បឹងកេត វ៉ា​ដាច់​ណាហ្គា​វើ​ល ឡើងឈរ​កំពូល​តារាង​លី​គ​កំពូល​កម្ពុជា វិញ​ត្រឹម​សប្ដាហ៍​ទី​១១

ក្រុមបាល់ទាត់​បឹងកេត​អែ​ហ្វ​ស៊ី បាន​វ៉ា​ដាច់​ក្រុម​ណាហ្គា​វើ​ល នៅ​សប្ដាហ៍​ទី​១១ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018) ក្រោម​ការរៀបចំ​ពី​សំណាក់​គណៈកម្មការ​ប្រកួត​បាល់ទាត់​ជាតិ (CNCC) សេនាធិការ​របស់​សហ​ព័ន្ធ​កីឡាបាល់ទាត់​កម្ពុជា ក្រោយ​បញ្ចប់​ការប្រកួត​កាលពី​ចុង​សប្ដាហ៍​ថ្មីៗ​នេះ​។

ជា​លទ្ធផល​នៃ​ការប្រកួត​ប្រចាំ​សប្ដាហ៍​ទី​១១ មាននៅ​ថ្ងៃ​សៅរ៍ ទី​២៣ ខែមិថុនា ឆ្នាំ​២០១៨ ក្រុមព្រះ​ខ័ន​រាជ​ស្វាយរៀង ឈ្នះ​ក្រុម​វេ​ស្ទើ​ន​ភ្នំពេញ លើ​ទីលាន​កីឡដ្ឋាន​ខេត្តស្វាយរៀង ខណៈ​ក្រុម​សូល​ទី​ឡូ​អង្គរ ចាញ់​ក្រុម​វិសាខា ២​ទល់​០ លើ​ទីលាន​ពហុ​កីឡដ្ឋាន​ជាតិ និង​ក្រុម​អង្គ​រថា​យ​ហ្គឺ​រ ចាញ់​ក្រុម​ភ្នំពេញ​ក្រោ​ន ៥​ទល់​២ លើ​ទីលាន​កីឡដ្ឋាន​ខេត្តសៀមរាប​។ ចំណែក​នៅ​ថ្ងៃអាទិត្យ ទី​២៤ ខែមិថុនា វិញ​ក្រុម​អគ្គស្នងការដ្ឋាន​នគរ​បាល​ជាតិ ចាញ់​ក្រុម​ក្រសួងការពារជាតិ ៤​ទល់​០ លើ​ទីលាន​ពហុ​កីឡដ្ឋាន​ជាតិ ហើយ​ក្រុម​អគ្គីសនី​កម្ពុជា ចាញ់​ក្រុម​អាស៊ី​អឺរ៉ុប ២​ទល់​០ លើ​ទីលាន​អគ្គីសនី​កម្ពុជា និង​ក្រុម​បឹងកេត ឈ្នះ​ណាហ្គា​វើ​ល ៣​ទល់​២ លើ​ទីលាន​ពហុ​កីឡដ្ឋាន​ជាតិ​។



ងាក​មក​មើល​ចំណាត់ថ្នាក់​ត្រឹម​សប្ដាហ៍​ទី​១១ នៃ​ពានរង្វាន់​លី​គ​កំពូល​កម្ពុជា​នេះ​វិញ ឃើញថា​ក្រុម​បឹងកេត​អែ​ហ្វ​ស៊ី ឡើងឈរ​កំពូល​តារាង មាន​២៧​ពិន្ទុ តាម​ពីក្រោយ​ដោយ​ក្រុម​លេខ​២ ណាហ្គា​វើ​ល មាន​២៥​ពិន្ទុ​។ ក្រុម​លេខ​៣​គឺ​វិសាខា មាន​២៣​ពិន្ទុ ហើយ​ក្រុម​លេខ​៤​ក្រសួងការពារជាតិ មាន​២១​ពិ​ន្ទ ខណៈ​ក្រុម​លេខ​៥ អាស៊ី​អឺរ៉ុប មាន​១៨​ពិន្ទុ ដូចគ្នា​នឹង​ក្រុម​លេខ​៦ ភ្នំពេញ​ក្រោ​ន តែ​ខុស​ត្រង់ Head to Head និង​ក្រុម​លេខ​៧ អគ្គស្នងការដ្ឋាន​នគរបាល​ជាតិ មាន​១៧​ពិន្ទុ​។ ក្រុម​លេខ​៨ ព្រះខ័ន​រាជ​ស្វាយរៀង មាន​១៤​ពិន្ទុ លើ​ក្រុម​លេខ​៩ អង្គ​រថា​យ​ហ្គឺ​រ មាន​១១​ពិន្ទុ ហើយ​ក្រុម​លេខ​១០ សូល​ទី​ឡូ​អង្គរ មាន​៨​ពិន្ទុ ស្រប​ពេល​ក្រុម​អគ្គីសនី​កម្ពុជា ឈរ​លេខ​១១ មាន​៥​ពិន្ទុ និង​ក្រុម​វេ​ស្ទើ​ន​ភ្នំពេញ ឈរ​លេខ​១២ មិនទាន់មាន​ពិន្ទុ​។



ពានរង្វាន់​លី​គ​កំពូល​កម្ពុជា រដូវ​កាល​នេះ​នឹង​ប្រើប្រាស់​រូបមន្ត​ប្រកួត​សន្សំ​ពិន្ទុ​វិលជុំ​ចំនួន​២​ជើងមាន​២២​សប្ដាហ៍ ដើម្បី​ស្វែងរក​ក្រុម​ខ្លាំង​ដែល​មាន​ពិន្ទុ​ច្រើន​ជាង​គេ​ដណ្តើម​ជើងឯក​ប្រចាំឆ្នាំ​។ ការប្រកួត​ចាប់ផ្តើម​ពីថ្ងៃ​ទី​៣​ខែមីនា ដល់​ថ្ងៃទី​៣០​ ខែកញ្ញា ឆ្នាំ​២០១៨ ដែល​មាន​សមាជិក​ចំនួន​១២​ក្រុម​។ ក្រុម​ជើងឯក​នឹង​ទទួល​បាន​កៅអី​ទៅ​ចូលរួម​ប្រកួត​ក្នុង​ពានរង្វាន់ AFC Cup 2019, ពានរង្វាន់ Mekong Club Championship និង​ពានរង្វាន់ Singapore Cup ជាដើម​។

តាម​គម្រោង​បណ្តោះអាសន្ន​សប្តាហ៍​ទី​១២ ដែល​ជា​ជើង​ទី​២ នឹង​ធ្វើ​ឡើង​នៅ​ចុង​សប្ដាហ៍​នេះ​ជា​បន្ត​ដោយ​នៅ​ថ្ងៃ​សៅរ៍ ទី​៣០ ខែមិថុនា ឆ្នាំ​២០១៨ ក្រុម​សូល​ទី​ឡូ​អង្គរ ប៉ះ​ភ្នំពេញ​ក្រោ​ន នៅវេលា​ម៉ោង​៣និង៣០​នាទី​រសៀល លើ​ទីលាន​កីឡដ្ឋាន​ខេត្តសៀមរាប ហើយ​ក្រុម​បឹងកេត ប៉ះ​អាស៊ី​អឺរ៉ុប នៅវេលា​ម៉ោង​៣និង៣០​នាទី​ល្ងាច ​លើ​ទីលាន​កីឡដ្ឋាន​ខេត្តកណ្ដាល​។



ចំណែក​នៅ​ថ្ងៃអាទិត្យ ទី​១ ខែកក្កដា ឆ្នាំ​២០១៨ ក្រុម​អគ្គីសនី​កម្ពុជា ប៉ះ​ក្រុម​វិសាខា នៅវេលា​ម៉ោង​៣​រសៀល​លើ​ទីលាន​កីឡដ្ឋាន​អគ្គីសនី​កម្ពុជា ហើយ​នៅវេលា​ម៉ោង​ដំណាលគ្នា​ក្រុម​វេ​ស្ទើ​ន​ភ្នំពេញ ជួប​ក្រុម​អគ្គស្នងការដ្ឋាន​នគរ​បាល​ជាតិ លើ​ទីលាន​កីឡដ្ឋាន​វេ​ស្ទើ​ន និង​ក្រុម​ក្រសួងការពារជាតិ ទទួល​ក្រុម​អង្គ​រថា​យ​ហ្គឺ​រ នៅ​វេលា​ម៉ោង​៦​ល្ងាចលើ​ទីលាន​ កីឡដ្ឋាន​ស្តាត​ចាស់៕

   

Source: Kampuchea Thmey Daily