ភ្នំពេញ ៖ ចៅក្រមសាលាដំបូងរាជធានីភ្នំពេញ លោក កោ វណ្ឌី កាលពីព្រឹកថ្ងៃទី០៧ ខែមិថុនា ឆ្នាំ២០១៨នេះ បានប្រកាសសាលក្រមសម្រេចផ្ដន្ទាទោសអតីតមន្ត្រីនគរបាលសក្ដិ៤ម្នាក់ ដាក់ពន្ធនាគារកំណត់២ឆ្នាំ តែអនុវត្តទណ្ឌកម្មក្នុងគុក៦ខែ ទោសសល់ពីនេះត្រូវព្យួរ និងពិន័យប្រាក់ចំនួន៤លានរៀលបង់ចូលថវិការដ្ឋ ក្រោមការចោទប្រកាន់ពីបទហិង្សា ដោយចេតនាមានស្ថានទម្ងន់ទោស និងបទប្រើប្រាស់ដោយគ្មានសិទ្ធិនូវសញ្ញាសម្គាល់ដែលកំណត់ដោយអាជ្ញាធរសាធារណៈ។
សេចក្ដីសម្រេចនេះ បើកផ្លូវអោយជនជាប់ចោទប្ដឹងឧទ្ធរណ៍តាមកំណត់ច្បាប់ បើមិនសុខចិត្តនឹងសាលក្រម។
ជនជាប់ចោទឈ្មោះ សៅ បញ្ញា អាយុ៣៣ឆ្នាំ បម្រើការងារនៅការិយាល័យរដ្ឋបាលសរុប នៃនាយកដ្ឋានប្រឆាំងបទល្មើសបច្ចេកវិទ្យា របស់អគ្គស្នងការដ្ឋាននគរបាលជាតិ។
សូមបញ្ជាក់ថា រឿងក្ដីមន្ត្រីប៉ូលិសសក្ដិ៤ធាក់មន្ត្រីប៉ូលិសចរាចរណ៍ជាប់កិច្ចសន្យានៅព្រឹកថ្ងៃទី១៦ខែឧសភា ឆ្នាំ២០១៨នេះ ត្រូវបានមន្ត្រីពន្ធនាគារព្រៃសម១បញ្ជូនទៅសាលាដំបូងរាជធានីភ្នំពេញដើម្បីបើកសវនាការកាត់ទោសពាក់ព័ន្ធបទល្មើសហិង្សាដោយចេតនា មានស្ថានទម្ងន់ទោស និងទី២.បទប្រើប្រាស់ដោយគ្មានសិទ្ធិនូវសញ្ញាសម្គាល់ ដែលកំណត់ ដោយអាជ្ញាធរសាធារណៈ។
សវនាការនេះដឹងនាំដោយលោកចៅក្រម កោ វណ្ឌី អនុប្រធានសាលាដំបូងរាជធានីភ្នំពេញ និងលោក កុល បុន ជាតំណាងអយ្យការ។ ក្នុងសវនាការជនជាប់ចោទបានសារភាពថា ខ្លួនគេពិតជាបានធាក់មន្ត្រីប៉ូលិសចរាចរណ៍មែន ដោយសារខឹងខ្លាំងពេក។
សូមរំលឹកថា ចៅក្រមស៊ើបសួរសាលាដំបូងរាជធានីភ្នំពេញលោក ពេជ្រ វិជ្ជាធរ កាលពីរសៀលថ្ងៃទី១១ ខែមករា ឆ្នាំ២០១៨ បានសម្រេចចេញដីកាឃុំខ្លួនជនសង្ស័យ ឈ្មោះ សៅ បញ្ញា អាយុ៣៣ឆ្នាំ បម្រើការងារនៅការិយាល័យរដ្ឋបាលសរុប នៃនាយកដ្ឋានប្រឆាំងបទល្មើសបច្ចេកវិទ្យា របស់អគ្គស្នងការដ្ឋាននគរបាលជាតិ ដាក់ពន្ធនាគារបណ្តោះអាសន្នក្រោមការចោទប្រកាន់របស់លោក សៀង សុខ ព្រះរាជអាជ្ញារង ចំនួន២បទល្មើស ទី១.បទ ហិង្សាដោយចេតនា មានស្ថានទម្ងន់ទោស និងទី២.បទប្រើប្រាស់ដោយគ្មានសិទ្ធិនូវសញ្ញាសម្គាល់ ដែលកំណត់ ដោយអាជ្ញាធរសាធារណៈ តាមមាត្រា២១៨ និងមាត្រា៦១៤ នៃក្រមព្រហ្មទណ្ឌ។
កាលពីរសៀលថ្ងៃទី១០ខែមករាឆ្នាំ២០១៨មន្ដ្រីនគរបាលដែលប្រើហិង្សាលើកជើងធាក់មន្ត្រីនគរបាលចរាចរណ៍បណ្ដាលអោយដួលអុកគូទ ត្រូវបានកម្លាំងនគរបាលកម្រិតធ្ងន់រាជធានីភ្នំពេញ បញ្ជូនទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរ។
ពាក់ព័ន្ធនឹងអំពើហិង្សានេះដែល មន្ដ្រីដែលនៅកន្លែងកើតហេតុ បានប្រាប់ឲ្យដឹងថា ករណីប្រើអំពើហិង្សាពីសំណាក់នគរបាលពាក់ស័ក្តិ៤រូបនេះ បានកើតឡើង នៅស្ដុបត្រឡោកបែក ដោយនគរបាលរូបនេះ បានបើករថយន្ដម៉ាក Ford ពាក់ស្លាកលេខភ្នំពេញ 2AC-9099 ដោយបើកខុសច្បាប់ចរាចរណ៍ ក៏ត្រូវបានក្រុមមន្ដ្រីជាប់កិច្ចសន្យានោះឃាត់ដើម្បីសួរនាំ។ ប៉ុន្ដែការអនុវត្តច្បាប់បែបនេះ ធ្វើឲ្យនគរបាលនោះខឹង រហូតចុះពីលើរថយន្ដទាញកអាវអូស ថែមទាំងធាក់ចំដើមទ្រូងមួយជើងផ្ងារទៅក្រោយ បើទោះបីជនរងគ្រោះ បានលត់ជង្គង់ និងលើកដៃគោរពក្នុងន័យបង្ហាញថា សុំទោសក៏ដោយនោះ។
មន្ដ្រីជាប់កិច្ចសន្យា ដែលរងការធាក់មួយជើងចំកណ្ដាលដើមទ្រូងបណ្ដាលអោយដួលអុកគូទនោះ ឈ្មោះ អឿន ចំណាន៕
Source: Kampuchea Thmey Daily
0 Comments