ភ្នំពេញ ៖ រថយន្តកុងតឺន័រ ខណៈដល់រង្វង់មូលបើកបួងចង្កូតបត់ទៅផ្លូវត្រង់ហើបជើងមុខ បណ្ដាលឲ្យក្រឡាប់ផ្ងារជើងខូចខាតរថយន្តយ៉ាងដំណំ រីឯអ្នកបើកបររងរបួសស្រាលកាលពីវេលាម៉ោង៨និង១៨នាទីព្រឹក ថ្ងៃទី២៥ ខែមិថុនា ឆ្នាំ២០១៨ ស្ថិតតាមបណ្ដោយវិថីឈ្នះឈ្នះចំណុចរង្វង់មូលទី១ភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
រថយន្តកុងតឺន័រខាងលើ ពណ៌បៃតងលាយស្លាទុំ ពាក់ស្លាកលេខ ភ្នំពេញ3C-7340 បើកដោយឈ្មោះសៅ ពិសិទ្ធ ភេទប្រុស អាយុ៣១ឆ្នាំ មានទីលំនៅភូមិក្រាំងស្វាយ សង្កាត់ព្រែកកំពិស ខណ្ឌដង្កោ រាជធានីភ្នំពេញ។
ប្រភពព័ត៌មានពីអ្នកបើករថយន្តខាងលើ បានឲ្យដឹងថា នៅមុនពេលកើតហេតុរូបគេបានបើករថយន្តតាមផ្លូវខាងលើទិសដៅពីលិចទៅកើត ខណៈមកដល់រង្វង់មូល ដែលជាចំណុចកើតហេតុបានបួងចង្កូតបត់មកឆ្វេងរកផ្លូវត្រង់ ខណៈនោះរថយន្តបានហើបជើងមុខក៏ក្រឡាប់តែម្តង។
ប្រភពបន្តថា ក្នុងករណីនេះមិនមានគ្រោះថ្នាក់ដល់អ្នកដទៃទេមានតែរូបលោកម្នាក់របួសស្រាលជើងឆ្វេង។ ក្រោយកើតហេតុ ភាគីរថយន្តបានទាក់ទងរថយន្តស្ទូចយកទៅជួសជុលដោយខ្លួនឯង៕
Source: Kampuchea Thmey Daily
0 Comments