ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា ប្រទេសនូវែលហ្សេឡង់ ចូលចិត្តលូកដៃចូលជ្រៀតជ្រែកចូលកិច្ចការផ្ទៃក្នុងកម្ពុជា ខណៈកម្ពុជាមិនដែលលូកដៃចូលកិច្ចការរបស់ប្រទេសណាមួយនោះទេ ហើយការលូកដៃចូលកិច្ចការផ្ទៃក្នុងកម្ពុជានេះ គឺជាការរំលោភលើធម្មនុញ្ញ អសប យ៉ាងច្បាស់ និងជាការលំអៀងខាងនយោបាយព្រមទាំងដើរតាមមនោគមន៍វិជ្ជាអន្តរជាតិ នៃប្រទេសមហាអំណាច។
ការលើកឡើងរបស់លោក សុខ ឥសាន បែបនេះ បន្ទាប់ពីតំណាងប្រទេសនូវែលហ្សេឡង់ បានធ្វើសេចក្តីថ្លែងការណ៍មួយ នៅក្រុមប្រឹក្សាសិទ្ធិមនុស្ស (Human Rights Council) នៃអង្គការសហប្រជាជាតិ កាលពីថ្ងៃទី១៩ ខែមិថុនា ឆ្នាំ២០១៨ ដោយបានលើកឡើងពីបញ្ហាមួយចំនួន ទាក់ទងប្រទេសកម្ពុជា ដូចជាការស្នើឲ្យរាជរដ្ឋាភិបាលកម្ពុជា ដោះលែងលោក កឹម សុខា និងអ្នកទោសនយោបាយទាំងអស់ បញ្ចូលឲ្យមានគណបក្សសង្គ្រោះជាតិនៅក្នុងការបោះឆ្នោត និងបើកសិទ្ធិនយោបាយដល់អតីតមន្ត្រីគណបក្សសង្គ្រោះជាតិទាំង១១៨រូប ជាដើម។
លោក សុខ ឥសាន លើកឡើងថា នៅក្នុងសន្និបាតលើកទី៣៨ នៃក្រុមប្រឹក្សាសិទ្ធិមនុស្សអសប ប្រទេសនូវែលហ្សេឡង់ បានថ្លែងការណ៍ពាក់ព័ន្ធនឹងបញ្ហាផ្ទៃក្នុងកម្ពុជាដូចជា ការបោះឆ្នោតនៅកម្ពុជា នាពេលខាងមុខ មិនមែនជាការបោះឆ្នោតពិតប្រាកដ ដោយសារអត់មានបក្សប្រឆាំងដ៏ធំ, ទាមទារឲ្យមានការដោះលែង កឹម សុខា ចេញពីការឃុំឃាំង និងសកម្មជនបក្សប្រឆាំង ជាដើម។ លោកបញ្ជាក់ថា ការនិយាយនេះ មិនគិតដល់អតីតបក្សប្រឆាំងប្រព្រឹត្តល្មើសច្បាប់ ដែលត្រូវតុលាការកំពូលរំលាយចោលនោះឡើយ។
តាមលោក សុខ ឥសាន “កម្ពុជាមិនដែលបានលូកដៃចូលកិច្ចការផ្ទៃក្នុងប្រទេសណាទេ។ ហេតុអីបានជា ប្រទេសនូវែលហ្សេឡង់ ចូលចិត្តលូកដៃចូលកិច្ចការផ្ទៃក្នុងកម្ពុជាម្ល៉េះ ? ការលូកដៃកិច្ចការផ្ទៃក្នុងកម្ពុជា គឺជាការលំអៀងនយោបាយទៅរកបក្សប្រឆាំង តាមឥទ្ធិពលរបស់ប្រទេសមហាអំណាចណាមួយ ដែលធ្លាប់ជាមេខ្លោងនៃបដិវត្តន៍ពណ៌ នៅបណ្តាប្រទេស ហើយត្រូវបរាជ័យយ៉ាងអាម៉ាស់នៅកម្ពុជា។ ការលូកដៃចូលកិច្ចការផ្ទៃក្នុងកម្ពុជា គឺជាររំលោភលើធម្មនុញ្ញ អសប យ៉ាងច្បាស់ និងជាការលំអៀងខាងនយោបាយ និងដើរតាមមនោគមន៍វិជ្ជាអន្តរជាតិ នៃប្រទេសមហាអំណាច។
អ្នកនាំពាក្យគណបក្សប្រជាជនកម្ពុជារូបនោះអះអាងថា ប្រទេសនូវែលហ្សេឡង់ គួរគោរព និងអនុវត្តធម្មនុញ្ញ អសប និងគោរពឯករាជ្យ និងអធិបតេយ្យភាពកម្ពុជា ហើយចាត់ទុកកម្ពុជាមិត្តមួយរបស់ខ្លួន ពីព្រោះចំណាត់ការផ្លូវច្បាប់លើអតីតបក្សប្រឆាំង គឺជាកិច្ចការផ្ទៃក្នុងរបស់កម្ពុជា៕
Source: Kampuchea Thmey Daily
0 Comments