ព្រឹត្តិការណ៍ប្រកួតប្រដាល់សាកលបើកទូលាយលើកទី១នៅប្រទេសថៃ ដែលកម្ពុជាបញ្ជូនកីឡាករចំនួន ៣ រូបទៅចូលរួមនោះ មានប្រទេសចំនួន៣២មកពីគ្រប់ទ្វីបទាំងអស់ចូលរួម។
នេះជាការប្រកួតក្នុងក្របខ័ណ្ឌប្រដាល់សាកលស្ម័គ្រចិត្តក្រោមការគ្រប់គ្រងរបស់សមាគមអន្តរជាតិប្រដាល់សាកលស្ម័គ្រចិត្តដែលហៅថាAIBA(Association International Boxing Amateur) ។លោកវ៉ែន សុផលជាប្រធានប្រតិភូ និង ជាគ្រូបង្វឹកជម្រើសជាតិបានរាយការណ៍ពីទីក្រុងបាងកកមកថា កីឡាករកម្ពុជា ៣រូប រួមជាមួយរូបលោកនិងគ្រូបង្វឹកជនជាតិគុយបាបានធ្វើដំណើរតាមរថយន្ដដល់ទីក្រុងបាងកកនៅល្ងាចថ្ងៃទី២៧ ខែមិថុនា ថ្ងៃទី២៨នឹងធ្វើការប្រជុំបច្ចេកទេស ថ្ងៃទី២៩ ខែមិថុនាថ្លឹងទម្ងន់ និងការប្រកួតចាប់ផ្ដើមពីថ្ងៃទី៣០ ខែមិថុនាដល់ថ្ងៃទី៦ ខែកក្កដា។
នេះជាលើកទី១ហើយដែលប្រទេសថៃរៀបចំព្រឹត្តិការណ៍ប្រកួតប្រដាល់សាកលកម្រិតអន្តរជាតិបែបនេះ ហើយការប្រកួតនេះគ្រប់គ្រងដោយសមាគមប្រដាល់ស្ម័គ្រចិត្តអន្តរជាតិ(AIBA)និងទទួលខុសត្រូវដោយសមាគមប្រដាល់សាកលស្ម័គ្រចិត្តថៃ។
ព្រឹត្តិការណ៍នេះ មានឈ្មោះថានេះជាការប្រកួតដ៏ធំមួយដែលកម្ពុជានឹងលំបាកក្នុងការស្វែងរកមេដាយ។
នៅក្នុងការប្រកួតនេះ បើនរណាឡើងដល់វគ្គ១៦នាក់ចុងក្រោយមួយប្រកួតបានរង្វាន់១០០ដុល្លារ មកដល់វគ្គ៨នាក់ចុងក្រោយមួយប្រកួតបាន២០០ដុល្លារ វគ្គ៤នាក់ចុងក្រោយមួយប្រកួត៣០០ដុល្លារ និងវគ្គផ្ដាច់ព្រ័ត្របាន៥០០ដុល្លារ។
ក្នុងព្រឹត្តិការណ៍នេះ បើប្រទេសណាដណ្ដើមបានមេដាយឈរនៅលំដាប់លេខ១បានរង្វាន់១០.០០០ដុល្លារ, លេខ២បាន៧.៥០០ដុល្លារ និងលេខ៣បាន៥.០០០ដុល្លារ។
សូមបញ្ជាក់ថា កីឡាករកម្ពុជា៣រូបដែលទៅចូលរួមប្រកួតនោះមានឡនសៀមជាកីឡាករជម្រើសជាតិមកពីក្លិបមេសរថ្ងកខេត្តស្វាយរៀង ដែលប្រកួតក្នុងប្រភេទទម្ងន់៤៩គីឡូក្រាម។ កីឡាករ ណាត សៀកនិន ហៅពេជ្រ ម្ទេសខ្មាំង ដែលជាកីឡាករជម្រើសជាតិមកពីក្លិបអារុណរះកីឡាគេប្រកួតក្នុងប្រភេទទម្ងន់៥៦គីឡូក្រាម និង កីឡាករ ស៊ឹម វិសិដ្ឋ មកពីក្លិបតាឡីដំរីមានរិទ្ធដែលប្រកួតក្នុងប្រភេទទម្ងន់៦០គីឡូក្រាម៕
Source: Kampuchea Thmey Daily
0 Comments