បន្ទាយមានជ័យ ៖ នៅថ្ងៃទី១៦ដល់ថ្ងៃទី១៨ ខែមិថុនា ឆ្នាំ២០១៨នេះ លោកលី សារីអភិបាលរងខេត្តបន្ទាយមានជ័យ បានដឹកនាំមន្ត្រីសាលាខេត្តមួយក្រុមជិះកង់ដើម្បីសហប្រតិបត្តិការមិត្តភាពជាមួយខេត្តបូរីរ៉ាំប្រទេសថៃ។
លោក លី សារី បានប្រាប់អ្នកយកព័ត៌មានឲ្យដឹងថា លោកបានដឹកនាំមន្ត្រីសាលាខេត្តដើម្បីទៅចូលរួមជិះកង់ជាមួយក្រុមអ្នកជិះកង់ថៃ ដែលមានសមាជិកជាង៧០នាក់ ព្រមទាំងមន្ត្រីសមត្ថកិច្ច កងកម្លាំងពាក់ព័ន្ធជាច្រើននាក់ទៀត ចូលរួមខាងភាគីថៃដឹកនាំដោយលោក តាប់ ខែម ប្រធានក្រុមអ្នកជិះកង់តំណាងឲ្យខេត្តបូរីរ៉ាំ។
លោក លី សារី បានបញ្ជាក់ឲ្យដឹងទៀតថា ខេត្តបូរីរ៉ាំជាប់និងព្រំដែនជប់គគីរស្រុកបន្ទាយអំពិលខេត្តបន្ទាយមានជ័យនិង សាយតាក់គូស្រុកបានគ្រួត ខេត្តបូរីរ៉ាំ។ លោក លី សារី បានបញ្ជាក់ឲ្យដឹងទៀតថា សកម្មភាពដូចខាងលើ ដើម្បីពង្រឹងពង្រីក ហើយអនុវត្តឲ្យស្របតាមគោលនយោបាយរបស់រាជរដ្ឋាភិបាលប្រទេសទាំង២ សម្រាប់តំបន់ព្រំដែនដោយបង្រួមទំនាស់ ពង្រីកមិត្តភាព សាមគ្គីភាព ទំនាក់ទំនង កិច្ចសហប្រតិបត្តិការនៅបណ្តោយព្រំដែន។
លោកវី ណៃតូចារ៉ើន អភិបាលស្រុកបានគ្រួត បានប្រាប់អ្នកយកព័ត៌មានឲ្យដឹងថា ក្នុងបដិសណ្ឋារកិច្ចទទួលភ្ញៀវ ប្រតិភូខ្មែរនោះ មានប្រតិភូថៃចូលរួមលោក ស៊ុងសាក់ សុឆារិធីគូនសភាខេត្តបូរីរ៉ាំ និងជាប្រធានអ្នកជិះកង់ខេត្តបូរីរ៉ាំ លោកអភិបាលរងស្រុកឡាក់ហាបសាយ លោកអភិបាលរងស្រុកណូននីងដែង។ ជិះកង់ដែលមានចំងាយផ្លូវជិត៧០គីឡូម៉ែត្រដោយឆ្លងកាត់ចម្ការកៅស៊ូនិងដំណាំចម្រុះ កាត់ភូមិស្រុក។
កម្មវិធីជិះកង់ក្រោយពីបានបញ្ចប់គណប្រតិភូទាំង២ បាននាំគ្នាទៅទស្សនាប្រាសាទមឿងតាំនិងទស្សនាប្រាសាទភ្នំរូងនៅស្រុកឈ្លើមប្រាក់កៀត។ លុះល្ងាច ប្រតិភូបានបន្តដំណើរទៅស្រុកឡាក់ហានសាយខេត្តបូរីរ៉ាំជាស្រុកដែលមានព្រំដែនជាប់នឹងភូមិសាស្ត្រថ្មពួកខេត្តបន្ទាយមានជ័យម្តុំជួរភ្នំដងរែក ត្រង់បង្គោលព្រំដែនលេខ២៧។ នៅស្រុកឡាក់ហានសាយ ក៏មានប្រកួតកីឡាបាល់ទាត់មិត្តភាពរវាងកីឡាករនៃភាគីទាំង២ផងដែរ។
លោកវីណៃ តូចារ៉ើនបានបញ្ជាក់ទៀតថា សកម្មភាពនៃការបំពេញទស្សនកិច្ច ប្រជុំនិងការជិះកង់រួមនេះ រវាងក្រុមនៃខេត្តបូរីរ៉ាំនិងក្រុមនៃខេត្តបន្ទាយមានជ័យ ជាការផ្លាស់ប្តូរប្រតិភូកម្រិតខ្ពស់រវាងខេត្តទាំង២ ក៏ដូចជាពង្រឹងពង្រីកកិច្ចទំនាក់ទំនង មិត្តភាពនិងកិច្ចសហប្រតិបត្តិការរវាងភូមិឃុំស្រុកខេត្តកម្ពុជា-ថៃដែលជាអ្នកភូមិផងរបងព្រំដែនជាប់គ្នា៕
Source: Kampuchea Thmey Daily
0 Comments