តាកែវ ៖ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន បានប្រកាសនៅមុខកម្មករ កម្មការិនីនៅខេត្តតាកែវថា នៅឆ្នាំ ២០១៩ ខាងមុខនេះប្រាក់ឈ្នួលអប្បបរមា របស់កម្មករ-កម្មការិនីនឹងឡើងខ្ពស់ជាង១៧០ដុល្លារអាមេរិក ដោយសម្តេចបញ្ជាក់ថា រាជរដ្ឋាភិបាលនឹងខិតខំកាត់បន្ថយនូវការចំណាយ ផ្សេងៗរបស់រោងចក្រ ដើម្បីបង្វែរប្រាក់ទាំងនោះមកដំឡើងប្រាក់ឈ្នួលសម្រាប់កម្មករ ។
សម្តេចតេជោ ហ៊ុន សែន បានប្រកាសបែបនេះកាលពីព្រឹកថ្ងៃ ទី២០ ខែមិថុនា ឆ្នាំ២០១៨នេះ នៅក្នុងពិធីជួបសំណេះសំណាលជាមួយកម្មករ កម្មការិនីជាង១,៧ម៉ឺននាក់ មកពីរោងចក្រ សហគ្រាស ចំនួន១៣ ក្នុងខេត្តតាកែវ។ សម្តេចតេជោនាយករដ្ឋមន្ត្រីបានអបអរសារទរចំពោះការទទួលបានប្រាក់បៀវត្សរ៍អប្បបរមា ១៧០ដុល្លារ ក្នុងឆ្នាំ២០១៨ ហើយសង្ឃឹមថា ប្រាក់បៀវត្សរ៍នឹងបន្តកើនឡើងនៅក្នុងឆ្នាំ២០១៩។ ប្រាក់ខែនៅប្រទេសមួយចំនួនទាបជាងកម្ពុជា ដូចនេះវាអាចធ្វើឲ្យរោងចក្រនៅក្នុងប្រទេសកម្ពុជាងាយ នឹងបាត់បង់ណាស់ ប្រសិនជាមានបញ្ហាអ្វីកើតឡើងនោះ ដូចនេះត្រូវខិតខំថែរក្សារោងចក្រដែលយើងមាននេះ។
សម្តេចនាយករដ្ឋមន្ត្រី បានមានប្រសាសន៍ថា «ឆ្នាំ២០១៩ ពូហ៊ានប្រកាសជាមុនថា ប្រាក់ឈ្នួលអប្បបរមា នឹងកើនខ្ពស់ជាង១៧០ដុល្លារ នេះគឺត្រូវចរចាគ្នាដើម្បីបង្កើនប្រាក់ នៅពេលនោះរាជរដ្ឋាភិបាល ក៏កំពុងរកគ្រប់វិធីទាំងអស់ដើម្បីធ្វើឲ្យការចំណាយរបស់ម្ចាស់រោងចក្រ កាន់តែចំណាយតិច ដើម្បីឲ្យម្ចាស់រោងចក្រនោះ ប្រើប្រាស់នូវប្រាក់ចំណេញដើម្បីបង្កើនបៀរវត្សចំពោះកម្មករ»។
សម្តេចតេជោ ហ៊ុន សែន បានបន្តថា បច្ចុប្បន្នរាជរដ្ឋាភិបាលបានកំពុងគិតគូរពីថ្លៃអគ្គិសនី សម្រាប់វិស័យឧស្សាហកម្មដើម្បីធ្វើយ៉ាងណាឲ្យអគ្គិសនីរបស់យើងមានតម្លៃថោក ដែលអាចធ្វើឲ្យអគ្គិសនី ក៏អាចរស់រានបាន និងផ្នែកឧស្សាហកម្មក៏អាចរស់រានបានផងដែរ។ បន្ថែមលើនេះរាជរដ្ឋាភិបាលក៏បានគិតគូរពីបញ្ហាផ្សេងៗដទៃទៀតរាប់ទាំងការសម្រួលទៅលើបញ្ហាការដឹកជញ្ជូន សម្រួលទៅលើបញ្ហាការធ្វើពាណិជ្ជកម្មជាដើម ដើម្បីកាត់បន្ថយនូវការចំណាយថ្លៃដើមទៅលើការផលិត ហើយផលចំណេញនោះ ត្រូវបានផ្តល់សម្រាប់ឲ្យកម្មករ-កម្មការិនីផងដែរ។
ជាមួយនឹងការប្រកាសដំឡើងប្រាក់បៀវត្សរ៍ដល់កម្មករ-កម្មការិនីរាជរដ្ឋាភិបាលក៏បានគិតគូរអំពីការកាត់បន្ថយការចំណាយរបស់កម្មករ និងការយកចិត្តទុកដាក់ទៅលើបញ្ហាសុខមាលភាព។
ដោយសម្តេចលើកឡើងថា នៅពេលដែលក្មួយៗទទួលបានប្រាក់បៀវត្សរ៍កាន់តែខ្ពស់ រីឯការចំណាយក៏កាន់តែតិច តាមរយៈកម្មវិធីគាំពារសង្គម ឬ ហៅថាសំណាញ់សុវត្ថិភាពសង្គមដែលរាជរដ្ឋាភិបាលបានផ្តល់ឲ្យកម្មករ កម្មការិនីទាំងក្នុងប្រព័ន្ធ និងក្រៅប្រព័ន្ធ ដោយទទួលការពិនិត្យព្យាបាលដោយឥតគិតថ្លៃនៅតាមមន្ទីរពេទ្យរដ្ឋទាំងអស់។ ចំណែកកម្មករ កម្មការិនី នៅក្នុងរាជធានីភ្នំពេញទាំងអស់បានទទួលនូវសេវារថយន្តក្រុង ដោយឥតគិតថ្លៃផងដែរ។
សម្តេចតេជោនាយករដ្ឋមន្ត្រីក៏បានលើកឡើងផងដែរថា នៅពាក់កណ្តាលឆ្នាំ ២០១៩ ដែលយើងបានសិក្សា ហើយប្រកាសចេញជាគ្របខណ្ឌគោលនយោបាយរបស់រាជរដ្ឋាភិបាលនិងមានការអនុវត្តចំពោះស្ត្រីក្រីក្រដែលមានផ្ទៃពោះ និងឆ្លងទន្លេ នឹងទទួលបានថវិកាពីរាជរដ្ឋាភិបាលរហូតដល់ ៧៦ ម៉ឺនរៀល វាច្រើនជាងកម្មការិនី ដែលបានតែ ៤០ ម៉ឺនរៀល និង សុំទោសចំពោះស្ត្រីនៅទូទាំងប្រទេស ដែលថវិកានេះមិនអាចផ្តល់ឲ្យគ្រប់គ្នាបាន ព្រោះសមធម៌មិនគួរត្រូវបានអនុវត្តសម្រាប់គ្រប់គ្នានោះទេ ដោយសារថា អ្នកក្រីក្រគួរតែទទួលបានការជួយពីរាជរដ្ឋាភិបាលទើបជាសមធម៌សង្គម។
សម្តេចតេជោនាយករដ្ឋមន្ត្រីក៏បានបន្តអំពាវនាវឲ្យពូមកកាន់កម្មករកម្មការិនីទាំងអស់ខិតខំធ្វើយ៉ាងណាចូលរួមក្នុងការរក្សាសន្ដិភាព ស្ថេរភាពនយោបាយ ដើម្បីធានានូវការអភិវឌ្ឍ ហើយធ្វើយ៉ាងម៉េចប្រែក្លាយរោងចក្រមួយឲ្យក្លាយទៅជាសហគមន៍សុខដុមរមនាមួយតាមរយៈ ទំនាក់ទំនងល្អក្នុងវិស័យការងារ រវាងថៅកែរោងចក្រ ប្រធានផ្នែក ប្រធានក្រុម ជាមួយកម្មករ-ការិនី ។ បើសិនជានៅកន្លែងមួយៗ បង្កើតបានភាពសុខដុមរមនា ហើយយកចិត្តទុកដាក់សុខទុក្ខគ្នាទៅវិញទៅមក វាពិតជាបង្កើតបាននូវបរិយាកាសល្អសម្រាប់រោងចក្រ។ ថៅកែមិនត្រូវភ្លេចថា រោងចក្រមួយ បើសិនជាគ្មានកម្មករធ្វើការ វាគ្រាន់តែជាឃ្លាំងមួយតែប៉ុណ្ណោះ។ ឯកម្មករយើងវិញ បើសិនពុំមានថៅកែបង្កើតឡើងនូវរោងចក្រ ផ្ដល់ការងារឲ្យយើងធ្វើ ពេលនេះ យើងមិនមែនជាកម្មករទេ យើងជាកសិករដែលកាន់ចប កាន់នង្គ័ល កាន់កណ្ដៀវ កាន់កាំបិតតែប៉ុណ្ណោះ។ អញ្ចឹងទេ ភាគីទាំងពីរ គឺបំពេញឲ្យគ្នាទៅវិញទៅមក បង្កើតជាឆ្នាំងបាយមួយសម្រាប់ទាំងអស់គ្នា។ សូមតាមរោងចក្រនីមួយៗ កុំឲ្យមានបងតូចបងធំកាប់ចាក់គ្នានៅតាមរោងចក្រ។ សូមកុំឲ្យតាមរោងចក្រនីមួយៗមានក្រុមសេពគ្រឿងញៀន បំផ្លាញទៅដល់សុវត្ថិភាព និង សុខភាពរបស់កម្មករ-ការិនី។ ក្មួយៗត្រូវចេះដាស់តឿនគ្នាកុំឲ្យមានអំពើអនាចារ ឬអំពើណាមួយ ដែលវាមិនសមស្របទៅនឹងសីលធម៌សង្គម ឬច្បាប់របស់រដ្ឋនៅតាមរោងចក្រ ទើបជាការល្អប្រសើរ ធានាបាននូវសុវត្ថិភាពការងារសម្រាប់ក្មួយៗទាំងអស់។
គួរបញ្ជាក់ថា ជំនួបនៅថ្ងៃទី២០ ខែមិថុនានេះ គឺជាជំនួបលើកទី ៤៥ ហើយ គិតចាប់តាំងពីថ្ងៃទី២០ខែសីហា ឆ្នាំ២០១៧មក ។ ក្នុងជំនួប ៤៥ លើកនេះមានកម្មករ និយោជិត សរុបជាង ៥៨ ម៉ឺននាក់ ។
រោងចក្រ សហគ្រាសទាំង ១៣ គឺមកពីក្រុងដូនកែវចំនួន ៤ ស្រុកសំរោងចំនួន ៤ ស្រុកព្រៃកប្បាសចំនួន ២ ស្រុកត្រាំកក់ចំនួន២ និង ស្រុកទ្រាំងចំនួន ១ដែលមាន អ្នកវិនិយោគមកពីប្រទេសចិនចំនួន ១២ និង ខ្មែរចំនួន ១។ រោងចក្រ សហគ្រាសទាំង១៣នេះមានរោង ចក្រកាត់ដេរសម្លៀកបំពាក់ចំនួន ១១ និង ផលិតស្បែកជើងចំនួន២។ ផលិតផលផលិតចេញពីរោងចក្រ សហគ្រាសទាំងនេះត្រូវបាននាំ ចេញទៅកាន់ទីផ្សារអន្តរជាតិ និង ផ្គត់ផ្គង់ទីផ្សារក្នុងប្រទេស។
បច្ចុប្បន្នខេត្តតាកែវមានសហគ្រាស គ្រឹះស្ថានចំនួន ១៤៤ មានកម្មករនិយោជិត ៤៦.៩៩០នាក់ ក្នុងនោះរោងចក្រកាត់ដេរ សម្លៀកបំពាក់និង ផលិតស្បែកជើង មាន ចំនួន ៣៧ មានកម្មករនិយោជិតចំនួន ៣៨.១៥៨ នាក់ ដែលមានប្រាក់ឈ្នួលសរុបប្រមាណជិត ៧៨ លានដុល្លារក្នុងមួយឆ្នាំ។
ការអភិវឌ្ឍតំបន់ឧស្សាហកម្មក្នុងខេត្តតាកែវគឺជាជោគជ័យនៃគោលនយោបាយទាក់ទាញវិនិយោគបង្កើតការងារជូនកម្មករ និយោជិត របស់រាជរដ្ឋាភិបាល និង ជាជោគជ័យក្នុងការអនុវត្តគោលនយោបាយជាតិស្តីពីមុខរបរ និងការងារ, គោលនយោបាយអភិវឌ្ឍន៍វិស័យឧស្សាហកម្មកម្ពុជា, គោលនយោបាយស្តីពីការអប់រំបណ្តុះ បណ្តាលបច្ចេកទេសនិងវិជ្ជាជីវៈនិងក្របខណ្ឌគោលនយោបាយជាតិគាំពារសង្គមដែលបាននឹងកំពុងប្រែក្លាយខេត្តតាកែវទៅជាតំបន់សេដ្ឋកិច្ចដ៏មានសក្តានុពលមួយនៅកម្ពុជា។
ខេត្តតាកែវគឺជាខេត្តទី៦ហើយ ដែលសម្តេចតេជោ ហ៊ុន សែន បានអញ្ជើញចុះជួបសំណេះ សំណាលជាមួយកម្មករ កម្មការិនី បន្ទាប់ពីខេត្តកណ្តាល, ស្វាយរៀង, ព្រះសីហនុ, កំពង់ស្ពឺ និងកំពង់ចាម៕
Source: Kampuchea Thmey Daily
0 Comments