដែល​គេ​មើលឃើញថា​ជិត​ស្និទ្ធ​ជាមួយ​រដ្ឋបាល​មុន។

បញ្ជី​នៃ​មន្ត្រី​កំពូលៗ​ ដែល​ត្រូវបាន​ដកហូត​ឬ​លាឈប់​ពី​តំណែង​របស់​ពួកគេ​គឺ​បាន​កើន​ឡើងជា​លំដាប់​កាលពី​ខែ​មុន​បន្ទាប់ពី​ក្រុមចម្រុះ​ប្រឆាំង​របស់លោក Mahathir បានទទួល​ជ័យជម្នះ​ដ៏​អស្ចារ្យ​នៅក្នុង​ការបោះឆ្នោត​ទូទៅ​មួយ​កាលពី​ថ្ងៃទី​៩​ឧសភា​។​
​
យោងតាម​សេចក្តីថ្លែងការណ៍​មួយ​របស់​ការិយាល័យ​ប្រធាន​អត្រានុកូលដ្ឋាន​នៃ​តុលាការ​សហព័ន្ធ​បាន​ឲ្យ​ដឹងថា ប្រធាន​ចៅក្រម Raus Sharif និង​ប្រធាន​សាលាឧទ្ធរណ៍​លោក Zulkefli Ahmad Makinudin នឹង​លាលែង​ពី​តំណែង​របស់​ពួកគេ​នៅ​ថ្ងៃទី​៣១​ខែកក្កដា​។​
​
សេចក្ដីថ្លែងការណ៍​បាន​និយាយថា “​ព្រះមហាក្សត្រ​ទ្រង់​បាន​យល់ព្រម​ចំពោះ​ការលាលែង​របស់​ពួកគេ​នៅ​ថ្ងៃទី​៨​ខែមិថុនា​”​។​
​
សមាគម​ច្បាប់​របស់​ប្រទេស​ម៉ាឡេស៊ី​បាន​ជំទាស់​ទៅនឹង​ការសម្រេចចិត្ត​របស់រ​ដ្ឋា​ភិ​បាល​នៃ​នាយករដ្ឋមន្ត្រី​ដែល​ត្រូវ​បណ្តេញចេញ​លោក Najib Razak ដើម្បី​តែងតាំង​លោក Raus និង Zulkefli កាលពី​ឆ្នាំមុន​ដោយបាន​លើកឡើងថា ចៅក្រម​ទាំងពីរ​រូបនេះ​បាន​លើស​អាយុ​ចូលនិវត្តន៍​។​
​
កាលពី​សប្តាហ៍​មុន ម៉ាឡេស៊ី​បានតែងតាំង​អគ្គមេធាវី​ថ្មី​មួយរូប​ដែល​បាន​និយាយថា នឹងមិន​មានការ​លាក់​បាំង​អ្វី​ឡើយ​ហើយ​ថា គាត់​នឹង​បន្តសកម្មភាព​ព្រហ្មទណ្ឌ​និង​ស៊ីវិល​លើ​រឿងអាស្រូវ​អំពើពុករលួយ​នៅក្នុង​មូលនិធិ 1Malaysia Development Berhad (1MDB) ដែល​ត្រូវបាន​បង្កើតឡើង​ដោយ​លោក Najib​។​
​
អគ្គមេធាវី​ថ្មី​លោក Tommy Thomas ត្រូវបានតែងតាំង​ជំនួស​លោក Mohamed Apandi Ali ដែល​កាលពី​ឆ្នាំ​២០១៦​បាន​អះអាង​អំពី​ការមិនធ្វើ​ខុស​របស់លោក Najib ក្នុង​រឿងអាស្រូវ 1MDB ទឹកប្រាក់​រាប់ពាន់​លាន​ដុល្លារ​៕ REUTERS

​

Source: Kampuchea Thmey Daily