ភ្នំពេញ ៖ បុរសម្នាក់សង្ស័យថា បែកថ្នាំញៀនបានបើករថយន្តស៊េរីទំនើបម៉ាកឡិចស៊ីសGS450 មួយគ្រឿងមកឈប់ពាក់ណ្តាលស្ពានជ្រោយចង្វារថ្មី បម្រុងលោតទឹកតែសមត្ថកិច្ចឃាត់ទាន់រួចរត់ដេញចាប់ម៉ូតូនឹងរថយន្តពេញលើស្ពានត្រូវបានសមត្ថកិច្ចនាំគ្នាចាប់យកទៅប៉ុស្តិ៍នគរបាលរដ្ឋបាលជ្រោយចង្វារដើម្បីរង់ចាំទាក់ទងរកក្រុមគ្រួសារមកទទួលយកទៅផ្ទះវិញ។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង២នឹង៤០នាទីយប់ថ្ងៃទី១០ខែមិថុនា ឆ្នាំ២០១៨ ស្ថិតនៅលើស្ពានជ្រោយចង្វារថ្មី ភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ។
បុរសដែលគេសង្ស័យថា បែកថ្នាំញៀននោះ មានអាយុប្រហែលជាង៣០ឆ្នាំ ហើយមិនត្រូវបានគេស្គាល់ឈ្មោះនោះទេ ជិះរថយន្តស៊េរីទំនើបមួយគ្រឿងម៉ាកឡិចស៊ីសស៊េរីGS450 ពណ៌សពាក់ស្លាកលេខភ្នំពេញ2AL-5422។
សមត្ថកិច្ចបានឲ្យដឹងថា នៅមុនពេលកើតហេតុគេឃើញបុរសខាងលើបើករថយន្តតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូង ខណៈពេលបើកបរមកដល់ពាក់កណ្តាលស្ពានជ្រោយចង្វារបានឈប់រថយន្តបម្រុងលោតទឹកសម្លាប់ខ្លួន ភ្លាមៗនោះត្រូវបានសមត្ថកិច្ចចាប់ឃាត់តែបុរសនោះមិនស្តាប់ថែមទាំរត់ចូលម៉ូតូឡាននឹងដេញចាប់ឡានម៉ូតូពេញលើស្ពាន។
សមត្ថកិច្ចបានបន្តថា បន្ទាប់មកបាននាំគ្នាចាប់ញាត់ដាក់ក្នុងរថយន្តរបស់គេតែបុរសនោះមិនព្រមចូលក្នុងរថយន្តដោយប្រកាច់រមួល ពេញស្ពានហើយសមត្ថកិច្ចបាននាំគ្នាព្យាយាមចាប់អស់រយៈពេល២០នាទីទើបចាប់បុរសនោះដាក់ក្នុងរថយន្តបាន ក្រោយពីចាប់ដាក់ក្នុងរថយន្តរួចសមត្ថកិច្ចបញ្ឆេះរថយន្តនោះមិនឆេះក៏បានហៅរ៉ឺម៉កម៉ូតូកង់បី ដឹកយកទៅរក្សាទុកនៅប៉ុស្តិ៍នគរបាលរដ្ឋបាលជ្រោយចង្វារដើម្បីឲ្យស្វាងថ្នាំញៀន និង ទាក់ទងរកក្រុមគ្រួសារមកទទួលយកទៅផ្ទះវិញ៕
Source: Kampuchea Thmey Daily
0 Comments