កំពង់ឆ្នាំង ៖ កុមារីអាយុ១០ឆ្នាំម្នាក់ បានលង់ទឹកស្រះស្លាប់ ខណៈនាងចុះងូតលេងក្នុងទឹកស្រះ នៅក្នុងសាលាវិទ្យាល័យហ៊ុនសែន កំពង់ត្រឡាច ក្នុងឃុំអូឬស្សី ឃុំកំពង់ត្រឡាច ស្រុកកំពង់ត្រឡាច ដែលហេតុការណ៍នេះបានកើតឡើងនៅម៉ោង១០ និង ២០ នាទីព្រឹកថ្ងៃទី០២ ខែមិថុនា ឆ្នាំ២០១៨។
សមត្ថកិច្ចនគរបាលមូលដ្ឋាន បានឲ្យដឹងថាៈ កុមារីរងគ្រោះមានឈ្មោះ សុខ ស៊ីណាវី អាយុ១០ ឆ្នាំមានឪពុកឈ្មោះ សុខ ចំរើន ម្ដាយឈ្មោះ កែវ សុខា មានទីលំនៅភូមិសាលាលេខប្រាំ ឃុំអូរឫស្សី ស្រុកកំពង់ត្រឡាច មានមុខរបរលក់ដូរ នៅក្នុងសាលាវិទ្យាល័យកើតហេតុខាងលើ។ មុនពេលកើតហេតុកុមារីរងគ្រោះបានទៅលេងស្រះទឹក ក្នុងវិទ្យាល័យខាងលើ ជាមួយក្មេងៗ មួយចំនួនទៀត ក្នុងពេលនោះក្មេងស្រីរងគ្រោះបានរអិលធ្លាក់ចូលទឹកជ្រៅបណ្ដាលឲ្យលង់ ពេលនោះក្មេងៗ ដែលលេងទឹកជាមួយ ក៏បានរត់ទៅ ហៅ ឪពុកម្ដាយដែលកំពុងទៅលក់ដូរ នៅក្នុងវិទ្យាល័យ តែទម្រាំមនុស្សចាស់ទៅដល់ ហើយចុះទៅរាវ កឃើញកុមារីរងគ្រោះនោះបានលង់ទឹកស្លាប់បាត់ហើយ។
ក្នុងហេតុការណ៍ដ៏រន្ធត់នេះ ឪពុកម្ដាយមិនអស់ចិត្ត មកក៏បាននាំកុមារីរងគ្រោះ ជាមួយសមត្ថកិច្ច ទៅសង្គ្រោះ នៅមណ្ឌលសុខភាពស្រុកកំពង់ត្រឡាច តែត្រូវគ្រូពេទ្យប្រាប់ថា នាងបានស្លាប់ទៅហើយ រួចបានប្រគល់សពកុមារីរងគ្រោះ ទៅក្រុមគ្រួសារ យកទៅធ្វើបុណ្យតាមប្រពៃណី ក្នុងក្តីសោកស្តាយយ៉ាងខ្លាំង៕
Source: Kampuchea Thmey Daily
0 Comments