បន្ទាយមានជ័យ ៖ ជនសង្ស័យម្នាក់ទៀត ក្នុងចំណោមបក្ខពួកជាច្រើននាក់ ដែលបានរត់គេចពីការតាមចាប់ខ្លួនរបស់សមត្ថកិច្ច ពាក់ព័ន្ធករណីប្លន់សម្លាប់យកម៉ូតូនៅក្រុងសិរីសោភ័ណលើភេទទីបីត្រូវបានកម្លាំងនគរបាលខេត្តបន្ទាយមានជ័យ ឃាត់ខ្លួន និងបង្ហាញមុខជាសាធារណៈ កាលពីថ្ងៃទី១៨ ខែមិថុនា ឆ្នាំ២០១៨ នៅនឹងស្នងការដ្ឋាននគរបាលខេត្ត។
លោកឧត្តមសេនីយ៍ត្រី សិទ្ធិ ឡោះ ស្នងការរងកណ្ដាលព្រហ្មទណ្ឌ នៃស្នងការនគរបាលខេត្តបន្ទាយមានជ័យ បានឲ្យដឹងថា ក្រោយកំណត់មុខសញ្ញាជាបន្តបន្ទាប់ លើជនសង្ស័យ ក្នុងករណីប្លន់សម្លាប់យកម៉ូតូលើជនរងគ្រោះ ឈ្មោះ ភឿន សុមឿន ភេទប្រុស អាយុ៣៨ឆ្នាំ រស់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ កាលពីថ្ងៃទី២៨ ខែឧសភា ឆ្នាំ២០១៨ នៅចំណុចខាងក្រោយវិទ្យាល័យខ្លា កូន ជើងភ្នំខ្លាកូន ភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ និងក្រោយទទួលបានបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ទោ អាត់ខែម ស្នងការនគរបាលខេត្តបន្ទាយមានជ័យ ក្រោមការសម្របសម្រួលពីសំណាក់លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ លោកបានដឹកនាំកម្លាំងសហការជាមួយ កម្លាំងនគរបាលខេត្តឧត្តរមានជ័យ ធ្វើការស្រាវជ្រាវរហូតដល់ថ្ងៃទី១៥ ខែមិថុនា ឆ្នាំ២០១៨ បាន ឃាត់ខ្លួនជនសង្ស័យខាងលើឈ្មោះ ផាត សុគន្ធ ភេទប្រុស អាយុ២៧ឆ្នាំ នៅផ្ទះជនសង្ស័យ ឯខេត្តឧត្តរមានជ័យ។
លោកបញ្ជាក់ថា ដើមឡើយ ក្នុងសំណុំរឿងអំពើឃាតកម្មគិតទុកជាមុននេះ សមត្ថកិច្ចបានឃាត់ខ្លួន ជនសង្ស័យ២នាក់ ហើយបានសួរចម្លើយឃើញថា មានជនសង្ស័យតែ៤នាក់ប៉ុណ្ណោះ ប៉ុន្តែក្រោយចាប់ខ្លួនជនសង្ស័យឈ្មោះ ផាត សុគន្ធ រូបគេបានឆ្លើយសារភាពថា ការពិតបក្ខពួកគេមាន៦នាក់ឯណោះ ពោលគឺនៅសល់៣នាក់ទៀតមិនទាន់ចាប់ខ្លួន ហើយក៏កំពុងត្រូវបាន សមត្ថកិច្ចបន្តស្រាវជ្រាវដើម្បីឈានដល់ការចាប់ខ្លួនយកមកផ្ដន្ទាទោសតាមច្បាប់៕
Source: Kampuchea Thmey Daily
0 Comments