ព្រះវិហារ ៖ កំណាត់ផ្លូវ០២ខ្សែ ដែលមានប្រវែង ជាង៤គីឡូម៉ែត្រ ត្រូវបានមន្ទីរសាធារណការនិងដឹកជញ្ជូនខេត្តព្រះវិហារធ្វើការកៀរសម្រួល និងជួសជុលឡើងវិញ ដើម្បីសម្រួលចរាចរប្រជាពលរដ្ឋក្រោយពីទទួលរងប្រេះ និងស្រុត ដោយកន្លែងនោះ។
លោកសំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារបានឲ្យដឹងថា នៅថ្ងៃព្រហស្បតិ៍ ៩រោច ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ០៧ ខែមិថុនា ឆ្នាំ២០១៨នេះ ក្រុមការងារថែទាំផ្លូវថ្នល់របស់ មន្ទីរសាធារណការ និងដឹកជញ្ជូនខេត្តព្រះវិហារ បានអនុវត្តការងារថែទាំផ្លូវជាតិលេខ៦២ ដោយដឹកក្រួសក្រហមលុបចិញ្ចើម កៀរសម្រួល និងកិនបង្ហាប់ សម្រេចបានប្រវែង ៤គីឡូម៉ែត្រ។
លោកបានបញ្ជាក់ទៀតថា ក្នុងថ្ងៃដដែលនេះដែរក្រុមការងារថែទាំផ្លូវថ្នល់របស់ មន្ទីរសាធារណការ និងដឹកជញ្ជូនខេត្តព្រះវិហារ ក៏បានអនុវត្តការងារថែទាំផ្លូវជាតិលេខ ៩៥ ក្នុងភូមិសាស្ត្រ ស្រុករវៀង ខេត្តព្រះវិហារ ដោយស្រោចកៅស៊ូ បាចថ្មលុបស្នាមប្រេះនិងស្រុត សម្រេចបានលទ្ធផលចំនួន ៨១០ ម៉ែត្រការ៉េផងដែរ។
នៅក្នុងខេត្តព្រះវិហារទាំងមូល បើពិនិត្យទៅលើផ្នែកហេដ្ឋារចនាសម្ព័នរយៈពេល៥ឆ្នាំចុងក្រោយនេះ មានការចម្រើនយ៉ាងខ្លាំង មានផ្លូវខ្វាត់ខ្វែង ដែលខុសគ្នាស្រឡះកាលពីមុន ដោយកាលពីមុន បើចង់មកខេត្តព្រះវិហារត្រូវធ្វើដំណើរ ដោយគេងផ្លូវទើបអាចមកដល់ខេត្តព្រះវិហារបាន តែឥឡូវនេះការធ្វើដំណើរបានឆាប់រហ័សណាស់ មិនថាខេត្តណា ទៅខេត្តណាមកកាន់ខេត្តព្រះវិហារនេះទេ៕
Source: Kampuchea Thmey Daily
0 Comments