ចូលរួមរំលែកទុក្ខផង! វីជេ អា លីយ៉ា ទទួលមរណៈភាពហើយ

ភ្នំពេញ ៖ នេះជាដំណឹងដ៏ចាប់អារម្មណ៍ និងសោកសៅ ក្រៀមក្រំបំផុតសម្រាប់អ្នកសិល្បៈរួមអាជីពខណៈដែលតារាស្រីធ្លាប់មានឈ្មោះល្បីលើវិថីសិល្បៈគឺវីជេ អា លីយ៉ា បានទទួលមរណភាពហើយក្រោយពេលធ្លាក់ខ្លួនឈឺធ្ងន់និងត្រូវបញ្ជូនចូលសង្គ្រោះនៅមន្ទីរពេទ្យកាល៉ម៉ែត កាលពីថ្មីៗកន្លងមកនេះ។

ពិធីការិនីវីជេ អា លីយ៉ា ត្រូវបានមហាជនទូទៅធ្លាប់ស្គាល់និងគាំទ្រតាមរយៈសកម្មភាពសម្តែងជាច្រើននៅលើវិស័យសិល្បៈ។ ប៉ុន្តែក្រោយមកនាងក៏បានបាត់ខ្លួនមួយរយៈពេលដោយបានចេញទៅរស់នៅជាមួយគូស្នេហ៍ឯក្រៅប្រទេស តែចំណងស្នេហាមួយនោះ បានធ្វើឲ្យតារាស្រីរូបនេះឈឺចាប់ និងរងការសម្រក់ទឹកភ្នែកស្ទើររាល់ថ្ងៃ ដោយអំណាចនៃការប្រើហិង្សាធ្ងន់ធ្ងរមកលើរូបនាង។

យ៉ាងណាមិញស្របពេលដែលពន្លឺយុត្តិធម៌មិនទាន់ត្រូវបានរងឃើញ និង ផ្តល់ជូននាងផងក៏ស្រាប់តែវីជេ អា លីយ៉ា ត្រូវធ្លាក់ខ្លួនឈឺរហូតចូលសង្គ្រោះនៅមន្ទីរពេទ្យ។ប៉ុន្តែជាលទ្ធផលដោយសារស្ថានភាពជំងឺរបស់នាងមានសភាពធ្ងន់ធ្ងរខ្លាំងនោះទីបំផុត អា លីយ៉ា ក៏ទទួលមរណភាពកាលពីវេលាម៉ោង៥និង២២នាទីព្រឹកថ្ងៃទី២៨ ខែមិថុនា ឆ្នាំ២០១៨។

បើតាមការបញ្ជាក់ពីតារាស្រីពហុជំនាញអ្នកនាង ខាត់ សុឃីម បានបង្ហោះភ្ជាប់ជាមួយរូបភាពនៃសពវីជេ អា លីយ៉ា បែបនេះថា ឯងទៅហើយហីសម្លាញ់សូមកើតជាតិណាៗសូមអោយឯងអាយុវែងក្នុងនាមយើងជាសិល្បៈដូចគ្នា សូមចូលរួមសោកស្ដាយAliya បានទទួលមរណភាពហើយ ព្រឹកមិញនៅមន្ទីរពេទ្យកាល់ម៉ែត។

តារាស្រីមានឈ្មោះល្បីអ្នកនាង ខាត់ សុឃីម ក៏បានអំពាវនាវដែរថា សពត្រូវបានតម្កល់ទុកនៅវត្តទួលអស់លោកគីឡូលេខ៦ សូមមេត្តាបងប្អូនយើងចូលរួមរំលែកទុក្ខទាំងអស់គ្នា ព្រោះគាត់គ្មានបងប្អូនទេ។ ដោយឡែកនៅលើបណ្តាញសង្គមរបស់តារាប្រុសលោក អ៊ឹម ជីវ៉ា ក៏មិនខុសគ្នានឹងតារាស្រីអ្នកនាង ខាត់ សុឃីម ឡើយគឺលោកបានបញ្ជាក់ថា សិល្បការិនីVj អា លីយ៉ា បានទទួលមរណភាពហើយនៅវេលាព្រឹកនេះ សពត្រូវតម្កល់នៅវត្តទួលអស់លោក ក្នុងសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ សូមសិល្បករសិល្បការិនីមេត្តាទៅចូលរួមបុណ្យសពនាងផង ដោយសារនាងគ្មានសាច់ញាតិឡើយ ព្រោះនាងជាក្មេងកំព្រា។
តារាប្រុសរូបសង្ហាលោក អ៊ឹម ជីវ៉ាលើកឡើងទៀតថា មួយវិញទៀតខ្ញុំសុំអោយបងប្អូនមហាជនសូមមេត្តាកុំវាតម្លៃលើនាងអី ដើម្បីអោយវិញ្ញាណក្ខន្ឋនាង បានស្ងប់ កុំអោយអភ័ព្វដូចជាតិនេះព្រោះជាតិនេះនាងលំបាកណាស់។ តាមរយៈដំណឹងមរណភាពរបស់វីជេ អា លីយ៉ា នាពេលនេះ គេសង្កេតឃើញមានមហាជនជាច្រើនបានសម្តែងការសោកស្តាយ និងចូលរួមរំលែកទុក្ខស្ទើរគ្រប់គ្នាខណៈអ្នកសិល្បៈរួមអាជីពក៏បង្ហាញអារម្មណ៍ដូចគ្នានេះដែរ។

សូមបញ្ជាក់ថា សម្រាប់ពិធីបូជាសពវីជេ អា លីយ៉ា នឹងត្រូវធ្វើឡើងនៅរសៀលថ្ងៃទី២៨ ខែមិថុនាដដែលនេះស្ថិតនៅវត្តទួលអស់លោក ក្នុងសង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។នេះបើតាមការបញ្ជាក់ពីលោក អ៊ឹម ជីវ៉ា។ ចំពោះពិធីបុណ្យសពនេះ សប្បុរសជនដែលជួយដល់បុណ្យសព អា លីយ៉ា គឺជួយចេញថ្លៃមេនបូជាសព និងថកងៃផ្កា មាន កញ្ញា ឌួង ហ្សូរីដា និងលោកស្រី ងិន ម៉ារីយ៉ា។

ចំណែកឯរោងបុណ្យ បបរបុណ្យនិងកម្មវិធីទាំងមូលគឺអ្នកនាង ចន ច័ន្ទលក្ខិណា ប្រធានសមាគមសិល្បករ និងលោកអ៊ឹម ជីវ៉ា ក្រុមប្រឹក្សាសមាគមសិល្បករខ្មែរជាអ្នករ៉ាប់រងទទួលបន្ទុកទាំងអស់ បានន័យថាបើខ្វះខាតលុយប៉ុណ្ណា សមាគមជាជួយចេញជំនួសទាំងអស់៕