ភ្នំពេញ ៖ បុរសម្នាក់ ធ្លាប់បានសាងផ្នួសរៀនសូត្រធម៌អាថ៌ ដែលសង្គមច្រើនឲ្យតម្លៃថា ជាមនុស្សមានការចេះដឹងស្គាល់ខុសត្រូវ ជាមនុស្សម្នាថ្លៃថ្នូរក្នុងសង្គម តែផ្ទុយទៅវិញបន្ទាប់ពីលួចសឹកដោយចិត្តឯង និងមកយកប្រពន្ធមានកូន១ ស្រាប់តែបែកគំនិតសេពគ្រឿងញៀន ដល់កម្រិត ពេលនេះមានសភាពដូចមនុស្សវិកលចរិតទៅហើយ បង្កការភ័យខ្លាចដល់មនុស្សជិតខាងទៅវិញ។
ស្ថិតក្នុងលំដាប់មនុស្សញៀនថ្នាំដល់កម្រិត ជនបង្កម្នាក់នេះ បានយកដុំថ្មដេញគប់គេឯង និងគប់ទៅលើផ្ទះអ្នកជិតខាងបណ្ដាលឲ្យបែកកញ្ចក់បង្អួច ព្រមទាំងធ្លុះជញ្ជាំងស័ង្កសីជាច្រើនកន្លែងខណៈនោះក៏មានការអន្តរាគមន៍ពីកម្លាំងនគរបាល និងប្រជាការពារភូមិដែរ ប៉ុន្តែមិនហ៊ានចូលទៅចាប់បុរសនេះទេ ព្រោះគ្រាន់តែចូលទៅជិតបុរសនេះតដៃ ទើបរាយការណ៍ទៅខាងមន្ត្រីមន្ទីរសង្គមកិច្ចចុះទៅយក ប៉ុន្តែរង់ចាំជាច្រើនម៉ោងហើយនៅតែមិនទាន់ទៅដល់ទៀត។
ហេតុការណ៍នេះ បានកើតឡើង កាលពីវេលាម៉ោង៩ព្រឹក ថ្ងៃទី៣ ខែមិថុនា ឆ្នាំ២០១៨ នៅក្នុងភូមិព្រៃសាលាសង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។
តាមស្ត្រីជាម្ដាយបាននិយាយថា បុរសបែកថ្នាំរូបនេះឈ្មោះ លឹម រតនា អាយុ៣២ឆ្នាំ ត្រូវជាកូនប្រុសរបស់គាត់មានទីលំនៅក្នុងភូមិកើតហេតុខាងលើ។ កាលពីដើមឡើយគឺជាមនុស្សមានសតិធម្មតាល្អត្រឹមត្រូវដូចគេឯង និងធ្លាប់បួសជាសង្ឃនៅក្នុងវត្តក្រាំងធ្នង់ ខណ្ឌសែនសុខអស់រយៈពេល៥វស្សា លុះក្រោយមកបានសឹកលាចាកសិក្ខាបទដោយចិត្តឯង រួចបានយកប្រពន្ធនិងបានកូនមួយ។ បន្ទាប់ពីរស់នៅជាមួយគ្នាបានមួយរយៈស្ត្រីជាប្រពន្ធ បាននាំកូនចុះចោលរត់ទៅតាមប្រុសថ្មីបាត់ ហើយរូបគេបានតាមរកប្រពន្ធនិងកូនរហូតដល់ខេត្តព្រៃវែង ប៉ុន្តែរកមិនឃើញឡើយ ដែលជាហេតុធ្វើឲ្យកូនប្រុសគាត់ខូចចិត្តយ៉ាងខ្លាំង ម្យ៉ាងឪពុកវាយធ្វើបាបផង ក៏បានបែកគំនិតប្រើប្រាស់គ្រឿងញៀន បើគិតរហូតដល់ពេលនេះមានរយៈពេល២ឆ្នាំមកហើយ ដែលគេបានប្រើប្រាស់ថ្នាំញៀន៕
Source: Kampuchea Thmey Daily
0 Comments