ភ្នំពេញ ៖ ផ្សារទំនើបអ៊ីអនម៉លទី២សែនសុខ ដែលស្ថិតនៅសង្កាត់ភ្នំពេញថ្មី ខណ្ឌសែនសុខរាជធានីភ្នំពេញ បានបើកសម្ពោធជាផ្លូវការហើយ កាលពីព្រឹកថ្ងៃទី២០ ខែមិថុនា ឆ្នាំ២០១៨ បន្ទាប់ពីបានបើកសាកល្បង កាលពីដើមខែនេះរួចមក។
ចូលរួមនៅក្នុងពិធីសម្ពោធនោះដែរ រួមមានតំណាងស្ថានទូតជប៉ុនប្រចាំនៅកម្ពុជា អគ្គនាយកជាន់ខ្ពស់នៃផ្សារទំនើបអ៊ីអនម៉ល ដៃគូពាណិជ្ជកម្ម និងអ្នកជំនួញល្បីឈ្មោះធំៗក្នុងប្រទេសកម្ពុជាផងដែរ។
លោក Sei ichi Chiba អគ្គនាយកផ្សារទំនើបអីអនម៉លប្រចាំទូទាំងពិភពលោក បានមានប្រសាសន៍ថា ផ្សារទំនើបអ៊ីអនម៉ល២ ខណ្ឌសែនសុខនេះ មានលក្ខណៈពិសេសបីយ៉ាង ទី១គឺផ្ដល់ជូននូវកន្លែងកម្សាន្តដ៏ថ្មី ធំជាងគេនៅក្នុងព្រះរាជាណាចក្រកម្ពុជាដែល អាចនិយាយបានថាជាកន្លែងកំសាន្ត មានលក្ខណៈពិសេសនិងនាំមកនូវភាពរីករាយខ្លាំងជូនអតិថិជន មានដូចជា សួនទឹកកម្សាន្ត ទោងយោលើអាកាសនិងកន្លែងកំសាន្តផ្សេងៗជាច្រើនទៀត។
លោកបានបន្តថា ក្រៅពីនេះមានរោងភាពយន្តម៉ាជើស៊ីលីភ្លិច ស្ទីឌីយ៉ូទូរទស្សន៍ហង្សមាសដែលជា ស្ថានីយទូរទស្សន៍ខ្នាតធំនិងថ្មីជាងគេ ដែលនឹងផ្ដល់ជូនកន្លែងកំសាន្តថ្មីៗ និងធំជាងគេសម្រាប់អតិថិជនរបស់យើង។
ទី២ផ្សារទំនើបអ៊ីអន២ គឺប្រមូលផ្ដុំទៅដោយស្ថាប័នសាធារណៈដើម្បីបម្រើសេវាកម្ម ប្រកបដោយភាពងាយស្រួល សម្រាប់អតិថិជន(មជ្ឈមណ្ឌលផ្ដល់លិខិតឆ្លងដែន មជ្ឈមណ្ឌលផ្ដល់អត្តសញ្ញាណប័ណ្ណ និងមជ្ឈមណ្ឌលផ្ដល់ប័ណ្ណបើកបរ)និងទី៣គឺផ្ដល់ជូននូវកន្លែងបង្កើតអនុស្សាវរីយ៍និងផ្លាស់ប្ដូរទំនាក់ទំនង សម្រាប់ប្រជាពលរដ្ឋក្នុងមូលដ្ឋាន។
លោក Sei ichi Chiba បានបន្ថែមទៀតថា លើសពីនេះទៀតផ្សារទំនើបអ៊ីអនម៉ល២ នេះក៏មានកន្លែង សម្រាប់រៀបចំកម្មវិធីជាច្រើនដូចជាអាចរៀបចំពិធីអាពាហ៍ពិពាហ៍ ពិធីជប់លៀងនានានិងអាចលេងកីឡានៅក្នុងសាលនេះក៏បាន ទៅតាមអតិថិជនចង់បាន។
លោកបានរំលឹកថា មុនពេលបើកសម្ពោធជាផ្លូវការផ្សារទំនើបអ៊ីអន២ នេះយើងបានបើកសាកល្បង ដោយបានស្រូបទាញអតិថិជន ចូលទស្សនា ទិញទំនិញ និងមកកម្សាន្ត បានជា៣ម៉ឺននាក់សម្រាប់ថ្ងៃធម្មតា និងប្រមាណ៨ម៉ឺននាក់ សម្រាប់ថ្ងៃឈប់សម្រាកក្នុង១ថ្ងៃ ៗ។
លោកបានឲ្យដឹងទៀតថា ការទទួលបានអតិថិជនច្រើននេះ ដោយសារផ្សារទំនើបអ៊ីអន២ បានផ្តល់ជូននូវលក្ខណៈពិសេសជាច្រើនដូចជា មានទីធ្លាធំទូលាយ ធំជាងអ៊ីអន១ជិត២ដង មានប្រមូលផ្ដុំទៅដោយកន្លែងកម្សាន្តធំជាងគេក្នុងប្រទេសកម្ពុជា។
គួរបញ្ជាក់ថា ផ្សារទំនើបអ៊ីអនទី២ ត្រូវបានសាងសង់ឡើងក្នុងឆ្នាំ២០១៦ នៅ លើផ្ទៃដីទំហំ១០ហិតា ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ខណៈក្នុង១ឆ្នាំៗ ផ្សារអ៊ីអន១ដែលស្ថិតនៅសង្កាត់ទន្លេបាសាក់អាចទាញបានអតិថិជនចូលទស្សនា ប្រមាណ១៤លាននាក់តែបើគិតចាប់តាំងពីពេលបើករហូតមកទល់បច្ចុប្បន្ន អាចទាញបានអតិថិជនជាង១៨លាននាក់៕
Source: Kampuchea Thmey Daily
0 Comments