ភ្នំពេញ ៖ អនុប្រធានគណបក្សប្រជាជនកម្ពុជារាជធានីភ្នំពេញ លោកឃួង ស្រេង បានមានប្រសាសន៍ថា គណបក្សប្រជាជនកម្ពុជា បើហ៊ានសន្យាហើយ គឺត្រូវតែធ្វើអោយបាន មិនមែនសន្យាខ្យល់នោះទេ។
ការបញ្ជាក់បែបនេះរបស់លោកឃួង ស្រេងបានធ្វើឡើងកាលពីព្រឹកថ្ងៃទី៣មិថុនា ខណៈដែលលោកដឹកនាំក្រុមការងារ ទៅជួបសំណេះសំណាល សួរសុខទុក្ខនិងស្តាប់សំណូមពរប្រជាពលរដ្ឋក្នុងបុរីសន្តិភាព២ក្នុងសង្កាត់ចោមចៅទី២ ខណ្ឌពោធិ៍សែនជ័យ។
លោកឃួង ស្រេង បានបន្តអោយដឹងថា នៅក្នុងបុរីសន្តិភាព២ក្នុងសង្កាត់ចោមចៅទី២ ខណ្ឌពោធិ៍សែនជ័យនេះ គណបក្សប្រជាជនកម្ពុជា បានកសាងសមិទ្ធផលជាច្រើន ដើម្បីបំពេញទៅតាមតម្រូវការជាមូលដ្ឋានរបស់បងប្អូនប្រជាពលរដ្ឋនៅទីនេះដែលពីមុន តំបន់នេះគ្មានអ្វីទាំងអស់ តែមកដល់ឥឡូវនេះបងប្អូនមានផ្ទះសម្បែងរស់នៅសមរម្យ,មានទីផ្សារ,មានប្រព័ន្ធទឹក,ភ្លើងរដ្ឋប្រើប្រាស់ មានសេវារថយន្តក្រុងនិងសេវាសុខភាពជាដើម។
នេះមិនមែនជាលើកដំបូងទេដែលលោកបានអញ្ជើញចុះមកជួបសំណេះសំណាលនិងសួរ សុខទុក្ខបងប្អូនប្រជាពលរដ្ឋនៅសហគមន៍បុរីសន្តិភាព២ និងបានពិនិត្យស្ថានភាពរស់នៅជាក់ស្តែងរបស់បងប្អូននៅសហគមនេះ ដែលកំពុងមានការរីកចម្រើនគួរកត់សម្គាល់ទាំងសំណង់លំនៅឋាន,ហេដ្ឋារចនាសម្ព័ន្ធក៏ដូចជាការរីកចម្រើនលើផ្នែកជីវភាពរស់នៅរបស់បងប្អូនផងដែរ។
លោកឃួង ស្រេងបានជំរុញឲ្យមន្ត្រីជំនាញខិតខំធ្វើយ៉ាងណាបង្កើតប៉ុស្តិ៍សុខភាពមួយឲ្យបាននៅទីនេះដោយឲ្យសហគមន៍ផ្តល់ផ្ទះ២ល្វែងសម្រាប់បង្កើតប៉ុស្ដិ៍សុខភាពនេះនៅចំកណ្តាលសហគមន៍ដើម្បីងាយស្រួលដល់ប្រជាពលរដ្ឋយើងមកទទួលសេវាសុខភាព។
លោកក៏បានណែនាំឲ្យមានការចាក់សាប និងដាក់ប្រព័ន្ធលូនៅចំណុចចំណតរថយន្តក្រុងឲ្យបានល្អប្រសើរផងដែរ។ ជាមួយគ្នានេះ រដ្ឋបាលរាជធានីភ្នំពេញ ក៏ដូចអាជ្ញាធរដែនដី នឹងបន្តរៀបចំកែលម្អផ្លូវបេតុង និងដាក់ប្រព័ន្ធលូក្នុងសហគមន៍បន្តទៀតនៅក្រោយការបោះឆ្នោត និងក្រោយពីទទួលបានទំនុកចិត្តពីប្រជាពលរដ្ឋ ដែលនេះគឺជាការសន្យាធ្វើមិនមែនសន្យាខ្យល់នោះទេ។សហគមន៍សន្តិភាព២ មានការអភិវឌ្ឍមិនចាញ់សហគមន៍ដទៃទៀតក្នុងរាជធានីភ្នំពេញនោះឡើយក្រោមការយកចិត្តទុកដាក់ពីអាជ្ញាធរដែនដីគ្រប់លំដាប់ថ្នាក់ ,ការយកចិត្តទុកដាក់ពីរដ្ឋបាលរាជធានីភ្នំពេញដែលតែងតែចុះជាប់ដើម្បីបានដឹងពីសុខទុក្ខរបស់បងប្អូន ជាពិសេសទទួលបានការណែនាំ និងការគិតគូរដ៏ខ្ពង់ខ្ពស់ពីសម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជាដែលតែងផ្សារភ្ជាប់សុខទុក្ខជាមួយប្រជាពលរដ្ឋជាប់ជានិច្ច។
លោកឃួង ស្រេង ក៏បានអំពាវនាវដល់បងប្អូនប្រជាពលរដ្ឋដែលមានសិទ្ធិបោះឆ្នោតសូមទៅបោះឆ្នោតឲ្យបានគ្រប់ៗគ្នាដើម្បីជ្រើសតាំងតំណាងរាស្ត្រអាណត្តិទី៦នៅថ្ងៃទី២៩កក្កដា ឆ្នាំ២០១៨ខាងមុខដើម្បីផ្តល់ឱកាសជូនសម្តេចតេជោបន្តដឹកនាំរាជរដ្ឋាភិបាលឆ្ពោះទៅរកការអភិវឌ្ឍរីកចម្រើនខ្លាំងក្លាបន្តទៀត។
សហគមន៍សន្តិភាព២ មានសហគមន៍ប្រជាពលរដ្ឋចំនួន៨សហគមន៍ស្មើនឹង២៥៥០គ្រួសារដែលភាគច្រើនបងប្អូនប្រកបរបរលក់ដូរ,សេវាកម្ម និងកម្មកររោងចក្រ។ បងប្អូនទាំងជាង២ពាន់គ្រួសារនេះភាគច្រើនត្រូវផ្លាស់ប្ដូរទីលំនៅបែបមិនរៀបរយចេញពីសហគមន៍ដីក្រហម,សហគមន៍បឹងកក់ និង១ផ្នែកទៀតមកពីប្រភពផ្សេងៗតាំងពីឆ្នាំ២០០៦,២០០៩ និងឆ្នាំ២០១០៕
Source: Kampuchea Thmey Daily
0 Comments