ភ្នំពេញ ៖ ក្រសួងប្រៃសណីយ៍ និងទូរគមនាគមន៍ បានដាក់កំហិតឲ្យក្រុមហ៊ុនទូរស័ព្ទចល័តក្នុងស្រុកទាំងអស់ បញ្ឈប់ដំណើរការស៊ីមកាតទាំងឡាយណាដែលគ្មានអត្តសញ្ញាណប័ណ្ណអ្នកប្រើប្រាស់អោយអស់ចាប់ពីថ្ងៃទី១ខែ កក្កដាខាងមុខនេះតទៅ ដើម្បីធានាដល់ការគ្រប់គ្រងអត្តសញ្ញាណបុគ្គលអ្នក ប្រើប្រាស់ និងសន្តិសុខសង្គមជាដើម។
ជាមួយគ្នានេះដែរ ក្រសួងប្រៃសណីយ៍ និងទូរគមនាគមន៍ បានតម្រូវឲ្យក្រុមហ៊ុនទូរស័ព្ទទាំងអស់ត្រូវលុបចោលស៊ីមកាត ដែលគ្មានអត្តសញ្ញាណអ្នកប្រើប្រាស់ឲ្យអស់ បើពុំដូច្នោះទេនឹងទទួលខុសត្រូវចំពោះមុខច្បាប់។
ការពង្រឹងវិធានការណ៍បញ្ឈប់ដំណើរការស៊ីមកាត់ដែលគ្មានអត្តសញ្ញាណនេះ បន្ទាប់ពីក្រុមហ៊ុនទូរស័ព្ទចល័តមួយចំនួននៅតែបន្តល្មើសមិនអនុវត្តតាមសេចក្តីប្រកាសរបស់អន្តរក្រសួង ដូចជាការចែកស៊ីហ្វ្រីនិងគ្មានការថតចម្លងអត្តសញ្ញាណប័ណ្ណដែលនាំឲ្យមាន បញ្ហាធ្ងន់ធ្ងរដល់សន្តិសុខរបស់ប្រជាពលរដ្ឋ និងប្រទេសជាតិ។
លោក អ៊ឹង វុត្ថា អ្នកនាំពាក្យក្រសួងប្រៃសណីយ៍និងទូរគមនាគមន៍បានឲ្យដឹងថា « ចាប់ពីថ្ងៃទី១ ខែកក្កដានេះទៅក្រុមការងារចម្រុះក្រោមកិច្ចសហការរវាងមន្ត្រីជំនាញក្រសួងប្រៃសណីយ៍ និងទូរគមនាគមន៍ និងក្រសួងមហាផ្ទៃ នឹងចុះធ្វើអធិការកិច្ចដល់ក្រុមហ៊ុនប្រតិបត្តិករទូរស័ព្ទ ចល័តទាំងអស់ ដើម្បីស្រាវជ្រាវពីការអនុវត្តរបស់ក្រុមហ៊ុនទាំងនោះថា បានអនុវត្តតាមការ កំណត់របស់រាជរដ្ឋាភិបាលហើយឬនៅ បន្ទាប់ពីក្រសួងបានទុកពេលវេលាជាង៦ឆ្នាំមកហើយ ហើយគ្មានការលើកពេលទៀតនោះទេ»។
លោកបានបន្តថា ប្រសិនបើក្រុមហ៊ុនទូរស័ព្ទចល័ត ទាំងអស់នោះមិនអនុវត្តតាម ហើយបើសមត្ថកិច្ចជំនាញរកឃើញស៊ីមកាតណាមួយដែលប្រព្រឹត្តបទល្មើស គ្មានកំណត់អត្តសញ្ញាណច្បាស់លាស់ នោះ ក្រុមហ៊ុនដែលជាម្ចាស់ស៊ីម នឹងទទួលខុសត្រូវចំពោះបញ្ហានេះ ហើយបើជាបទល្មើសធ្ងន់ធ្ងរពាក់ព័ន្ធនឹងសន្តិសុខជាតិ ក្រុមហ៊ុននោះអាចប្រឈមនឹងការបិទអាជីវកម្មរួមទាំងការផាកពិន័យថែមទៀតផង។
លោកបានអះអាងទៀតថា កន្លងមក នេះ ការចែកចាយស៊ីមកាត ឬលក់ស៊ីមកាត ទៅឲ្យអតិថិជនមិនបានថតចម្លងអត្តសញ្ញាណប័ណ្ណ បានធ្វើឲ្យជនខិលខូចមួយចំនួនមានឱកាសប្រព្រឹត្តអំពើមិនគប្បីជាច្រើន ដូចជាការគំរាមកំហែងអ្នកដទៃ បោកប្រាក់លុយកាក់ជាដើម ហើយបញ្ហាទាំងនេះបានធ្វើឲ្យសមត្ថកិច្ចពិបាកកំណត់អត្តសញ្ញាណនៅពេលចុះធ្វើអន្តរាគមន៍។
ការលុបបំបាត់ស៊ីមកាតដោយគ្មានអត្តសញ្ញាណប័ណ្ណនេះ ត្រូវបានស្វាគមន៍យ៉ាងខ្លាំងពីប្រជាពលរដ្ឋនិងអង្គការសង្គមស៊ីវិល។
លោកសន ជ័យ នាយកប្រតិបត្តិសម្ព័ន្ធគណនេយ្យសង្គម បានគាំទ្រចំពោះបញ្ហាលុបបំបាត់ ស៊ីមកាត់គ្មានអត្តសញ្ញាណប័ណ្ណនេះ ប៉ុន្តែលោកចង់អោយក្រសួងសមត្ថកិច្ចជំនាញអនុវត្តវិធានការនេះអោយបានម៉ឺងម៉ាត់ជាមួយម្ចាស់ក្រុមហ៊ុនកុំអោយធ្វើអ្វីស្រេច តែចិត្តឬមិនខ្វល់ខ្វាយ ពីការណែនាំរបស់ក្រសួងមានសមត្ថកិច្ច។
លោកបញ្ជាក់ថា ប្រសិនបើរាជរដ្ឋាភិបាលគ្រប់គ្រង អត្តសញ្ញាណអ្នកប្រើប្រាស់ស៊ីមកាត់បានត្រឹមត្រូវនោះ នឹងអាចជួយកាត់បន្ថយជនឆបោក មួយចំនួនដែលកំពុងធ្វើសកម្មភាពបោកប្រាស់នៅក្នុងសង្គមដូចជាការវេរលុយ ការទិញអីវ៉ាន់ និងការគំរាមកំហែងជាដើម។
គួរបញ្ជាក់ថា បច្ចុប្បន្ននេះ នៅកម្ពុជាមានអ្នកប្រើប្រាស់ស៊ីមកាតទូរស័ព្ទចល័តរហូតដល់ជាង១៨លានកន្លះ តាមរយៈក្រុមហ៊ុនទូរស័ព្ទចល័តចំនួន៧អង្គភាព ក្នុងនោះក្រុមហ៊ុនទូរស័ព្ទចល័តដែលប្រជាពលរដ្ឋពេលនិយមប្រើប្រាស់ច្រើនជាងគេ មានក្រុមហ៊ុនទូរស័ព្ទចល័តមិត្តហ្វូន ទូរស័ព្ទចល័តមូលប៊ីធែល និងក្រុមហ៊ុនទូរស័ព្ទចល័តស្មាត៕
Source: Kampuchea Thmey Daily
0 Comments