ប៉ូលិសបាននិយាយថា បុរសម្នាក់ ដែលប្រដាប់ដោយកាំបិត បានវាយប្រហារសិស្សសាលានៅច្រកចូលសាលាបឋមសិក្សាមួយក្នុងសង្កាត់ Xuhui ភាគកណ្តាលទីក្រុងសៀងហៃកាលពីថ្ងៃព្រហស្បតិ៍ ដោយបានសម្លាប់កុមារចំនួនពីរនាក់។
ប៉ូលិសក្រុងសៀងហៃសាខាសង្កាត់ Xuhui បាននិយាយក្នុងគណនី Weibo ផ្លូវការរបស់ខ្លួនថា បុរសវ័យ២៩ឆ្នាំម្នាក់បានវាយប្រហារទៅលើសិស្សប្រុសចំនួន៣នាក់និងស្ត្រីជាម្តាយម្នាក់ជាមួយនឹងកាំបិតចិតបន្លែមួយនៅម៉ោងប្រហែល១១និង៣០នាទីព្រឹក។
ជនរងគ្រោះត្រូវបានគេបញ្ជូនទៅកាន់មន្ទីរពេទ្យប៉ុន្តែសិស្សពីរនាក់បានស្លាប់ហើយសិស្សទី៣និងម្តាយនោះមិនស្ថិតក្នុងស្ថានភាពគំរាមកំហែងដល់អាយុជីវិតនោះទេ។
ប៉ូលិសបាននិយាយថា បុរសម្នាក់ដែលត្រូវបានចាប់ខ្លួននៅកន្លែងកើតហេតុគឺជាអ្នកគ្មានការងារធ្វើនិងខឹងសម្បាដល់សង្គម។
ឧក្រិដ្ឋកម្មហិង្សាគឺជារឿងដ៏កម្រនៅក្នុងប្រទេសចិនបើប្រៀបធៀបទៅនឹងប្រទេសដទៃទៀតជាពិសេសនៅតាមទីក្រុងធំៗដែលមានសន្តិសុខតឹងរ៉ឹងប៉ុន្តែមានការវាយប្រហារដោយកាំបិតនិងពូថៅជាបន្តបន្ទាប់នៅក្នុងរយៈពេលប៉ុន្មានឆ្នាំចុងក្រោយនេះដែលភាគច្រើនសំដៅលើកុមារ។
កាលពីខែមេសា បុរសអាយុ២៨ឆ្នាំម្នាក់បានចាក់សម្លាប់សិស្សអនុវិទ្យាល័យចិនចំនួន៧នាក់ដែលកំពុងធ្វើដំណើរចេញពីថ្នាក់រៀននៅខេត្ត Shaanxi ភាគពាយព្យ។
ការវាយប្រហារបែបនេះច្រើនតែត្រូវបានគេបន្ទោសទៅលើអ្នកដែលមានជំងឺផ្លូវចិត្តឬអ្នកដែលមានបញ្ហាផ្ទាល់ខ្លួន។ កាំបិតត្រូវបានប្រើជាទូទៅបំផុតដោយសារការត្រួតពិនិត្យកាំភ្លើងមានភាពតឹងតែងខ្លាំងនៅក្នុងប្រទេសចិន៕
Source: Kampuchea Thmey Daily
0 Comments