ក្រុមបាល់ទាត់២ ដែលមានមូលដ្ឋាននៅខេត្តសៀមរាប គឺអង្គរថាយហ្គឺរ ត្រូវប៉ះក្រុមសូលទីឡូអង្គរ ខណៈក្រុមចំណូលថ្មីវិសាខា ត្រូវជួបក្រុមព្រះខ័នរាជស្វាយរៀង និងក្រុមជើងឯក៦សម័យកាលភ្នំពេញក្រោនទទួលបឹងកេត ក្នុងសប្ដាហ៍ទី៩នៃពានរង្វាន់លីគកំពូលកម្ពុជា (Metfone Cambodia League 2018) នៅល្ងាចថ្ងៃសៅរ៍ ទី៩ ខែមិថុនា ឆ្នាំ២០១៨នេះ។
អ្នកសៀមរាប ២ក្រុមប៉ះគ្នាជាលើកដំបូងក្រុមអង្គរថាយហ្គឺរ ត្រូវបើកទ្វាកីឡដ្ឋានខេត្តសៀមរាប ទទួលក្រុមសូលទីឡូអង្គរ នៅវេលាម៉ោង៣និង៣០នាទីល្ងាច។ ការប្រកួតនេះមានផ្សាយផ្ទាល់នៅលើទំព័រហ្វេសប៊ុកផេករបស់គណៈកម្មការប្រកួតបាល់ទាត់ជាតិកម្ពុជា (CNCC) ផងដែរ។ នេះជាជំនួបដំបូងសម្រាប់ក្រុមទាំង២ព្រោះថាក្រុមសូលឡូអង្គរ ទើបតែទទួលសិទ្ធិឡើងមកលីគកំពូលកម្ពុជា នៅរដូវកាលនេះប៉ុណ្ណោះ។
ចំពោះក្រុមអង្គរថាយហ្គឺរ ឆ្លងកាត់ប្រកួត៨លើកមកនេះឈ្នះបាន៣ លើកស្មើគ្នាបាន១លើក និងចាញ់៤លើកមាន១០ពិន្ទុ។ ក្រុមនេះកំពុងតែដឹកនាំដោយលោក Oriol Mahedano ដែលជាគ្រូបង្វឹកសញ្ជាតិអេស្ប៉ាញ កាន់អាជ្ញាប័ណ្ណគ្រូបង្វឹកកម្រិត UEFA A licence ដែលមានសមាជិក២៥នាក់។ លោក Akihiro Kato ដែលជាប្រធានក្លិបបានដាក់គោលដៅយកកៅអីនៅតំបន់ក្រុមខ្លាំងទាំង៤ប្រចាំរដូវកាល (Top4) នៅឆ្នាំនេះ ខណៈនៅឆ្នាំ២០២០ ក្លិបចង់ប្រជែងយកជើងឯក។
ចំណែកក្រុមសូលទីឡូអង្គរ វិញក្រោមការដឹកនាំពីគ្រូបង្វឹកជនជាតិជប៉ុន Yuki Matsuda ជាគ្រូបង្គោលប្រចាំក្រុមទើបតែបញ្ចប់វគ្គសិក្សាគ្រូបង្វឹកបាល់ទាត់កម្រិត AFC A License នៅប្រទេសសិង្ហបុរី។ ៨ប្រកួតកន្លងមកក្រុមសូលទីឡូអង្គរ ឈ្នះបាន២លើក ស្មើគ្នា១លើកនិងចាញ់ដល់ទៅ៥លើក ខណៈជ័យជម្នះក្នុងប្រកួតនេះពិតជាចាំបាច់ក្នុងការរកពិន្ទុបន្ថែមដើម្បីគេចផុតពីតំបន់បាតតារាងផងដែរ។
*វិសាខា និងព្រះខ័នរាជស្វាយរៀង ត្រូវការពិន្ទុជាចាំបាច់ដូចគ្នាឮ
ក្រុមបាល់ទាត់វិសាខា និងត្រូវបើកទ្វារកីឡដ្ឋានវេស្ទើនភ្នំពេញ ទទួលក្រុមក្រុមព្រះខ័នរាជស្វាយរៀង នៅវេលាម៉ោង៣រសៀល។ ការប្រកួតនេះមានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។ ទាំងវិសាខា និងព្រះខ័នរាជស្វាយរៀង សុទ្ធតែជាបេក្ខភាពមិនអាចមើលរំលងបានក្នុងការប្រជែងជើងឯកនៅរដូវកាលនេះ។
វិសាខា ជាក្រុមចំណូលថ្មីមែន តែរយៈពេល៨ប្រកួតមកនេះអាចយកឈ្នះក្រុមរៀមច្បងពោលគឺឈ្នះ៥ប្រកួត ហើយស្មើគ្នា១ប្រកួតនិងចាញ់២ប្រកួតប៉ុណ្ណោះឈរលេខ៣ក្នុងតារាងរួមមាន១៦ពិន្ទុ។ លោក ហុក សុជីវ័ន្ត ជាគ្រូបង្វឹករបស់វិសាខា ធ្លាប់បានលើកឡើងថា «យើងបានចរចានិងដាក់គោលដៅជាមួយថ្នាក់ដឹកនាំ យើងមានរយៈពេល៣ឆ្នាំ សម្រាប់អភិវឌ្ឍន៍ក្លិប។ ឆ្នាំទី១ក្នុងឆ្នាំ២០១៨ឆ្នាំក្រោយ គឺយើង ធ្វើយ៉ាងម៉េចរក្សាខ្លួនអោយបន្តនៅក្នុងលីគ ប៉ុន្តែក៏មិនស្ថិតក្នុងលទ្ធផលដែលអាក្រក់រហូតដល់ចំណាត់ថ្នាក់លេខ៩ លេខ១០អីដែរ បើអាចត្រឹមលេខ៦ លេខ៧ ឬក៏លេខ៨។ សម្រាប់ឆ្នាំទី២ យើងនឹងបង្កើន អាចនឹងឈានចូលដល់លេខ៤ លេខ៥ រហូតដល់ឆ្នាំទី៣ គោលការណ៍របស់យើង គឺនឹងដណ្ដើមយកពាន»។
ចំណែកក្រុមព្រះខ័នរាជស្វាយរៀង បានបង្កើតកំណត់ត្រាថ្មីនៅរដូវកាលនេះដោយប្រើប្រាស់គ្រូបង្វឹកបរទេសក្រោមការដឹកនាំដោយលោក Conor Nestor សញ្ជាតិអៀរឡង់ វ័យ៣៣ឆ្នាំ កាន់អាជ្ញាប័ណ្ណគ្រូបង្វឹកកម្រិត UEFA A License។ ឆ្លងកាត់ការប្រកួត៨លើកមកនេះក្រុមដែលមានមូលដ្ឋាននៅខេត្តស្វាយរៀង មួយនេះឈរលេខ៧ ក្រោយឈ្នះបាន៣លើកស្មើគ្នា២លើកនិងចាញ់៣លើកមាន១១ពិន្ទុក្នុងដៃ។
*ក្រុមជើងឯក៦សម័យកាលប៉ះក្រុមជើងឯក៣សម័យកាល
ក្រុមម្ចាស់ផ្ទះភ្នំពេញក្រោន ដែលធ្លាប់ឈ្នះជើងឯករហូតដល់៦លើក ត្រូវទទួលបឹងកេត ដែលធ្លាប់ឈ្នះពានរង្វាន់នេះ៣លើក នៅវេលាម៉ោង៦ល្ងាចលើទីលានកីឡដ្ឋាន RSN Stadium ដោយមានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។
ក្រុមភ្នំពេញក្រោន ក្រោមការដឹកនាំរបស់លោក Sean Sainsbury ជាគ្រូបង្វឹកជនជាតិអង់គ្លេស សំបូរទៅដោយកីឡាករវ័យក្មេងច្រើនអមដោយកីឡាករបរទេសដែលមានសមត្ថភាព។ ក្រុមនេះនៅតែជាបេក្ខភាពមួយក្នុងការប្រជែងយកពាននៅរដូវកាលនេះនិងជាពានលើកទី៧ប្រចាំក្លិបរបស់ខ្លួនផងដែរ។ ប្រកួតបាន៨លើកមកនេះភ្នំពេញក្រោន ឈរចំណាត់ថ្នាក់លេខ៤ មាន១៤ពិន្ទុក្រោយឈ្នះបាន៤លើក ស្មើ២លើក និងចាញ់២លើក។
សម្រាប់ក្រុមបឹងកេត វិញកំពុងឈរកំពូលតារាងក្រោយប្រកួតឈ្នះរហូតដល់៦ប្រកួតក្នុងចំណោមប្រកួត៨លើកដើមរដូវកាលនេះ ខណៈ២លើកទៀតសុទ្ធតែស្មើគ្នា។ បឹងកេត មានអម្រែកច្រើនជាងក្រុមដទៃក្នុងលីគកំពូលកម្ពុជាទាំង១១ផ្សេងក្នុងរដូវកាលនេះក្រោយទទួលសិទ្ធចូលលេងពាន AFC Cup 2018 ក្នុងនាមជាម្ចាស់ជើងឯកឆ្នាំចាស់ ត្រូវប្រកួតការពារតំណែងជើងឯកក្នុងលីគកំពូលកម្ពុជា និងពានរង្វាន់សម្តេចតេជោ ហ៊ុន សែន ខណៈក្រុមនេះទំនងទទួលបានកៅអីទៅលេងពាន Singapore Cup ឆ្នាំនេះផងដែរ។
ចំណែក៣គូផ្សេងទៀតនៅសប្ដាហ៍ទី៩នេះ នឹងបន្តប្រកួតនៅថ្ងៃអាទិត្យ ទី១០ ខែមិថុនា ទៀតដោយក្រុមអាស៊ីអឺរ៉ុប ទទួលក្រុមវេស្ទើនភ្នំពេញ លើទីលានកីឡដ្ឋាន AEU Park ហើយក្រុមក្រសួងការពារជាតិ ទទួលក្រុមអគ្គីសនីកម្ពុជា លើទីលានស្តាតចាស់ វេលាម៉ោង៦ល្ងាចនិងក្រុមអគ្គស្នងការដ្ឋាននគរបាលជាតិ ប៉ះណាហ្គាវើល លើទីលានពហុកីឡដ្ឋានជាតិ វេលាម៉ោង៦ល្ងាច៕
Source: Kampuchea Thmey Daily
0 Comments