ជនសង្ស័យ២នាក់ ត្រូវបានឃាត់ខ្លួន ជាមួយ កេតាមីន ២៥០ដប និងខេទឹកកក២កូនថង់

បន្ទាយមានជ័យ ៖ លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ បានដឹកនាំកម្លាំងកងរាជអាវុធហត្ថ១ក្រុម ចុះបង្ក្រាបរថយន្ត១គ្រឿង និងធ្វើការឃាត់ខ្លួនជនសង្ស័យចំនួន២នាក់ ជាមួយវត្ថុតាងរួមមានកេតាមីនចំនួន២៥០ដប និងខេទឹកកក២កូនថង់តូចនៅវេលាម៉ោង៣និង៣០នាទី ថ្ងៃទី២០ ខែមិថុនា ឆ្នាំ២០១៨ តាមបណ្តោយផ្លូវជាតិលេខ៥ចំណុចស្ពានតាផាន់ ស្ថិតភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។

លោកវរសេនីយ៍ឯក ស ប៊ុនសឿង បានប្រាប់អ្នកយកព័ត៌មានឲ្យដឹងថា ជនសង្ស័យដែលត្រូវចាប់ខ្លួនបាន២នាក់១មានឈ្មោះ ឡាយ ទិត្យសីហា ភេទប្រុស អាយុ២៨ឆ្នាំ ម្ចាស់ថ្នាំ រស់នៅភូមិជ្រៃកោង ឃុំស្លាកែតក្រុង បាត់ដំបង ខេត្តបាត់ដំបង ២មានឈ្មោះ ឌឿម មីនា ភេទប្រុស អាយុ២២ឆ្នាំ ម្ចាស់ឡាន រស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

លោកវរសេនីយ៍ឯក ស ប៊ុនសឿង បានបញ្ជាក់ឲ្យដឹងទៀតថា ក្រោយពីបានទទួលព័ត៌មានសម្ងាត់ពីកម្លាំងអាវុធហត្ថរួចមក លោកបានដឹកនាំកម្លាំងអាវុធហត្ថសហការជាមួយកម្លាំងកងរាជអាវុធហត្ថក្រុងសិរីសោភ័ណ និងមានវិធានការពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានចុះស្រាវជ្រាវ និងដេញរថយន្តធុនកាមរី បាឡែនពណ៌ស្ករដែលពាក់ស្លាក់លេខបន្ទាយមានជ័យ2A.4432ដេញពីតាមបណ្តោយផ្លូវជាតិលេខ៥តាមបណ្តោយផ្លូវជាតលេខ៥ស្ថិតភូមិអូរស្ងួត ឃុំអូរប្រាសាទស្រុកមង្គលបូរី រហូតចាប់បាននៅចំណុចស្ពានតាផាន់ស្ថិតភូមិក្បាលស្ពានសង្កាត់ព្រះពន្លាក្រុងសិរីសោភ័ណ និងរឹបអូសវត្ថុតាងថ្នាំដបកេតាមីនចំនួន២៥០ដប ថ្នាំញៀនប្រភេទមេតំហ្វេតាមីនហៅខេទឹកកកចំនួន២កូនថង់តូចស្មើ៥.២៨ក្រាម ទូរស័ព្ទដៃ៤គ្រឿង អត្តសញ្ញាណប័ណ្ណ១សន្លឹក ប័ណ្ណបើកបរ១សន្លឹក កាតគ្រីរថយន្ត១សន្លឹក ប័ណ្ណធនាគារ១សន្លឹក។

លោកវរសេនីយ៍ឯក ស ប៊ុនសឿង បានបញ្ជាក់ឲ្យដឹងទៀយថា ក្រោយពេលឃាត់កម្លាំងកងរាជអាវុធហត្ថ បាននាំយកមកសាកសួរនៅទីបញ្ជាការកងរាជអាវុធហត្ថខេត្តបន្ទាយមានជ័យ ហើយធ្វើការឆែកឆេររថយន្តនិងធ្វើការសាកសួរចម្លើយជនសង្ស័យជំហានដំបូង ដោយជនសង្ស័យឈ្មោះ ឡាយ ទិត្យសីហា បានសារភាពថា ថ្នាំនេះគេទទួលឲ្យស្ត្រីម្នាក់ពីខេត្តបាត់ដំបងយកទៅក្រុងប៉ោយប៉ែត និងឈ្មោះ ឌឿម មិនា បានសារភាពថាខ្លួនជាអ្នករត់តាក់ស៊ីដែលឈ្មោះ ឡាយ ទិត្យសីហា ម៉ៅរថយន្ត ជិះម្នាក់ឯងពីខេត្តបាត់ដំបងទៅក្រុងប៉ោយប៉ែតតម្លៃ១២ម៉ឺនរៀលតែប៉ុណ្ណោះ គ្មានជាប់ពាក់ព័ន្ធនឹងថ្នាំនេះទេ។

លោកឧត្តមសេនីយ៍ត្រី បោន ប៊ិន បានប្រាប់អ្នកយកព័ត៌មានឲ្យដឹងថា ពេលឃាត់ខ្លួនសង្ស័យ២នាក់ត្រូវបាននាំយកមកសាកសួរ ដោយយោងតាមចម្លើយសារភាពនិងវត្ថុតាងថ្នាំញៀនត្រូវបានកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមច្បាប់ ហើយកម្លាំងជំនាញកំពុងស្រាវជ្រាវមុខសញ្ញាចាប់បក្ខពួកបន្តទៀត៕