កងទ័ពបាននិយាយថា យន្តហោះចម្បាំងអ៊ីស្រាអែលកាលពីថ្ងៃចន្ទ បានវាយប្រហារប្រឆាំងនឹងគោលដៅយោធារបស់ក្រុមហាម៉ាសនៅភាគខាងជើងជ្រោយហ្គាហ្សាដើម្បីឆ្លើយតបទៅនឹង ខ្លែងនាំភ្លើងដែលត្រូវបានបង្ហោះចូលទៅក្នុងទឹកដីអ៊ីស្រាអែល។
យោធាបាននិយាយនៅក្នុងសេចក្តីថ្លែងការណ៍មួយថា ការវាយប្រហារនេះបានសំដៅទៅលើទីតាំងយោធាចំនួនពីររបស់ក្រុមហាម៉ាសនិងទីតាំងផលិតគ្រាប់កាំភ្លើង។ យ៉ាងណាក្តី យោធាមិនបញ្ជាក់ថាតើការវាយឆ្មក់នេះបានបណ្តាលឲ្យមានគ្រោះថ្នាក់ដល់ជីវិតដែរឬក៏អត់នោះទេ។
“ប៉េងប៉ោងភ្លើង” និងខ្លែងដែលផ្ទុកសម្ភារៈងាយឆាបឆេះបានក្លាយទៅជានិមិត្តសញ្ញានៃការតវ៉ាតាមព្រំដែនប៉ាឡេស្ទីនក្នុងរយៈពេលប៉ុន្មានខែថ្មីៗនេះ។
មន្ត្រីបាននិយាយថា កងទ័ពអ៊ីស្រាអែលកាលពីថ្ងៃសៅរ៍បានធ្វើឲ្យជនជាតិប៉ាឡេស្ទីន២នាក់រងរបួសនៅតំបន់ហ្គាហ្សាខណៈប៉ុនប៉ងបង្ហោះប៉េងប៉ោងឆ្លងដែនចូលទឹកដីអ៊ីស្រាអែល។
អ៊ីស្រាអែលបាននិយាយថា ចាប់តាំងពីបាតុកម្មធំៗនៅតាមព្រំដែនបានផ្ទុះឡើងនៅចុងខែមីនាមក អគ្គីភ័យជាង៣០០លើកបានបំផ្លិចបំផ្លាញផ្ទៃដីនិងព្រៃឈើរាប់ពាន់ហិកតា។
យោងតាមរដ្ឋមន្ត្រីការពារជាតិអ៊ីស្រាអែលលោក Avigdor Lieberman បានឲ្យដឹងថា ខ្លែងចំនួន៤០០ក្នុងចំណោម៦០០ត្រូវបានស្ទាក់ចាប់តាំងពីការចាប់ផ្តើមការតវ៉ានាពេលថ្មីៗនេះ។
ជនជាតិប៉ាឡេស្ទីនយ៉ាងតិច១៣០នាក់ត្រូវបានបាញ់សម្លាប់ដោយគ្រាប់កាំភ្លើងអ៊ីស្រាអែលនៅក្នុងកំឡុងពេលដូចគ្នានោះ។ គ្មានជនជាតិអ៊ីស្រាអែលណាម្នាក់ត្រូវបានសម្លាប់នោះទេ។
ប្រជាពលរដ្ឋប៉ាឡេស្ទីនកំពុងអំពាវនាវចង់វិលត្រឡប់ទៅផ្ទះវិញដែលក្រុមគ្រួសាររបស់ពួកគេបានភៀសខ្លួនឬត្រូវបានបង្ខំឲ្យចេញក្នុងឆ្នាំ១៩៤៨អំឡុងសង្គ្រាមជុំវិញការបង្កើតអ៊ីស្រាអែល៕ AFP
Source: Kampuchea Thmey Daily
0 Comments