ភ្នំពេញ ៖ លោកអង្ស វង្ស វឌ្ឍានា រដ្ឋមន្ត្រីក្រសួងយុត្តិធម៌ និងជាប្រធានក្រុមការងាររៀបចំការធ្វើវិសោធនកម្មច្បាប់ស្តីពីលក្ខន្តិកៈមេធាវី និងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីព្រឹកថ្ងៃចន្ទ ៦រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៤ ខែមិថុនា ឆ្នាំ២០១៨ នៅទីស្តីការក្រសួងយុត្តិធម៌ បានសហការដឹកនាំកិច្ចប្រជុំលើកទីមួយ នៃក្រុមការងាររៀបចំការធ្វើវិសោធនកម្មច្បាប់ស្តីពីលក្ខន្តិកៈមេធាវី ដែលត្រូវបានបង្កើតឡើងតាមរយៈសេចក្តីសម្រេច លេខ ១៦ សសរ ចុះថ្ងៃទី០២ ខែមីនា ឆ្នាំ២០១៨ របស់រាជរដ្ឋាភិបាល។
ក្រសួង បានឲ្យដឹងថា ការធ្វើវិសោធនកម្មនេះ សំដៅធ្វើយ៉ាងណាឲ្យច្បាប់ស្តីពីលក្ខន្តិកៈមេធាវី របស់កម្ពុជាមានសង្គតភាពទៅនឹងកម្រិតនៃការសន្យា (Commitment) របស់កម្ពុជា ក្រោមក្របខណ្ឌអង្គការពាណិជ្ជកម្មពិភពលោក (WTO) ។ តាមរយៈនេះ ក៏ជាការបង្ហាញជូនអន្តរជាតិនូវឆន្ទៈក្នុងការបំពេញកាតព្វកិច្ចរបស់ខ្លួនផងដែរ។
អនុលោមតាមប្រការ ៣ នៃសេចក្តីសម្រេចខាងលើ កិច្ចប្រជុំបានសម្រេចបង្កើតក្រុមលេខាធិការ ដែលមានការចូលរួមពីមន្ត្រីជំនាញនៃស្ថាប័នពាក់ព័ន្ធរួមមានក្រសួងយុត្តិធម៌ ក្រសួងពាណិជ្ជកម្ម ក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី និងក្រុមប្រឹក្សាគណៈមេធាវីនៃព្រះរាជាណាចក្រកម្ពុជា ជាជំនួយឱ្យក្រុមការងារក្នុងការសិក្សាស្រាវជ្រាវអំពីច្បាប់ស្តីពីលក្ខន្តិកៈមេធាវី និងបទដ្ឋានគតិយុត្តិជាតិ និងអន្តរជាតិ ដែលពាក់ព័ន្ធផ្សេងៗ ដើម្បីថ្លឹងថ្លែងរក្សាប្រយោជន៍ និងលើកជម្រើសនានាសម្រាប់ក្រុមការងាររៀបចំការធ្វើវិសោធនកម្មច្បាប់ស្តីពីលក្ខន្តិកៈមេធាវី ពិនិត្យ និងសម្រេច៕
Source: Kampuchea Thmey Daily
0 Comments