បាត់ដំបង ៖ ស្ពានវត្តគរ គឺជាស្ពានមួយដែលសាងសង់ឡើង ដោយមូលនិធិ របស់រាជរដ្ឋាភិបាល នាឆ្នាំ២០០៩ ហើយក៏ជាស្ពានមួយសម្រាប់ឆ្លងកាត់ដងស្ទឹងសង្កែ ដោយបានតភ្ជាប់ពីផ្លូវជាតិលេខ ៥ ទៅផ្លូវជាតិលេខ៥៧ ដោយបែកចេញពីក្រុងបាត់ដំបង ឆ្ពោះទៅកាន់ខេត្ត ប៉ៃលិន។
កាលដើមឡើយ ប្រជាពលរដ្ឋដែលរស់នៅក្នុងតំបន់នេះ មានការលំបាកក្នុងការធ្វើដំណើរ ដើម្បីឆ្លងស្ទឹងពីម្ខាង ទៅម្ខាង ដោយសារតែគ្មានស្ពាន គឺពួកគាត់ចាំបាច់ត្រូវធ្វើដំណើរឆ្លងតាមស្ពានរថភ្លើងទាំងលំបាក បើទោះបីជាមានការធ្លាក់មនុស្សស្លាប់ជាញឹកញាប់ក៏ដោយ។
លុះក្រោយពីប្រមុខនៃរាជរដ្ឋាភិបាល បានប្រកាសអោយដំណើរការសាងសង់ស្ពានវត្តគរនេះឡើង ស្របពេលដែលផ្លូវជាតិលេខ៥៧ ក៏បានស្ថាបនាដោយក្រុមហ៊ុនចិនរួចមក ប្រជាពលរដ្ឋមានការត្រេកអរយ៉ាងខ្លាំង ក្នុងការធ្វើដំណើរឆ្លងស្ទឹងទៅ មក និងដឹកនាំទំនិញទៅកាន់តំបន់នានា ដែលស្ថិតនៅជាប់នឹងខ្សែបន្ទាត់ព្រំដែនកម្ពុជា ថៃ។
មួយរយៈក្រោយមក ក្បាលស្ពានវត្តគរត្រើយខាងកើត ដែលស្ថិតក្នុង ភូមិវត្តតាមឹម ឃុំអូរដំបង១ ស្រុកសង្កែ មានបញ្ហាយ៉ាងធ្ងន់ធ្ងរ ដោយសារតែដីមាត់ច្រាំងមានការបាក់ ស្រុតយ៉ាងលឿន រហូតបាក់ដល់ខឿនក្បាលស្ពានតែម្តង ដែលបញ្ហានេះបានធ្វើអោយអ្នករស់នៅក្នុងតំបន់នេះ ពិសេសអ្នកដែលធ្វើដំណើរមានការព្រួយបារម្ភយ៉ាងខ្លាំង ព្រោះការបាក់ ស្រុត វាបានស៊ីទៅលើដីចំណីផ្លូវបន្តិចទៅហើយ ដូច្នេះតទៅមុខវានឹងបាក់ដល់ណាទៀត ឯអ្នកធ្វើដំណើរក៏ត្រូវតែមានការប្រុងប្រយ័ត្នផងដែរ បើមិនដូច្នោះទេវាអាចប្រឈមនឹងគ្រោះថ្នាក់បាន។
បច្ចុប្បន្នគេសង្កេតឃើញថា អង្គភាពជំនាញបានយកដីមកចាក់ទាំងឡានៗដើម្បីបំពេញជង្ហុកដែលកំពុងស្រុតយ៉ាងខ្លាំងនេះ ប៉ុន្តែការចាក់ដីនេះ វាហាក់បីដូចជាកំពុងតែសង្កត់បន្ថែម ធ្វើអោយការស្រុតកាន់តែមានសន្ទុះលឿនជាងមុន ដែលមើលទៅដូចជាយកដីទៅចាក់ចោលយ៉ាងដូច្នេះដែរ។
លោក ចាន់ សំបូរ អនុប្រធានមន្ទីរសាធារណការ និងដឹកជញ្ជូន ធ្លាប់បាននិយាយថា ដីដែលមន្ទីរយកទៅចាក់នេះ គឺជាដីដែលបានមកពីការឈូសឆាយពង្រីកផ្លូវជាតិលេខ ៥តែប៉ុណ្ណោះ ដោយសារតែដីសល់មិនដឹងយកទៅណា ទើបយកមកចាក់បំពេញបែបនេះ ឯការជួសជុលឡើងវិញទាំងស្រុងនោះ មិនទាន់មានគម្រោងនៅឡើយទេ ព្រោះគ្មានលុយ។
បើយ៉ាងដូច្នេះមែន មានន័យថា អង្គភាពជំនាញមិនមានផែនការជួសជុលត្រង់ចំណុចក្បាលស្ពាននេះទាល់តែសោះ ព្រោះការចាក់ដីនេះ ដោយសារតែដីវាសល់ពីការពង្រីកផ្លូវជាតិលេខ ៥ តែប៉ុណ្ណោះ បើយ៉ាងដូច្នេះមែន តើអនាគតក្បាលស្ពានវត្តគរត្រើយខាងកើត នឹងទៅជាយ៉ាងណា ? ៕
Source: Kampuchea Thmey Daily
0 Comments