ទីផ្សារ​ដោះដូរ​កីឡាករ​លើក​ទី​២​នៅ​លី​គ​កំពូល​កម្ពុជា​ឆ្នាំ​២០១៨​នេះ មាន​រយៈពេល​កន្លះ​ខែ​គត់

គណៈកម្មការ​ប្រកួត​បា​ល់​ទាត់​ជាតិ​កម្ពុជា (CNCC) បាន​ជូនដំណឹង​ដល់​ក្លិប​ពាក់ព័ន្ធ​ទាំងអស់​ចូលរួម​ប្រកួត​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League 2018) ថា​ ទីផ្សារ​ដោះដូរ​កីឡាករ​លើក​ទី​២​ និង​ការចុះបញ្ជី​កីឡាករ​ថ្មី​សម្រាប់​ត្រៀម​ជុំ​ទី​២ នឹង​បើក​ពីថ្ងៃ​ទី​១៥​ ខែមិថុនា ដល់​ថ្ងៃទី​២៩ ខែមិថុនា ពោល​គឺ​មាន​រយៈពេល​កន្លះ​ខែ​គត់​។



យោង​តាម​លិខិតផ្លូវការ​ដែល​ចេញ​ដោយ CNCC បាន បញ្ជាក់ថា​ ការដោះដូរ​កីឡាករ​ជើង​ទី​២​នេះ​អាច​ធ្វើ​បាន​លើ​កីឡាករ​កម្ពុជា​៣​រូប និង​កីឡាករ​បរទេស​៣​រូប​។ ពានរង្វាន់​លី​គ​កំពូល​កម្ពុជា រដូវ​កាល​នេះ​នឹង​ប្រើប្រាស់​រូបមន្ត​ប្រកួត​សន្សំ​ពិន្ទុ​វិលជុំ​ចំនួន​២​ជើង​មាន​២២​សប្ដាហ៍ ដើម្បី​ស្វែងរក​ក្រុម​ខ្លាំង​ដែល​មាន​ពិន្ទុ​ច្រើន​ជាង​គេ​ដណ្តើម​ជើងឯក​ប្រចាំឆ្នាំ​។ ការប្រកួត​ចាប់ផ្តើម​ពី​ថ្ងៃ​ទី​៣​ខែមីនា ដល់​ថ្ងៃទី​៣០​ខែកញ្ញា ឆ្នាំ​២០១៨ ដែល​មាន​សមាជិក​ចំនួន​១២​ក្រុម​។ ក្រុម​ជើងឯក​នឹង​ទទួល​បាន​កៅអី​ទៅ​ចូលរួម​ប្រកួត​ក្នុង​ពានរង្វាន់ AFC Cup 2019, ពានរង្វាន់ Mekong Club Championship និង​ពានរង្វាន់ Singapore Cup ជាដើម​។



គិត​ត្រឹម​ពេលនេះ​ពានរង្វាន់​លី​គ​កំពូល​កម្ពុជា ធ្វើដំណើរ​ដល់​សប្តាហ៍​ទី​៨ ហើយ​ខណៈ​ជុំ​ទី​១​នៃ​រដូវ​កាល​នេះ​នឹង​បញ្ចប់​នៅ​ថ្ងៃទី​២៤ ខែមិថុនា ខាងមុខ​។ តាម​គម្រោងការ​ប្រកួត​ជុំ​ទី​២​នឹង​ចាប់ផ្ដើម​នៅ​ថ្ងៃទី​៣០ ខែមិថុនា ហើយ​កីឡាករ​ថ្មីៗ​ដែល​ក្លិប​នីមួយៗ​ជា​សមាជិក​ទាំង​១២​ក្រុម​បាន​ចុះបញ្ជី​លើក​ទី​២​នេះ​នឹង​ចូល​លេង​បាន​។



សម្រាប់​កម្មវិធី​ប្រកួត​សប្ដាហ៍​ទី​៩ នៃ​ពានរង្វាន់​លី​គ​កំពូល​កម្ពុជា នឹង​បន្ត​ធ្វើឡើង​នៅ​ចុង​សប្ដាហ៍​នេះ​ដោយ​នៅ​ថ្ងៃ​សៅរ៍ ទី​៩ ខែមិថុនា ឆ្នាំ​២០១៨​ក្រុម​អង្គ​ថា​យ​ហ្គឺ​រ ប៉ះ​ក្រុម​សូល​ទី​ឡូ​អង្គរ នៅ​វេលា​ម៉ោង​៣និង៣០​នាទី​ល្ងាច​ លើ​ទីលាន​កីឡដ្ឋាន​ខេត្តសៀមរាប ហើយ​វេលា​ម៉ោង​៣​រសៀល​មួយគូ​ទៀត​ក្រុម​វិសាខា ប៉ះ​ក្រុម​ព្រះខ័ន​រាជ​ស្វាយរៀង លើ​ទីលាន​កីឡដ្ឋាន​វេ​ស្ទើ​ន និង​ក្រុម​ភ្នំពេញ​ក្រោ​ន ទទួល​បឹងកេត នៅ​វេលា​ម៉ោង​៦​ល្ងាច​លើ​ទីលាន​កីឡដ្ឋាន RSN Stadium​។ ចំណែក​នៅ​ថ្ងៃអាទិត្យ ទី​១០ ខែមិថុនា វិញ​ក្រុម​អាស៊ី​អឺរ៉ុប ទទួល​ក្រុម​វេ​ស្ទើ​ន​ភ្នំពេញ លើ​ទីលាន​កីឡដ្ឋាន AEU Park ហើយ​ក្រុម​ក្រសួងការពារជាតិ ទទួល​ក្រុម​អគ្គីសនី​កម្ពុជា លើ​ទីលាន​ស្តា​ត​ចាស់ វេលា​ម៉ោង​៦​ល្ងាច​និង​ក្រុម​អគ្គ​ស្នងការ​ដ្ឋាន​ នគរបាល​ជាតិ​ប៉ះ​ណាហ្គាវើល​លើ​ទីលាន​ពហុកីឡដ្ឋាន​ជាតិ​វេលាម៉ោង៦ល្ងាច៕

   

Source: Kampuchea Thmey Daily