ក្រុមចម្រុះ ​៖ ​ប្រព័ន្ធ​ការពារ​អាកាស​អារ៉ាប៊ីសាអ៊ូឌីត​ស្ទាក់​ចាប់​មី​ស៊ី​ល​លើ​រាជធានី

ប្រទេស​អារ៉ាប៊ីសាអ៊ូឌីត​បាន​និយាយ​កាលពី​ថ្ងៃអាទិត្យ​ថា ខ្លួន​ស្ទាក់​ចាប់​បាន​មី​ស៊ី​ល​ចំនួន​ពីរ​គ្រាប់​ដែល​បាញ់​ដោយ​កងជីវពល Houthi របស់​ប្រទេស​យេ​មែន​លើ​រដ្ឋធានី Riyadh ខណៈដែល​ក្រុមចម្រុះ​ដឹកនាំ​ដោយ​អារ៉ាប៊ីសាអ៊ូឌីត ​បាន​ព្យាយាម​ដើម្បី​ដណ្តើម​ទីក្រុង​កំពង់ផែ​ដ៏​សំខាន់​របស់​យេ​មែន​ពី​ក្រុម​សម្ព័ន្ធភាព​អ៊ីរ៉ង់​មួយ​នេះ​។​
​
រ៉​យ​ទ័​រ​បាន​រាយការណ៍​ថា យ៉ាងហោចណាស់​មានការ​ផ្ទុះ​ខ្លាំងៗ​ចំនួន​៦​លើក​ត្រូវបាន​គេ​ឮ​ហើយ​ពន្លឺភ្លើង​ត្រូវបាន​គេ​មើលឃើញ​នៅលើ​មេឃ​ជុំវិញ​រដ្ឋធានី​របស់​ប្រទេស​អារ៉ាប៊ីសាអ៊ូឌីត​។ អំបែង​គ្រាប់​ត្រូវបាន​គេ​ប្រទះឃើញ​នៅលើ​ផ្លូវ​មួយ​ក្នុង​សង្កាត់​ការទូត​ដែលជា​កន្លែង​ស្ថានទូត​ភាគច្រើន​ស្ថិតនៅ​និង​មាន​ជនបរទេស​ជាច្រើន​រស់នៅ​ប៉ុន្តែ​មិនមាន​ការខូចខាត​ធ្ងន់ធ្ងរ​ទេ​។​
​
ទូរទស្សន៍ al-Masirah របស់​ក្រុម Houthi បាន​ផ្សាយ​ថា មី​ស៊ី​ល​ត្រូវបាន​បាញ់​ដាក់​ក្រសួងការពារជាតិ​អារ៉ាប៊ីសាអ៊ូឌីត​និង​គោលដៅ​ដទៃទៀត​។​
​
ការវាយប្រហារ​នេះ​គឺជា​ការវាយប្រហារ​លើក​ទីមួយ​ដែល​កំណត់​គោលដៅ​លើ​ទីក្រុង Riyadh ចាប់តាំងពី​ក្រុមចម្រុះ​ដឹកនាំ​ដោយ​អារ៉ាប៊ីសាអ៊ូឌីត​បានចាប់ផ្តើម​ការវាយលុក​មួយ​នៅ​ថ្ងៃទី​១២​ខែមិថុនា​ដើម្បី​ដណ្តើមយក​ទីក្រុង​កំពង់ផែ Hodeidah របស់​ប្រទេស​យេ​មែន​នៅក្នុង​សមរភូមិ​ដ៏​ធំ​បំផុត​នៃ​សង្គ្រាម​ដែលមាន​បំណង​ធ្វើ​ឲ្យ​ក្រុម Houthi ចុះខ្សោយ​តាមរយៈ​ការ​កាត់ផ្តាច់​បន្ទាត់​ផ្គត់ផ្គង់​ចម្បង​របស់​ពួកគេ​។​
​
មាន​រថយន្ត​ពន្លត់​អគ្គិភ័យ​និង​វត្តមាន​សន្តិសុខ​យ៉ាងច្រើន​នៅក្នុង​សង្កាត់​ការទូត​នៅ​ភាគ​និរតី​ទីក្រុង Riyadh បន្ទាប់ពី​ការវាយប្រហារ​មី​ស៊ី​ល​កាលពី​ថ្ងៃអាទិត្យ​ដែល​នេះ​យ៉ាងហោចណាស់​ជា​លើក​ទី​៦​ហើយ​នៅលើ​រាជធានី​នេះ​ចាប់តាំងពី​ខែធ្នូ​មក​។​
​
ក្រុម Houthi ដែល​គ្រប់គ្រង​រដ្ឋធានី Sanaa បាន​បាញ់​មី​ស៊ី​ល​រាប់សិប​គ្រាប់​ចូលទៅក្នុង​ព្រះរាជាណាចក្រ​មួយ​នេះ​នៅក្នុង​រយៈពេល​ប៉ុន្មាន​ខែ​ថ្មីៗ​នេះ​។​
​
គួរ​បញ្ជាក់ថា ក្រុមចម្រុះ​ដែល​គាំទ្រ​ដោយ​លោកខាងលិច​បានធ្វើ​អន្តរាគមន៍​ក្នុង​សង្គ្រាម​យេ​មែន​នៅ​ឆ្នាំ​២០១៥​ដើម្បី​កម្ចាត់​ក្រុម Houthi និង​ស្ដារ​រដ្ឋាភិបាល​ដែល​ត្រូវបាន​ទទួលស្គាល់​ជា​អន្តរជាតិ​ឡើងវិញ​៕ REUTERS

​

Source: Kampuchea Thmey Daily