នៅថ្ងៃពុធ ប្រទេសអូស្ត្រាលី បានបើកការស៊ើបអង្កេតថ្នាក់ជាតិមួយស្តីពីការយាយីផ្លូវភេទនៅកន្លែងធ្វើការនៅក្នុងសញ្ញាមួយដែលបង្ហាញថា រដ្ឋាភិបាល នានាកំពុងចាប់ផ្ដើមឆ្លើយតបទៅនឹងបញ្ហាសកល ដែលត្រូវបានគូសបញ្ជាក់ដោយចលនា #MeToo ដ៏ធំមួយ។
ការស៊ើបអង្កេតនេះដែលត្រូវបានធ្វើឡើងដោយគណៈកម្មការសិទ្ធិមនុស្សអូស្ត្រាលីនឹងពិនិត្យលើក្របខ័ណ្ឌច្បាប់ស្តីពីការយារយីផ្លូវភេទនិងពិនិត្យមើលឡើងវិញនូវពាក្យបណ្តឹងដែលបានដាក់នៅភ្នាក់ងារប្រឆាំងការរើសអើង។ វាក៏នឹងផ្តោតលើតួនាទីនៃបច្ចេកវិទ្យានិងប្រព័ន្ធផ្សព្វផ្សាយសង្គមផងដែរ។
វាកើតឡើងចំពេលមានការកើនឡើងនៃចលនា #MeToo តាមអនឡាញប្រឆាំងនឹងការប្រព្រឹត្តិខុសឆ្គងខាងផ្លូវភេទដែលបានធ្វើឲ្យមានការភ្ញាក់ផ្អើលនៅជុំវិញពិភពលោកនិងធ្វើឲ្យជនរងគ្រោះចេញមុខរាយការណ៍អំពីការយាយីដែលពេលខ្លះដោយបុគ្គលឈានមុខនៅក្នុងឧស្សាហកម្មនិងសិល្បៈ។
រដ្ឋមន្ត្រីក្រសួងស្ត្រីលោកស្រី Kelly O'Dwyer បាននិយាយនៅក្នុងសេចក្តីថ្លែងការណ៍មួយថា “គ្មាននរណាម្នាក់ត្រូវទទួលរងនូវការយាយីផ្លូវភេទនៅក្នុងកន្លែងធ្វើការឬនៅក្នុងផ្នែកផ្សេងទៀតនៃជីវិតរបស់ពួកគេនោះទេ”។
លោកស្រី O'Dwyer បាននិយាយទៀតថា ផលវិបាកផ្ទាល់ខ្លួននិងអាជីពនៃការយារយីផ្លូវភេទនៅកន្លែងធ្វើការគឺមានសារៈសំខាន់ណាស់។ លោកស្រីបានលើកឡើងពីផលប៉ះពាល់អវិជ្ជមានដូចជាការថយចុះនៃផលិតភាព អវត្តមាននិងការចូលនិវត្តន៍មុនពេលកំណត់។
ការស៊ើបអង្កេតស្រដៀងគ្នានេះក៏កំពុងដំណើរការនៅចក្រភពអង់គ្លេសផងដែរប៉ុន្តែគណៈកម្មាធិការនេះបាននិយាយថា ខ្លួនជឿថា ការស៊ើបអង្កេតរបស់អូស្ត្រាលីគឺជាលើកដំបូងហើយដែលត្រូវបានចាប់ផ្តើមក្នុងការឆ្លើយតបទៅនឹងចលនា #MeToo និងបានបង្ហាញពី “ភាពជាអ្នកដឹកនាំអន្តរជាតិ” នៅលើបញ្ហានេះ។
យោងតាមរដ្ឋាភិបាលបានឲ្យដឹងថា ជាង២០ភាគរយនៃមនុស្សដែលមានអាយុលើសពី១៥ឆ្នាំគឺត្រូវបានគេយាយីផ្លូវភេទនៅក្នុងប្រទេសអូស្ត្រាលីខណៈដែល៦៨ភាគរយនៃករណីទាំងនោះគឺស្ថិតនៅកន្លែងធ្វើការ៕
Source: Kampuchea Thmey Daily
0 Comments