ភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នៅតែធ្វើការផ្តាំផ្ញើទៅកាន់មន្ត្រីថា មិនត្រូវភ្លេចទេថា ខ្លួនជាអ្នកបម្រើប្រជាជន មិនមែនជាចៅហ្វាយរបស់ប្រជាជនទេ។ សម្តេចតេជោបន្តថា ប្រទេសរបស់យើងគឺប្រជាជនជាធំដូចនេះត្រូវចាំចំណុចនេះឲ្យច្បាស់។ សម្តេចបន្តថា គ្មានមន្ត្រីណាមួយទទួលបានជោគជ័យនៅពេលដែលគ្មានការគាំទ្រពីប្រជាជននោះទេ ។ភាពក្រអើតក្រទមមិនមែនជាឥរិយាបទរបស់មន្ត្រីនោះទេ។
ប្រមុខរាជរដ្ឋាភិបាលបានបែបនេះនៅចំពោះមុខសិស្សមន្ត្រីជាន់ខ្ពស់ និងមធ្យម ជាង១ពាន់នាក់នៃសាលាភូមិន្ទរដ្ឋបាលនៅក្នុងពិធីបិទវគ្គប្រគល់សញ្ញាបត្រ វិញ្ញាបនបត្រជូនសិស្សមន្ត្រី ជាន់ខ្ពស់ សិស្សមន្ត្រីក្រមការ កម្មសិក្សាការី ឆ្នាំ ២០១៧ និង ពិធីបើកវគ្គបណ្តុះបណ្តាល ឆ្នាំ ២០១៨ របស់សាលភូមិន្ទរដ្ឋបាល នៅវិទ្យាស្ថានជាតិ អប់រំនាព្រឹកថ្ងៃទី ៥ ខែ មិថុនា នេះ។
សម្តេចតេជោបានមានប្រសាសន៍ថា៖ “ធ្វើជាមន្ត្រីគឺជាខ្ញុំបំរើរបស់ប្រជាជនមិនមែនជាចៅហ្វាយប្រជាជនទេ ប្រទេសរបស់យើងគឺប្រជាជនជាធំ ដូចនេះត្រូវចាំចំណុចនេះឲ្យច្បាស់ ។ ពាក្យខ្មែរងើយស្កត អោនដាក់គ្រាប់ ជាសុភាសិតមួយត្រឹមត្រូវណាស់ ត្រូវតែអោនលំទោនចំពោះប្រជាជនទើបយើងអាចរក្សាបាននូវតួនាទីរបស់យើង។ បើអ្នកមិនប្រកាន់ជំហរនេះទេអ្នកគ្មានទទួលបានជោគជ័យនោះទេ។ គ្មានមន្ត្រីណាមួយទទួលបានជោគជ័យនៅពេលដែលគ្មានការគាំទ្រពីប្រជាជននោះទេ។ ភាពក្រអឺតក្រទមមិនមែនជាឥរិយាបថរបស់មន្ត្រី នោះទេ”។
ជាមួយនេះសម្ដេចតេជោ ហ៊ុន សែន ក៏បានលើកឡើងអំពីការតែងតាំងមន្ត្រីដោយសម្តេចបានលើកឡើងថា មន្ត្រីដែលល្អ គឺជាមន្ត្រីដែលចេះដោះស្រាយបញ្ហាកើតឡើងដោយចៃដន្យនៅនឹងកន្លែងផ្ទាល់។ ចំណែកមន្ត្រីដែលពូកែរាយការណ៍មកថ្នាក់លើហើយទម្លាក់កំហុសទៅថ្នាក់ក្រោមគឺជាមន្ត្រីអាក្រក់ ដែលមិនត្រូវឲ្យមានមុខតំណែងខ្ពស់ក្នុងរដ្ឋាភិបាលឡើយ។ ដោយសម្ដេចចាត់ទុកថា មន្ត្រីរបៀបនេះគឺជាមន្ត្រីពូកែអែបអប ឡេមឡឺម ហើយខ្វះការទទួលខុសត្រូវលើការងារប៉ុន្តែរង់ចាំតែទទួលផលប្រយោជន៍។
សម្តេចតេជោនាយករដ្ឋមន្ត្រីបានមានប្រសាសន៍ថា «មន្ត្រីដែលយកជាគ្នាបាន គឺមន្ត្រីដែលស្រវាស្រទេញដោះស្រាយបញ្ហានៅហ្នឹងកន្លែង ហើយដោយប្រមូលផ្ដុំនូវការឈ្លាសវៃរបស់ខ្លួន ដោះស្រាយបញ្ហានៅហ្នឹងកន្លែង។ នេះគឺជាមន្ត្រីដែលយើងត្រូវបង្កលក្ខណៈយកចិត្តទុកដាក់ហើយរៀបចំឲ្យទៅជាមន្ត្រីដឹកនាំកាន់តែខ្ពស់កាន់តែល្អ។ ប៉ុន្តែមន្ត្រីដែលមិនបានការដែលគួរតែជៀសវាងគឺគាត់ធ្វើការងារពីរដែលសំខាន់គឺទី១. រាយការណ៍ទៅថ្នាក់លើ និង ទី២. ស្តីបន្ទោសថ្នាក់ក្រោម។ មន្ត្រីបែបនេះត្រូវចងចាំចំណាំទុក មិនគួរតែងតាំងឲ្យកាន់ការងារបន្តទេ»។
ជាមួយគ្នានេះ សម្ដេច ហ៊ុន សែន ក៏បានដាស់តឿនមន្ត្រីឲ្យចេះសាមគ្គីគ្នា មិនត្រូវក្ដិចត្រួយ ឬមូលបង្កាច់មន្ត្រីដទៃ ដើម្បីអំណាចខ្លួនទេក្នុងនាមជាអ្នកបំពេញការងារបម្រើផលប្រយោជន៍ប្រជាពលរដ្ឋដូចគ្នា។ ប៉ុន្តែមន្ត្រីទាំងអស់ត្រូវរួមគ្នាដោះស្រាយរាល់បញ្ហាជាតិទើបជារឿងប្រសើរ។
សម្តេចតេជោនាយករដ្ឋមន្ត្រីក៏បានលើកឡើងផងដែរ ពាក់ព័ន្ធវិធីសាស្ត្រក្នុងការដឹកនាំថា វិធីសាស្ត្រដឹកនាំនិងធ្វើការងារ ត្រូវបែងចែកឲ្យច្បាស់ជាបីដំណាក់កាល ១.ត្រូវរៀបចំផែនការឲ្យច្បាស់លាស់ មិនអាចធ្វើដោយគ្មានផែនការនោះទេក្នុងបរិបទនៃការរៀបចំផែនការ ត្រូវធ្វើឲ្យត្រូវទៅនិងសភាពការណ៍ជាក់ស្តែង។ ធ្វើផែនការបានហើយសម្រេចបាន ៣០ ភាគរយ ។ ទី២.គឺចាត់តាំងអនុវត្ត សម្រាប់បាន ៣០ ភាគរយ ទៀត ។ នៅ ៤០ ភាគរយទៀតគឺសម្រាប់វាស់ស្ទង់សមត្តភាពរបស់មន្ត្រីគឺកត្តាចៃដន្យកើតឡើង ទើបជាការសាកល្បងសមត្តភាពរបស់មន្ត្រីពិតប្រាកដ៏ ទើបសម្រេចបាន ១០០ ភាគរយ។
ជាមួយនេះ ប្រមុខរាជរដ្ឋាភិបាលក៏បាននិទានរឿងមន្ត្រីគ្រប់ល្ពៅ ដោយសម្តេចតេជោបានចាត់ទុកថារឿងមន្ត្រីគ្រាប់ល្ពៅគឺជាគតិលោកមួយអប់រំមន្ត្រីឲ្យប្រកាន់យកអំពើសុចរិតទៀងត្រង់។
លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈបានឲ្យដឹងថា សិស្សមន្ត្រីជាន់ខ្ពស់ សិស្សមន្ត្រីក្រមការ កម្មសិក្សាការីជាន់ខ្ពស់ និង មធ្យម ឆ្នាំ ២០១៧ ចំនួន ៥៦៧ នាក់ និង ពិធីបើកវគ្គបណ្តុះបណ្តាលសិស្សមន្ត្រីជាន់ខ្ពស់ជំនាន់ទី១០ វគ្គវិក្រិត្យការកម្មសិក្សាការីមន្ត្រីជាន់ខ្ពស់ មន្ត្រីមធ្យមឆ្នាំ២០១៨ ចំនួន ៤៦១ នាក់។
តាមសុន្ទរកថា ស្វាគមន៍និងរបាយការណ៍សង្ខេបរបស់លោកកិត្តិបណ្ឌិត ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈបានឲ្យដឹងថា ការបណ្ដុះបណ្ដាលដំបូងសម្រាប់វគ្គសិស្សមន្ត្រីជាន់ខ្ពស់និងសិស្សមន្ត្រីក្រមការត្រូវបានធ្វើការជ្រើសរើសតាមរយៈការប្រឡងប្រជែងយ៉ាងសម្រិតសម្រាំង។
ការចុះឈ្មោះចូលរួមប្រលងតាមប្រព័ន្ធព័ត៌មានវិទ្យាត្រូវបានដាក់អនុវត្តជាលើកដំបូងក្នុងឆ្នាំ២០១៧ សម្រាប់បេក្ខជនសិស្សមន្ត្រីជាន់ខ្ពស់។ ក្នុងឆ្នាំ ២០១៨សិស្ស មន្ត្រីជាន់ ខ្ពស់ចំនួន ៥៦នាក់ បានបញ្ចប់ការសិក្សារយៈពេល ២ ឆ្នាំដោយជោគជ័យ ប្រកបដោយសមត្ថភាពជំនាញខ្ពស់ លើផ្នែករដ្ឋបាលសាធារណៈ សេដ្ឋកិច្ចនិងហិរញ្ញវត្ថុ និងទំនាក់ទំនងអន្តរជាតិ ហើយត្រូវបានចាត់ឲ្យទៅបំពេញការងារ នៅតាមក្រសួងស្ថាប័នរួចហើយ។ សិស្សមន្ត្រីក្រមការចំនួន ១០១ នាក់ក៏បានបញ្ចប់ការសិក្សារយៈពេល ១ ឆ្នាំដោយជោគជ័យលើប្រតិបត្តិការទូទៅ ក្នុងរដ្ឋបាលសាធារណៈដែលនឹងត្រូវបែងចែក ទៅបំពេញការងារនៅតាមក្រសួង ស្ថាប័ននាពេលខាងមុខនេះ។ លើសពីនេះក្នុង ឆ្នាំ ២០១៧ សាលាបានដាក់ឲ្យដំណើរការជាលើកដំបូងវគ្គបណ្ដុះបណ្ដាលតម្រង់ទិសដំបូងរយៈពេល១០៨ម៉ោងដល់មន្ត្រីដែលត្រូវបានជ្រើសរើសថ្មីនៅតាមក្រសួង ស្ថាប័ន ដែលបានផ្ដល់ការបណ្ដុះបណ្ដាលរួចហើយបានចំនួន ៧៨៨នាក់។ បច្ចុប្បន្នសាលាកំពុង បណ្ដុះបណ្ដាលសិស្សមន្ត្រីជាន់ខ្ពស់ ជំនាន់ទី១០ សរុបចំនួន៦០នាក់និងវគ្គបណ្ដុះ បណ្ដាលតម្រង់ទិសដំបូងដល់មន្ត្រីក្របខ័ណ្ឌថ្មី មកពីក្រសួងស្ថាប័នចំនួន ១០៦៧ នាក់ផងដែរ។
ទន្ទឹមនឹងវគ្គបណ្ដុះបណ្ដាលដំបូង សាលាភូមិន្ទរដ្ឋបាល ក៏បានរៀបចំការបណ្ដុះបណ្ដាលបន្តដល់មន្ត្រីរាជការដែលអាចមានរយៈពេលសិក្សា ៩ខែ និងការបណ្ដុះ បណ្ដាលដែលមានរយៈពេលខ្លីៗផងដែរ ។ ចំពោះមុខសេចក្ដីត្រូវការកាន់តែខ្ពស់នូវធនធានមនុស្សប្រកបដោយគុណភាព ,ការរីកចម្រើននៃបច្ចេកវិទ្យាបរិក្ខារនៃការប្រកួត ប្រជែងក្នុងតំបន់ នឹងសេចក្ដី ត្រូវការនៃការកសាងរដ្ឋបាលទំនើបដ៏រឹងមាំនិងមានប្រសិទ្ធភាពដើម្បីផ្ដល់សេវាដល់ប្រជាពលរដ្ឋកាន់តែប្រសើរសាលាភូមិន្ទ រដ្ឋបាលបានខិត ខំដោយមិនសំចៃកម្លាំងកាយចិត្តក្នុងការអភិវឌ្ឍខ្លួនជាលំដាប់។
ក្នុងន័យនេះសាលាភូមិន្ទ រដ្ឋបាលនឹងអភិវឌ្ឍន៍ខ្លួនឈរលើបាវចនា" វិន័យ គុណភាព គុណធម៌ នវានុវត្ត" ឱ្យនៅតែជាគ្រឹះស្ថានបណ្ដុះបណ្ដាលសាធារណៈ ឈានមុខ នៅក្នុងព្រះរាជាណាចក្រកម្ពុជានិងមានសមត្ថភាពកាន់តែខ្ពស់ ក្នុងសហគមន៍អាស៊ានព្រមទាំងសម្រេចឲ្យបាននូវគោលដៅរបស់ខ្លួនក្នុងការបណ្ដុះបណ្ដាលមន្ត្រីឲ្យបានចំនួន២ម៉ឺននាក់ក្នុងមួយឆ្នាំនៅឆ្នាំ ២០២៣៕
Source: Kampuchea Thmey Daily
0 Comments