ព្រះរាជអាជ្ញាខេត្តកំពង់ធំ គាស់ផ្នូរយកសពមកពិនិត្យបំបែកសំណុំរឿង ប្ដីសម្លាប់ប្រពន្ធ

កំពង់ធំ ៖ នេះជាលើកទី២ហើយ ដែលតុលាការខេត្តកំពង់ធំ គាស់ផ្នូរសាកសព យកមកពិនិត្យកោសល្យវិច័យ ដើម្បីបំបែកសំណុំរឿងអាថ៌កំបាំង ក្នុងករណីឃាតកម្ម គិតទុកជាមុន ជាលទ្ធផលបានពុះច្រៀកសំណុំរឿងដ៏សែនអយុត្តិធម៌ ដោយបានរកឃើញ មុខឃាតកពិតប្រាកដ ដើម្បីយកទៅផ្ដន្ទាទោសតាមច្បាប់។

ជាក់ស្ដែងនៅព្រឹកថ្ងៃទី២០ ខែមិថុនា ឆ្នាំ២០១៨ លោកអ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ អមដំណើរដោយ វរសេនីយ៍ឯក ទិត្យ សំណាង ស្នងការរងទទួលផែនព្រហ្មទណ្ឌនៃស្នងការនគរបាល ខេត្តកំពង់ធំ រួមជាមួយមន្ត្រីកោសល្យវិច័យជំនាញ, ពេទ្យយុត្តិធម៌ និងជាអាជ្ញាធរ រួមទាំងកងកម្លាំង បានចូលរួមគាស់ផ្នូរសាកសព ស្ត្រីម្នាក់ដែលមានការសង្ស័យថា ជាករណីសម្លាប់មនុស្សដោយគិតទុកជាមុន ពីសំណាក់ប្តីកំណាច ដើម្បីពិនិត្យពិនិត្យ បំបែកសំណុំរឿងអាថ៌កំបាំង រកយុត្តិធម៌ជូនជនរងគ្រោះ ស្ថិតតំបន់អូកូត ឃុំឈើទាល ស្រុកសណ្តាន់ ខេត្តកំពង់ធំ។

សមត្ថកិច្ចបានឲ្យដឹងថា ជនសង្ស័យឈ្មោះអន លិក ភេទប្រុស អាយុ៥៣ បច្ចុប្បន្នរស់នៅភូមិក្រវ៉ា ឃុំក្រវ៉ា ស្រុកបារាយណ៍ ខេត្តកំពង់ បានមកធ្វើចម្ការនៅ តំបន់អូកូត ភូមិលែង ឃុំទំរីង ស្រុកសណ្តាន់(ទីតាំងកើតហេតុ) ហើយបានស្គាល់គ្នាជាមួយជនរងគ្រោះ ឈ្មោះ ធា ភេទស្រី អាយុ ៣៨ឆ្នាំ រស់នៅ ស្រុកថ្មគោលខេត្តបាត់ដំបង តាមទូរស័ព្ទ ហើយក៏មករួមរស់ជាមួយគ្នា រយៈពេល២ឆ្នាំ មកហើយ ដោយសារតែ ជនសង្ស័យជាប្តី ភូតកុហកថា ខ្លួនជាបុរសពោះម៉ាយរស់នៅម្នាក់ឯង។ តែមុនថ្ងៃកើតហេតុ ស្រាប់តែប្រពន្ធដើមបានមកចម្ការ ក៏បែកធ្លាយថា ជារឿងភូតកុហក ទើបស្ត្រីរងគ្រោះរករឿង ឈ្លោះប្រកែកគ្នា និងបានគំរាម ថានឹងសម្លាប់ខ្លួន ដើម្បីឲ្យប៉ូលិសចាប់ជនសង្ស័យដាក់គុក។

ប្រភពបន្តថា ពេលនោះ ជនសង្ស័យមានការធុញទ្រាន់នឹងសំដី របស់ស្ត្រីរងគ្រោះជេរដដែលៗ ក៏បានយកខ្សែអង្រឹងមករឹត កស្ត្រីរងគ្រោះ ខណៈពេលកំពុងដេក ដោយធ្វើសកម្មភាពចាប់ជនរងគ្រោះផ្កាប់មុខរឹក ក ដោយយកជើង ធាក់ចង្កេះ បណ្តាលឲ្យបែកមុខបែកមាត់ប៉ះនឹងក្តារ ហើយដាច់ខ្យល់ស្លាប់ភ្លាមៗ។ បន្ទាប់មកយកខ្សែចង់ដៃ ចង់ជើង រួចយកខ្សែអង្រឹងទាក់ក អូសយកទៅកប់ នៅក្បែរខ្ទមចម្ការប្រមាណ៦០ម៉ែត្រមាត់អូ ហើយបានជីកដី កប់សាកសពជម្រៅប្រមាណ ជិតមួយម៉ែត្រ ដោយរុំនឹងភួយ ដាក់ស្បែកជើងក្នុងផ្នូរ រួចកាប់ដី អោយស្មើ រួមទាំងដាក់មែកឈើចាស់ និងកាប់បែកឈើថ្មីដាក់ពីលើ ត្រង់ចំណុចកប់សាកសពដើម្បីបំបាត់ភស្តុតាង តែឈាមស្រែកស្បែកហៅ ជនសង្ស័យត្រូវបានសមត្ថកិច្ចចាប់វាយខ្នោះ។

តាមការឲ្យដឹងពីលោក អ៊ិត សុធា ព្រះរាជអាជ្ញាអមសាលាដំបូង ខេត្តកំពង់ធំ បានឲ្យដឹងថា នៅថ្ងៃកើតហេតុ មានប្រជាពលរដ្ឋ បានឃើញសកម្មភាពមិនប្រក្រតី របស់ជនសង្ស័យ ដែលបានអូសសាកសព ពីខ្ទមមកកប់ ស្របពេលដែលគេធ្លាប់ឃើញជនរងគ្រោះដើរជារៀងរាល់ថ្ងៃ ក្រោយពីបាត់ក៏មានការសង្ស័យ ទើបរាយការណ៍មក អធិការ និងសុំយោបល់ពីលោក។ ពេលទទួលបានព័ត៌មាននេះភ្លាម លោកក៏ឲ្យសមត្ថកិច្ចចុះពិនិត្យទីតាំងសង្ស័យកប់សាកសព និងឃាត់ខ្លួនជនសង្ស័យទុកសិន ដោយជនសង្ស័យបានអះអាងថា ប្រពន្ធរបស់ខ្លួនបានចងកសម្លាប់ខ្លួន ទើបខ្លាចអ្នកភូមិមិនជឿក៏បានយកសាកសពទៅកប់។ ក្រោយពីគាស់ផ្នូរពិនិត្យរួច លទ្ធផលបានបញ្ជាក់ថា ជាករណីឃាតកម្ម ដោយគិតទុកជាមុន។

សូមបញ្ជាក់ផងដែរថា ជនរងគ្រោះ ឈ្មោះធា ពុំមានសាច់ញាតិ បងប្អូន នោះទេ ក្រោយពីគាស់សាកសព លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ បានអោយតាអាចារ្យ និងប្រជាពលរដ្ឋ រួមគ្នា យកសាកសពបូជា ដោយលោកជាអ្នកចេញថ្លៃបូជាសព និងឲ្យជំនាញស្រាវជ្រាវរកបងប្អូនមកទទួលយកឆ្អឹងសាកសពជនរងគ្រោះយកទៅធ្វើបុណ្យតាមប្រពៃណី៕