កំពង់ស្ពឺ ៖ មុខសញ្ញាចែកចាយ និងប្រើប្រាស់គ្រឿងញៀន ចំនួន៤នាក់ ត្រូវបានសមត្ថកិច្ចឃាត់ខ្លួនបន្តបន្ទាប់គ្នា។
ការបង្ក្រាបមុខបទល្មើសគ្រឿងញៀន ខាងលើ ធ្វើឡើង នៅថ្ងៃពុធ ៨រោច ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៦ ខែមិថុនា ឆ្នាំ២០១៨នេះ វេលាម៉ោង ១២ និង ៣០នាទី។
លោកវរសេនីយ៍ឯក ឃុត សុផល អធិការនគរបាលស្រុកសំរោងទង បានឲ្យដឹងថា កម្លាំងអធិការដ្ឋាននគរបាលស្រុកសំរោងទង បង្ក្រាបករណីជួញដូរគ្រឿងញៀន ២ករណីផ្សេងគ្នា ក្នុងនោះករណីទី១ បង្ក្រាបភូមិស្ដុកព្រីង ឃុំសំបូរ និងករណីទី២ បង្ក្រាបនៅភូមិកែវឧត្ដម ឃុំត្រពាំងគង ស្រុកសំរោងទង។
លោកអធិការបានបន្តទៀតថា ក្នុងការបង្ក្រាបមុខសញ្ញាគ្រឿងញៀននេះ មុខដំបូងសមត្ថកិច្ចឃាត់ឈ្មោះ ប៉ក់ ប៉ុច ភេទប្រុស អាយុ២៥ឆ្នាំ រស់នៅភូមិថ្មគោល ឃុំសំបូរ ស្រុកសំរោងទង ខេត្តកំពង់ស្ពឺ ដកហូតបាន ម្សៅក្រាម ពណ៌ស សង្ស័យជាគ្រឿងញៀនចំនួន ១កញ្ចប់តូច ទូរស័ព្ទដៃ ១គ្រឿង និងម៉ូតូ ១គ្រឿង នៅចំណុចដីវាលម៉ុងចិនខាងជើងភូមិអង្គខ្មៅ ឃុំសំបូរ ស្រុកសំរោងទង ខេត្តកំពង់ស្ពឺ។
លោកវរសេនីយ៍ឯក ឃុត សុផល អធិការនគរបាលស្រុកសំរោងទង បន្ទាប់ពីសាកសួរ មុខសញ្ញាខាងលើបានឆ្លើយសារភាព គ្រឿងញៀនខាងលើជារបស់ឈ្មោះ យ័ន្ដ ហម ភេទប្រុស អាយុ ៣១ឆ្នាំ នៅភូមិស្ដុកព្រីង ឃុំសំបូរ ស្រុកសំរោងទង ខេត្តកំពង់ស្ពឺ ទើបឈានដល់ឃាត់ខ្លួនឈ្មោះ យ័ន្ដ ហម និងឈ្មោះ គង់ ទូច ភេទប្រុស អាយុ ២៦ឆ្នាំ រស់នៅភូមិថ្មគោល ឃុំសំបូរ ស្រុកសំរោងទង ខេត្តកំពង់ស្ពឺ នៅផ្ទះរបស់ឈ្មោះ (យ័ន្ត ហម) និងបានធ្វើការឆែកឆេរផ្ទះដកហូតបានខ្សៀរសម្រាប់ជក់គ្រឿងញៀន ១ ម៉ូតូចំនួន ១គ្រឿង និងដែកកេសចំនួន ៣។
លោកបន្តទៀតថា ចំណែកឈ្មោះ គង់ ទូច បានរត់ទៅលោតទម្លាក់ទឹកត្រពាំងខាងក្រោយផ្ទះហើយដកកាបូបហែកដែលដាក់គ្រឿងជាន់ពន្លិចទឹក នៅក្នុងកាបូបមានគ្រឿងញៀនចំនួន ៣កញ្ចប់តូចវាបំផ្លាញចោលនៅសល់តែថង់។ ការបង្ក្រាបនេះក៏មានការចូលរួមពីលោកមេឃុំ លោកមេភូមិផងដែរ។
លុះដល់វេលាមោង ៣និង៣០នាទីរសៀល បានឃាត់ សួន មករា ហៅ ស៊ុយ ទ្រី ភេទប្រុស អាយុ១៩ឆ្នាំ ភូមិកែវឧត្ដម ឃុំត្រពាំងគង ស្រុកសំរោងទង ដកហូតគ្រឿងញៀន៥កញ្ចប់តូចបន្ថែមទៀត។
លោកអធិការបញ្ជាក់ថា ក្នុងការបង្ក្រាបមុខសញ្ញាជួញដូរគ្រឿងញៀននេះ ឃាត់បានមនុស្សសរុប ៤នាក់ វត្ថុតាងគ្រឿងញៀន ៧កញ្ចប់តូច ម៉ូតូ១គ្រឿងទូរស័ព្ទ១គ្រឿង។ បច្ចុប្បន្នករណីខាងលើនេះ សមត្ថកិច្ចជំនាញកំពុងកសាងសំណុំរឿងចាត់ការតាមនីតិវិធី៕
Source: Kampuchea Thmey Daily
0 Comments