អ្នកបោះឆ្នោតឥណ្ឌូនេស៊ីរាប់លាននាក់ បាននាំគ្នាទៅបោះឆ្នោត ក្រោមសន្តិសុខដ៏តឹងតែងនៅក្នុងការបោះឆ្នោតថ្នាក់តំបន់នៅទូទាំងប្រទេសប្រជាធិបតេយ្យធំបំផុតលំដាប់ទីបីរបស់ពិភពលោក និងជាប្រទេសកាន់សាសនាមូស្លីមធំបំផុតមួយនេះ។
ការបោះឆ្នោតសម្រាប់ចៅហ្វាយក្រុង ក្រុមប្រឹក្សា និងអភិបាលខេត្តចំនួន១៧១នេះ ទំនងជាកំណត់សំឡេងសម្រាប់ការបោះឆ្នោតសភាជាតិ និងប្រធានាធិបតីនៅក្នុងឆ្នាំ២០១៩ ខណៈមេដឹកនាំឥស្លាមមួយចំនួន កំពុងអំពាវនាវជាសាធារណៈឲ្យមានការទម្លាក់លោកប្រធានាធិបតី Joko Widodo ដែលត្រូវបានគេរំពឹងថា នឹងស្វែងរកបានអាណត្តិទីពីរ។
លោក Widodoបានសន្យាការពារប្រពៃណីពហុនិយមនិងឥស្លាមនិយមរបស់ឥណ្ឌូនេស៊ី។ប្រទេសឥណ្ឌូនេស៊ីកំពុងមានការប្រុងប្រយ័ត្នខ្ពស់បន្ទាប់ពីការវាយប្រហារអត្តឃាតជាបន្តបន្ទាប់នៅក្នុងទីក្រុង Surabaya បានសម្លាប់មនុស្សចំនួន៣០នាក់កាលពីខែមុននៅក្នុងការវាយប្រហារឥស្លាមនិយមដែលសម្លាប់មនុស្សច្រើនបំផុតក្នុងរយៈពេលជាងមួយទសវត្សរ៍មកនេះ។ប៉ូលិសជាតិនិងយោធាបានដាក់ពង្រាយបុគ្គលិករាប់ពាន់នាក់ដើម្បីធានាការបោះឆ្នោតខណៈអ្នកបោះឆ្នោតបានបោះឆ្នោតនៅក្នុងមណ្ឌលដែលបានរៀបចំនៅតាមសាលារៀន សាលាក្រុងនិងតង់នៅខាងក្រៅ។អ្នកនាំពាក្យប៉ូលិសជាតិលោក Setyo Wasistoបាននិយាយថា “យើងកំពុងធ្វើប្រតិបត្តិការប៉ូលិសជាទៀងទាត់ហើយយើងបានដាក់ពង្រាយបុគ្គលិក១៧១,០០០នាក់រួមជាមួយយោធា”។ ប្រជាជនជាង១៦០លាននាក់បានចុះឈ្មោះបោះឆ្នោតហើយជាងពាក់កណ្តាលនៃពួកគេគឺស្ថិតនៅលើកោះជ្វា។
ការស្ទាបស្ទង់មតិបានលើកឡើងថា បេក្ខជនខាងគណបក្សគាំទ្រលោកប្រធានាធិបតី Widodo នឹងឈ្នះនៅក្នុងខេត្តសំខាន់ៗដូចជាខេត្តជ្វាខាងលិចជាដើមប៉ុន្តែក្រុមអ្នកសង្កេតការណ៍នឹងពិនិត្យមើលសញ្ញានៃឥទ្ធិពលក្រុមឥស្លាមនិយមបន្ទាប់ពីការប្រកួតប្រជែងគ្នាដ៏តឹងតែងមួយសម្រាប់តំណែងអភិបាលរដ្ឋធានីហ្សាការតាកាលពីឆ្នាំមុន។
ការរាប់សន្លឹកឆ្នោតត្រូវបានគេរំពឹងថា នឹងចាប់ផ្តើមក្នុងរយៈពេលពីរបីម៉ោងបន្ទាប់ពីបិទការបោះឆ្នោត។ គណៈកម្មការជាតិរៀបចំការបោះឆ្នោតត្រូវបានគេរំពឹងថា នឹងប្រកាសលទ្ធផលជាផ្លូវការនៅថ្ងៃទី៩ខែកក្កដា៕ REUTERS
Source: Kampuchea Thmey Daily
0 Comments