ភ្នំពេញ ៖ រដ្ឋសភា នឹងបន្តសម័យប្រជុំពេញអង្គរដ្ឋសភាលើកទី១០ នីតិកាលទី៥ នៅថ្ងៃទី ៧ ខែមិថុនាខាងមុខ។ នេះបើតាមប្រសាសន៍លោក ឡេង ប៉េងឡុង អគ្គលេខាធិការរដ្ឋសភា បានប្រាប់ក្រុមអ្នក សារព័ត៌មានក្រោយពីបញ្ចប់កិច្ចប្រជុំគណៈកម្មាធិការអចិន្ត្រៃយ៍រដ្ឋសភា ក្រោមអធិបតីភាពសម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា នៅព្រឹកថ្ងៃទី៥ ខែមិថុនានេះ នៅវិមានរដ្ឋសភា។
អគ្គលេខាធិការរដ្ឋសភាលោក ឡេង ប៉េងឡុង បានបញ្ជាក់ថា សម័យប្រជុំពេញអង្គរដ្ឋសភាលើកទី១០ នីតិកាលទី៥នេះ នឹងពិភាក្សា និងអនុម័តសេចក្តីព្រាងច្បាប់ចំនួន ៣ ទៅតាមការស្នើឡើងរបស់រាជរដ្ឋាភិបាលទុកដូចជាការប្រញាប់ ក្នុងនោះទី១-ការពិភាក្សា និងអនុម័តសេចក្តីព្រាងច្បាប់ស្តីពី ប្រាក់ឈ្នួលអប្បបរមា ២-ការពិភាក្សា និងអនុម័តសេចក្តីព្រាងច្បាប់ស្តីពីវិសោធនកម្មមាត្រា៨៧ ចំណងជើងចំណុច"គ"ផ្នែកទី៣ នៃជំពូក៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និង មាត្រា១២២ នៃច្បាប់ស្តីពី ការងារ ដែលត្រូវបានប្រកាសឱយប្រើដោយព្រះរាជក្រមលេខ ជស/រកម/០៣៩៧/០១ ចុះថ្ងៃទី១៣ ខែមីនា ឆ្នាំ១៩៩៧។ ៣-ការពិភាក្សា និងអនុម័តសេចក្តីព្រាងច្បាប់ស្ដីពីវិសោធនកម្មមាត្រា៣ មាត្រា៦ មាត្រា៧ មាត្រា៨ មាត្រា៩ មាត្រា១១ មាត្រា១២ ចំណងជើងជំពូក៤ មាត្រា១៦ មាត្រា១៩ មាត្រា២៦ មាត្រា៥០ មាត្រា៥១ មាត្រា៥២ មាត្រា៥៣ មាត្រា៥៤ មាត្រា៥៥ មាត្រា៥៦ មាត្រា៥៧ មាត្រា៥៨ មាត្រា៥៩ មាត្រា៦៥ មាត្រា៦៦ មាត្រា៦៧ មាត្រា៦៨ នៃច្បាប់ស្តីពីស្តង់ដារកម្ពុជា ដែលត្រូវប្រកាសឲ្យប្រើដោយព្រះរាជក្រមលេខ នស/រកម/០៦០៧/០១៣ ចុះថ្ងៃទី២៤ ខែមិថុនា ឆ្នាំ២០១៧៕
Source: Kampuchea Thmey Daily
0 Comments