ភ្នំពេញ ៖ អភិបាលនៃគណៈអភិបាលរាជធានីភ្នំពេញ លោកឃួង ស្រេង បានជំរុញអោយអាជ្ញាធរនិងមន្ទីរជំនាញពន្លឿនលើការងារពាក់ព័ន្ធការធ្វើប្រទានកម្មដីធ្លី ជូនប្រជាពលរដ្ឋ ដោយត្រូវធ្វើការត្រួតពិនិត្យ និងស្រង់ស្ថិតិប្រជាពលរដ្ឋឲ្យបានច្បាស់ ចំពោះប្រជាពលរដ្ឋដែលរស់នៅតាមតំបន់ដែលបានកំណត់ដោយស.ជ.ណ ពីរាជរដ្ឋាភិបាលរួចហើយ។
ការជំរុញបែបនេះរបស់លោកឃួង ស្រេង បានធ្វើឡើងកាលពីព្រឹកថ្ងៃទី២០ ខែមិថុនានៅសាលារាជធានី ក្នុងកិច្ចប្រជុំស្ដីពីការធ្វើប្រទានកម្ម និងផ្តល់ប័ណ្ណកម្មសិទ្ធិដី និងបំបែកក្បាលដីក្នុងបុរីជូនប្រជាពលរដ្ឋដែលរស់នៅក្នុងរាជធានីភ្នំពេញ។
លោកឃួង ស្រេងបានបន្តថា មន្ទីររៀបចំដែនដី នគររូបនីយ៍កម្មសំណង់និងសុរិយោដីរាជធានីភ្នំពេញ បានបំពេញការងារទាំងថ្ងៃទាំងយប់លើការងារបោះពុម្ពសន្លឹកប័ណ្ណកម្មសិទ្ធិ ក៏ដូចការងារចុះបញ្ជីដីធ្លីជាលក្ខណៈប្រព័ន្ធ និងផ្តល់ប័ណ្ណកម្មសិទ្ធិស្របច្បាប់ជូនបងប្អូន។ អាជ្ញាធរខណ្ឌនីមួយៗបានលើកឡើងពីទិន្នន័យតំបន់ត្រូវធ្វើប្រទានកម្មដីធ្លី និងផលប៉ះពាល់។
ពាក់ព័ន្ថនឹងសំណើសុំការអនុញ្ញាតធ្វើប្រទានកម្ម និងផ្តល់ប័ណ្ណកម្មសិទ្ធិជូនប្រជាពលរដ្ឋដែលរស់នៅមិនរៀបរយលើដីអាងស្តុកទឹកទួលគោកទី១សង្កាត់បឹងកក់ទី២ និងអាងស្តុកទួលគោកទី២សង្កាត់បឹងកក់ទី១ខណ្ឌទួលគោកដែលមានពាក់ព័ន្ធ នឹងផ្លូវរថភ្លើងដែរនោះ លោកឃួង ស្រេង បញ្ជាក់ថា អង្គប្រជុំបានកំណត់គំលាតពីអ័ក្សផ្លូវរថភ្លើងសងខាង គឺខាងត្បូងផ្លូវ១១ម៉ែត្រ និងខាងជើងផ្លូវ១៥ម៉ែត្រចាប់ពីត្រឡោកបែកដល់វិថីគីមអ៊ីលស៊ុង។ ចំណែកអាងស្ដុកទឹកត្រូវទុកទំហំទទឹងប្រឡាយ២៤ម៉ែត្រ និងទុកចំណីប្រឡាយសម្រាប់ធ្វើផ្លូវនិងបុកស៊ីផាយដើម្បីបញ្ចៀសការរំលោភប្រឡាយតទៅទៀត។ ចំពោះកំណាត់ផ្លូវអមផ្លូវរថភ្លើងចាប់ពីផ្លូវគីម អ៊ីលស៊ុងដល់អយស្ម័យយានកម្ពុជា ត្រូវថយ១២ម៉ែត្រពីអ័ក្សផ្លូវរថភ្លើង។ នៅមានទីតាំងមួយចំនួនដែលត្រូវដោះស្រាយតាមនីតិវិធីសុរិយោដី និងការផ្តល់ប្រទានកម្មដីជូនបងប្អូនប្រជាពលរដ្ឋឲ្យបានលឿនឈានទៅផ្តល់ប័ណ្ណកម្មសិទ្ធិស្របច្បាប់ជូនបងប្អូន៕
Source: Kampuchea Thmey Daily
0 Comments