ភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ នឹងបង្កើនការបណ្តុះបណ្តាលដល់ប្រជាកសិករនៅទូទាំងប្រទេសឲ្យក្លាយជាសហគ្រិនភាពដើម្បីលើកស្ទួយដល់ជីវភាពរស់នៅប្រចាំថ្ងៃឲ្យកាន់តែប្រសើរឡើង។
លោក មៀច យ៉ាឌី ប្រធានការិយាល័យទីផ្សារកសិកម្មនាយកដ្ឋានផែនការនិងស្ថិតិក្រសួងកសិកម្មរុក្ខាប្រមាញ់ និងនេសាទបានមានប្រសាសន៍ថា មន្ត្រីជំនាញកសិកម្ម នឹងចុះបង្ហាត់បង្រៀនដល់កសិករនៅទូទាំងប្រទេសស្តីពីជំនាញសហគ្រិនភាពនេះ ដើម្បីផ្លាស់ប្តូរឥរិយាបថកសិករពីការធ្វើកសិកម្មសម្រាប់តែគ្រួសារអោយទៅជាកសិពាណិជ្ជករដោយចេះរកស៊ីជួញដូរដោយខ្លួនឯង។
ថ្លែងក្រោយសន្និសីទអន្តរជាតិធំបំផុតស្តីពីកសិកម្ម ចិញ្ចឹមសត្វ និងជលផលនៅកម្ពុជាកាលពីចុងសប្តាហ៍នេះ នៅសណ្ឋាគារភ្នំពេញលោក មៀច យ៉ាឌីបានបន្តថា ការចុះផ្សព្វផ្សាយស្តីពីសហគ្រិនភាពដល់ប្រជាកសិករនេះ មានដូចជារបៀបទំនាក់ទំនងទីផ្សារក្នុងការស្វែងទីផ្សារ តម្លៃកសិផល ទីកន្លែង ដែលត្រូវយកទៅលក់ និងដាំដំណាំអ្វីដែលឆ្លើយតបទៅនឹងតម្រូវការនៃទីផ្សារជាដើម។
លោកបានបន្ថែមថា នៅពេលកសិករមានចំណេះដឹងពីសហគ្រិនភាពនេះទៅ គាត់អាចចេះស្វែងរកទីផ្សារដោយខ្លួនឯងបានដោយមិនចាំបាច់ពឹងពាក់ទៅវិស័យឯកជនឬឈ្មួញកណ្តាលនោះទេហើយនឹងជួយធ្វើឲ្យ ប្រាក់ចំណូលរបស់ពួកគេកើនឡើងមួយកម្រិតថែមទៀត។
លោកមៀច យ៉ាឌីបានជំរុញឲ្យកសិករចងក្រងជាសមាគមកសិករឲ្យបានច្រើនដើម្បីងាយស្រួលក្នុងការរៀបចំផែនការច្បាស់លាស់ មានលទ្ធភាពចុះកិច្ចសន្យាជាមួយបណ្តាក្រុមហ៊ុនសម្រាប់ទិញផលិតផលនៅពេលកសិករប្រមូលផលក៏ដូចងាយស្រួលដល់មន្ត្រីជំនាញកសិកម្មក្នុងការចុះទៅធ្វើការផ្សព្វផ្សាយពីបច្ចេកទេសថ្មីៗដល់សហគមន៍ផងដែរ។
លោកមៀច យ៉ាឌីក៏បានអំពាវនាវឲ្យកសិករចងក្រងជាសមាគមឬសហគមន៍ឲ្យបានច្រើនបន្ថែមទៀតដើម្បីឲ្យកសិករអាចទំនាក់គ្នាពីផែនការ បច្ចេកទេសការដាំដុះ និងទីផ្សារកសិផលឲ្យបានច្បាស់លាស់សម្រាប់ជួយគាំទ្រដល់កសិករនៅតាមសហគមន៍នីមួយៗឲ្យកាន់តែមានការរីកចម្រើន។
ចំណែកលោក សឿ សាខន ប្រធានសហគមន៍អភិវឌ្ឍន៍កសិកម្មកំពង់ប្រាសាទនៅ ខេត្តកណ្តាលបានស្វាគមន៍ចំពោះគំនិតផ្តួចផ្តើមនេះ ព្រោះបានជួយឲ្យកសិករទទួលបាននូវចំណេះដឹងទាក់ទិននឹងការធ្វើជំនួញ បច្ចេកទេសនៃការដាំដុះថ្មីៗធ្វើឲ្យដំណាំទទួលបានទិន្នផលខ្ពស់។
លោកបានបន្តថា «ពាក្យថា សហគ្រិនភាពនេះពីមុនដំបូងមកពីកសិករទេតែពីសង្គមចាស់ដែលខ្ញុំរស់នៅពីក្មេងក៏វាមានពាក្យហ្នឹងដែរ បន្ទាប់មកទៀត ក្លាយជាសហគមន៍ ហើយចុងក្រោយជាសហគ្រិនភាពដែលគាត់ចងគ្នាដើម្បីធ្វើជាជំនួញនៅក្នុងសហគមន៍របស់គាត់កាលណាចេះធ្វើជំនួញកុំឲ្យឈ្មួញកណ្តាលកេងចំណេញពីគាត់» ។
យ៉ាងណាក៏ដោយលោក សឿ សាខន បានស្នើឲ្យមន្ត្រីជំនាញកសិកម្មបន្តចុះផ្សព្វផ្សាយអំពីបច្ចេកទេសនៃការដាំដុះថ្មីៗ ក៏ដូចជាសហគ្រិនភាពនេះឲ្យបានទូលំទូលាយថែមទៀតដល់ប្រជាកសិករដើម្បីឲ្យការ ដាំដុះទទួលបានទិន្នផលខ្ពស់បង្កើនប្រាក់ចំណូលក្នុងគ្រួសារឲ្យកាន់តែប្រសើរឡើងថែមទៀត៕
Source: Kampuchea Thmey Daily
0 Comments