ក្លិបបាល់ទាត់អង្គរថាយហ្គឺរ សមាជិកពានរង្វាន់លីគកំពូលកម្ពុជា Metfone Cambodian League 2018 បានប្រកាសផ្តាច់កិច្ចសន្យាជាមួយកីឡាករបរទេសរបស់ខ្លួនម្នាក់ តែសម្រេចបន្ថែមកីឡាករយុវជនម្ចាស់ស្រុកលើទឹកដីខេត្តសៀមរាប ម្នាក់វិញ កាលពីពេលថ្មីៗ ដើម្បីត្រៀមខ្លួននៅជើងទី២រដូវកាលឆ្នាំ២០១៨ នេះ។
យោងតាមសេចក្តីជូនដំណឹងនៅលើទំព័រហ្វេសប៊ុកផ្លូវការ របស់ក្លិបកាលពីពេលថ្មី បានបញ្ជាក់ថា ខ្សែប្រយុទ្ធជនជាតិកាម៉េរ៉ូនBaldwin Ngwa ត្រូវបានក្លិបបញ្ចប់កិច្ចសន្យាហើយ។ កីឡាកររូបនេះធ្លាប់ចូលរួមជាមួយក្រុមភ្នំពេញក្រោន, អាស៊ីអឺរ៉ុប, ណាហ្គាវើល និងអង្គរថាយហ្គឺរ។ ចំណែកកីឡាករចំណូលថ្មីវិញមានឈ្មោះថា ដោ រ៉ូហ្សាន់ កើតនៅថ្ងៃទី១៨ មីនា ឆ្នាំ២០០១ នៅភូមិគ្រួស, ឃុំ ស្វាយដង្គំ, ស្រុក សៀមរាប, ខេត្ត សៀមរាប។ រូបគេលេងជាខ្សែប្រយុទ្ធ។ យុវជនរូបនេះ ធា្លប់លេងនៅក្លិបយុវជនគីរីដងរែក (តាំងពីឆ្នាំ ២០១៥) និងជម្រើសខេត្តសៀមរាប (ធ្លាប់បង្ហាញខ្លួនក្នុងពានរង្វាន់អគ្គមហាសេនាបតីតេជោ ហ៊ុនសែន ២០១៨ និង កីឡាជាតិលើកទី២)។
ក្រុមអង្គរថាយហ្គឺរ កាលពីដើមឆ្នាំ២០១៨ បានចុះហត្ថលេខានាំចូលកីឡាករវ័យ១៤ឆ្នាំចំនួន២រូបជាខ្សែការពារក្នុងនោះមានកីឡាករ សុវណ្ណ ដូណា និង ចិន ណារក្ស រយៈពេល៣ឆ្នាំ ខណៈក្លិបធ្លាប់បានផ្ដល់កិច្ចសន្យាអាជីពរយៈពេល១០ឆ្នាំដល់កីឡាករវ័យ១៤ឆ្នាំ ភាព ចាន់ដេវីត កាលពីឆ្នាំមុន។ កីឡាករទាំង៣ជាយុវជននៅខេត្តសៀមរាប ដែលជាទឹកដីរបស់ក្រុមអង្គរថាយហ្គឺរ ផ្ទាល់តែម្តង។ កន្លងមកក្លិបក៏ធ្លាប់បានចុះកិច្ចសន្យាជាមួយកីឡាករជើងចាស់ចំនួន៧នាក់រួមមកក្នុងក្រុមធំដូចជាកីឡាករ តាំង ពិសី, ហម បញ្ញា, ឆុង ប៊ុណ្ណាត, ថន សីហា, ពេជ្រ សុវណ្ណខេមរិន្ទ, ស៊ឹង ណារិទ្ធ និង គង់ ឧត្ដម ជាដើម។
ក្រុមអង្គរថាយហ្គឺរ បានប្តូរឈ្មោះមកពីក្រុមត្រាយអាស៊ីភ្នំពេញ កាលពីចុងរដូវកាល២០១៤ ហើយនៅរដូវកាល២០១៥ គឺជាកំណត់ត្រាល្អរបស់ក្លិបពោលគឺ អាចឡើងដល់វគ្គ៤ក្រុមចុងក្រោយទាំងពានរង្វាន់សម្តេច ហ៊ុន សែន និងពានរង្វាន់មិត្តហ្វូនខេមបូឌានលីក ក្រោយឈរចំណាត់ថ្នាក់លេខ៣ដូចគ្នា។ ក្រុមនេះ ទទួលបានសិទ្ធិប្រើប្រាស់កីឡដ្ឋានខេត្តសៀមរាប ពីក្រសួងអប់រំយុវជននិងកីឡា កាលពីរដូវកាល ឆ្នាំ២០១៧ កន្លងមក ធ្វើជាទឹកដី របស់ខ្លួនរាល់ការប្រកួតនានា៕
Source: Kampuchea Thmey Daily
0 Comments