ប៉ូលិសបាននិយាយថា មនុស្សចំនួន៣នាក់រួមទាំងមន្ត្រីប៉ូលិស២នាក់ផងដែរ ត្រូវបានសម្លាប់នៅក្នុងខេត្ត Papua ភាគខាងកើតប្រទេសឥណ្ឌូនេស៊ី បន្ទាប់ពីអ្នកបំបែកខ្លួនបានបាញ់ប្រហារលើទូកដែលដឹកពលរដ្ឋ និងមន្ត្រីដែលទើបតែបោះឆ្នោតរួចនៅក្នុងការបោះឆ្នោតថ្នាក់តំបន់។
ប្រទេសឥណ្ឌូនេស៊ីមានការប្រុងប្រយ័ត្នខ្ពស់ចំពោះអំពើហិង្សានៅពេលការបោះឆ្នោតសម្រាប់តំណែងចៅហ្វាយក្រុង ក្រុមប្រឹក្សានិងអភិបាលខេត្តចំនួន១៧១ត្រូវបានប្រារព្ធធ្វើឡើងនៅទូទាំងប្រទេសកាន់សាសនាឥស្លាមភាគច្រើនធំបំផុតរបស់ពិភពលោកមួយនេះកាលពីថ្ងៃពុធ។
ប្រទេសឥណ្ឌូនេស៊ីបានកាន់កាប់ខេត្ត Papua បន្ទាប់ពីការធ្វើប្រជាមតិមួយដែលត្រូវបានគាំទ្រដោយអង្គការសហប្រជាជាតិក្នុងឆ្នាំ១៩៦៩, ប្រាំមួយឆ្នាំបន្ទាប់ពីការបញ្ចប់ការគ្រប់គ្រងរបស់អាណានិគមហូឡង់។
ប៉ូលិសបាននិយាយនៅថ្ងៃព្រហស្បតិ៍ថា ក្រុមបំបែកខ្លួនបានបាញ់លើទូកចំនួនពីរដែលដឹកអ្នកបោះឆ្នោតនិងមន្ត្រីលើទន្លេមួយក្នុងស្រុក Torere នៃខេត្ត Papua ដោយបានសម្លាប់មនុស្សចំនួន ៣នាក់។ មន្ត្រីប៉ូលិសបីនាក់ទៀតនៅតែកំពុងបាត់ខ្លួន។
ឧបទ្ទវហេតុនេះបានកើតឡើងប៉ុន្មានថ្ងៃបន្ទាប់ពីអ្នកបំបែកខ្លួនម្នាក់បើកការបាញ់ប្រហារនៅឯព្រលានយន្តហោះតូចមួយក្នុងស្រុក Nduga នៃខេត្ត Papua ដែលនៅទីនោះមានមនុស្សចំនួនបីនាក់ត្រូវបានសម្លាប់និងកុមារម្នាក់រងរបួស។ ការបោះឆ្នោតសម្រាប់តំណែងចៅហ្វាយស្រុកនោះត្រូវផ្អាកដោយសារតែអំពើហិង្សា។
ការរាប់សន្លឹកឆ្នោតក្រៅផ្លូវការនៅក្នុងការបោះឆ្នោតថ្នាក់តំបន់របស់ប្រទេសឥណ្ឌូនេស៊ីបានបង្ហាញថា បេក្ខជនគាំទ្រលោកប្រធានាធិបតី Joko Widodo បាននាំមុខនៅក្នុងខេត្តចំនួនបីនៅលើកោះជ្វាដែលជាកោះមានប្រជាជនជាងពាក់កណ្តាលក្នុងចំណោមប្រជាជនរបស់ប្រទេសប្រជាធិបតេយ្យធំបំផុតលំដាប់ទីបីរបស់ពិភពលោកមួយនេះ។
ប៉ុន្តែបេក្ខជនដែលគាំទ្រដោយគណបក្សប្រឆាំងបានបង្ហាញពីភាពល្អប្រសើរជាងការរំពឹងទុកនៅក្នុងការបោះឆ្នោតនេះដែលនេះគឺជាសញ្ញាដ៏សំខាន់មួយសម្រាប់ការប្រកួតប្រជែងតំណែងសភាជាតិនិងប្រធានាធិបតីនៅក្នុងឆ្នាំ២០១៩៕ REUTERS
Source: Kampuchea Thmey Daily
0 Comments