កាលពីថ្ងៃចន្ទ ទីក្រុងព្យុងយ៉ាង បានប្រារព្ធខួបនៃការចាប់ផ្ដើមសង្គ្រាមកូរ៉េ ប៉ុន្តែការប្រកាសរិះគន់សហរដ្ឋអាមេរិកតាមទម្លាប់ គឺមិនមានទេ ពីបណ្តាញផ្សព្វផ្សាយរដ្ឋ បន្ទាប់ពីកិច្ចប្រជុំកំពូលនៅប្រទេសសិង្ហបុរី។
ជម្លោះបានចាប់ផ្តើមនៅថ្ងៃទី២៥ខែមិថុនាឆ្នាំ១៩៥០នៅពេលដែលកូរ៉េខាងជើងចាប់ផ្ដើមការឈ្លានពានដ៏ធំមួយនៅកូរ៉េខាងត្បូងដោយចាប់យកបានទីក្រុងសេអ៊ូលនៅបីថ្ងៃបន្ទាប់។
ប៉ុន្តែក្រុងព្យុងយ៉ាងបានចោទប្រកាន់អាមេរិកជាយូរមកហើយថាបានបង្កឲ្យមានសង្គ្រាមកូរ៉េជាផ្នែកមួយនៃផែនការសម្រាប់ការត្រួតត្រាជាសកលនិងបានបន្ទោសអាមេរិកចំពោះការបែងចែកឧបទ្វីបនេះដែលបានព្រមព្រៀងរវាងក្រុងមូស្គូនិងវ៉ាស៊ីនតោននៅថ្ងៃបិទនៃសង្គ្រាមលោកលើកទីពីរ។
ប្រព័ន្ធផ្សព្វផ្សាយជាផ្លូវការដែលគ្រប់គ្រងយ៉ាងតឹងរ៉ឹងរបស់ប្រទេសកូរ៉េខាងជើងជាធម្មតាត្រូវបានដាក់បញ្ចូលជាមួយនឹងពាក្យប្រមាថប្រឆាំងអាមេរិកជារៀងរាល់ថ្ងៃទី២៥ខែមិថុនាប៉ុន្ដែឆ្នាំ២០១៨នេះបានបង្ហាញពីករណីលើកលែង។
របាយការណ៍មួយដែលផ្សាយដោយកាសែត Rodong Sinmun បានឲ្យដឹងថា “ជារៀងរាល់ឆ្នាំនៅថ្ងៃនេះ កងទ័ពនិងប្រជាជនរបស់យើងបានអុំទូកនៃការចងចាំ ពេញលេញនៃគោលលទ្ធិនិងការប្តេជ្ញាចិត្តដើម្បីការពារប្រទេស”។
ផ្ទុយទៅវិញ ទាំងប្រាំមួយទំព័ររបស់កាសែតនេះកាលពីឆ្នាំមុនគឺពោរពេញទៅដោយការរិះគន់ចម្រុះពណ៌លើ “ចក្រពត្តិនិយមសហរដ្ឋអាមេរិក” ដោយបានស្តីបន្ទោសពួកអាមេរិកចំពោះ “ការសម្លាប់រង្គាលដែលពួកគេបានសម្លាប់ប្រជាជនកូរ៉េរាប់មិនអស់នៅក្នុងវិធីឃោរឃៅនិងសាហាវបំផុត”។
គួរបញ្ជាក់ថា ខួបនៅឆ្នាំនេះបានកើតឡើងក្នុងរយៈពេលតិចជាងពីរសប្តាហ៍បន្ទាប់ពីមេដឹកនាំកូរ៉េខាងជើងលោកគីមជុងអ៊ុននិងលោកប្រធានាធិបតីសហរដ្ឋអាមេរិកដូណាល់ត្រាំបានចាប់ដៃគ្នានៅក្នុងកិច្ចប្រជុំកំពូលជាប្រវត្តិសាស្ត្រនិងមិនធ្លាប់មានពីមុនមកនៅប្រទេសសិង្ហបុរី៕ AFP
Source: Kampuchea Thmey Daily
0 Comments