កំពង់ឆ្នាំង ៖ អ្នកគ្រូបង្រៀនសាលាមតេយ្យ ម្នាក់ បានចងកធ្វើអត្តឃាត ស្លាប់នៅក្នុងផ្ទះបាយ ដោយសារតែមានវិបត្តិនៅក្នុងគ្រួសារដោះស្រាយមិនចេញ និងធ្វើអោយមានការភ្ញាក់ផ្អើលនៅវេលាម៉ោង៦ព្រឹកថ្ងៃទី០២ ខែមិថុនា ឆ្នាំ២០១៨ នៅភូមិក្នុងស្រងាំទេ ឃុំប្រស្នឹប ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលមូលដ្ឋានបានឲ្យដឹងថា ៖ អ្នកគ្រូបង្រៀនខាងលើមានឈ្មោះ ភួន ភា អាយុ៤៧ ឆ្នាំជាគ្រូបង្រៀនសាលាមតេយ្យ មាន ប្ដីឈ្មោះ សឹង ប៉ាញ អាយុ៥៨ឆ្នាំ មានមុខរបរជាគ្រូបង្រៀនទាំង២នាក់ប្តីនិងប្រពន្ធ មានកូន២នាក់ រស់នៅភូមិឃុំកើតហេតុខាងលើ។
សមត្ថកិច្ចបានឲ្យដឹងថា ៖ គ្រួសារប្ដីប្រពន្ធទាំងពីរនាក់ខាងលើរស់នៅ មិនចុះសម្រុងគ្នាទេ គឺបានបែកគ្នារយៈពេលជាង២ឆ្នាំមកហើយ ដោយប្ដីចុះពីលើផ្ទះធំទៅនៅផ្ទះតូចដែលចម្ងាយ១០ម៉ែត្រពីគ្នា ចំណែកប្រពន្ធរស់នៅលើផ្ទះធំជាមួយកូនៗ។ នៅយប់ថ្ងៃទី០១ ខែមិថុនា មុនពេលកើតហេតុ ប្តីប្រពន្ធបានឈ្លោះគ្នាជាខ្លាំង ហើយនៅយប់នោះ ប្តីបានយកកូនមកដេកនៅផ្ទះតូចជាមួយខ្លួន។ លុះព្រឹកឡើងស្រាប់តែបានឃើញស្ត្រីជាប្រពន្ធ ចងកនៅនឹងផ្ទះបាយស្លាប់បាត់ទៅហើយ។ បន្ទាប់មកបុរសជាប្តីក៏បានរាយការណ៍ ប្រាប់សមត្ថកិច្ច ចុះទៅពិនិត្យកន្លែងកើតហេតុ។ ក្នុងពេលនោះសមត្ថកិច្ច បានធ្វើកោសល្យវិច័យយ៉ាងយកចិត្តទុកដាក់ដោយខ្លាចមានអំពើឃាតកម្មកើតឡើង។
ក្រោយពីការពិនិត្យសពយ៉ាងយកចិត្តទុកដាក់ សមត្ថកិច្ចបានសន្និដ្ឋានអោយដឹងថា ស្ត្រីជាគ្រូបង្រៀន ខាងលើនេះ ពិតបានចងកសម្លាប់ខ្លួនឯងពិតប្រាកដមែន នៅក្នុងពេលនោះដែរសមត្ថកិច្ចបានរកឃើញសំបុត្រមួយច្បាប់មាន៣សន្លឹក ដែលជាបណ្ដាំរបស់ស្ត្រីធ្វើអត្តឃាត ដោយមានខ្លឹមសារសង្ខេបគឺប្តឹងទៅស្នងការនគរបាលខេត្ត សូមជួយពិចារណារកយុត្តិធម៌ ពីការធ្វើបាបរបស់ប្តី និងមានទាំងថតសំឡេង ដាក់ក្នុងទូរស័ព្ទដៃ អំពីការឈ្លោះទាស់ទែងគ្នា កាលពីយប់ថ្ងៃទី០១ ខែមិថុនា ទៀតផង។ នៅក្នុង ខ្លឹមសារសំបុត្រដែល ក៏បានផ្តាំ អោយបងស្រីលក់ផ្ទះ លក់ដីភូមិយកលុយសងគេ និងមិនចាំបាច់ធ្វើបុណ្យអោយខ្លួនឡើយ។
តាមការបញ្ជាក់របស់ឈ្មោះ សឹង ប៉ាញ ដែលជាប្ដីស្ត្រីខាងលើបានអោយដឹងថា ៖ ប្រពន្ធគាត់បានជំពាក់លុយគេច្រើនណាស់ដោយសាររឿងចាញ់ល្បែង តែទោះបីបែបនេះក្តីមនុស្សបានស្លាប់បាត់ទៅហើយ ដោយគេមិនដឹងថា គាត់ពិតជាជំពាក់ព្រោះរឿងល្បែងឬយ៉ាងណានោះទេ ដែលរឿងនេះជាភារកិច្ចរបស់សមត្ថកិច្ចជាអ្នកស្រាវជ្រាវ ដើម្បីអោយដឹងពីមូលហេតុនៃការធ្វើអត្តឃាតខាងលើនេះ៕
Source: Kampuchea Thmey Daily
0 Comments