ពានរង្វាន់លីគកំពូលកម្ពុជា (Metfone Cambodian League 2018) ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា នៅចុងសប្ដាហ៍ នឹងធ្វើដំណើរដល់សប្ដាហ៍ទី១២ ហើយខណៈការប្រកួតទាំង៦គូសុទ្ធតែមានផ្សាយផ្ទាល់ជូនទស្សនិកជនទស្សនាកម្សាន្តទាំងអស់ដោយមានការចាប់ដៃគ្នារវាងសារព័ត៌មានកម្ពុជាថ្មី, CNCC និងទូរទស្សន៍ BTV News។
ចំពោះការប្រកួតនៅថ្ងៃសៅរ៍ ទី៣០ ខែមិថុនា ឆ្នាំ២០១៨ មានការប្រកួត៣គូដោយក្រុមសូលទីឡូអង្គរ ប៉ះក្រុមភ្នំពេញក្រោន នៅវេលាម៉ោង៣:៣០នាទីរសៀលលើទីលានកីឡដ្ឋានខេត្តសៀមរាប មានផ្សាយតាមទំព័រហ្វេសប៊ុករបស់កម្ពុជាថ្មី ហើយក្រុមព្រះខ័នរាជស្វាយរៀង ជួបក្រុមណាហ្គាវើល នៅវេលាម៉ោង៦ល្ងាចលើទីលានកីឡដ្ឋានខេត្តស្វាយរៀង មានផ្សាយផ្ទាល់តាមប៉ុស្តិ៍ BTV News និងក្រុមបឹងកេត ប៉ះក្រុមអាស៊ីអឺរ៉ុប នៅវេលាម៉ោង៦ល្ងាចលើទីលានពហុកីឡដ្ឋានជាតិ ក្នុងរាជធានីភ្នំពេញ មានផ្សាយផ្ទាល់តាមទំព័រហ្វេសប៊ុក CNCC។
សម្រាប់ប្រកួតផ្សេងទៀតធ្វើឡើងនៅថ្ងៃអាទិត្យ ទី១ ខែកក្កដា ឆ្នាំ២០១៨ ដោយក្រុមអគ្គីសនីកម្ពុជា ប៉ះក្រុមវិសាខា វេលាម៉ោង៣ល្ងាចលើទីលានកីឡដ្ឋានអគ្គីសនីកម្ពុជា មានផ្សាយផ្ទាល់តាមទំព័រហ្វេសប៊ុករបស់ CNCC ហើយក្រុមវេស្ទើនភ្នំពេញ ទទួលក្រុមអគ្គស្នងការដ្ឋាននគរបាលជាតិ នៅវេលាម៉ោង៣រសៀលដូចគ្នាលើទីលានកីឡដ្ឋានវេស្ទើន មានផ្សាយតាមប៉ុស្តិ៍ BTV News និងក្រុមក្រសួងការពារជាតិ វិញប៉ះក្រុមអង្គរថាយហ្គឺរ នៅវេលាម៉ោង៦ល្ងាចលើទីលានកីឡដ្ឋានស្តាតចាស់ វេលាម៉ោង៦ល្ងាច ព្រមទាំងមានផ្សាយផ្ទាល់តាមប៉ុស្តិ៍ BTV News ដូចគ្នា។
ងាកមកមើលចំណាត់ថ្នាក់ត្រឹមសប្ដាហ៍ទី១១ នៃពានរង្វាន់លីគកំពូលកម្ពុជានេះវិញ ឃើញថាក្រុមបឹងកេតអែហ្វស៊ី ឡើងឈរកំពូលតារាង មាន២៧ពិន្ទុ តាមពីក្រោយដោយក្រុមលេខ២ ណាហ្គាវើល មាន២៥ពិន្ទុ។ ក្រុមលេខ៣គឺវិសាខា មាន២៣ពិន្ទុ ហើយក្រុមលេខ៤ក្រសួងការពារជាតិ មាន២១ពិន្ទុ ខណៈក្រុមលេខ៥ អាស៊ីអឺរ៉ុប មាន១៨ពិន្ទុ ដូចគ្នានឹងក្រុមលេខ៦ ភ្នំពេញក្រោន តែខុសត្រង់ Head to Head និងក្រុមលេខ៧ អគ្គស្នងការដ្ឋាននគរបាលជាតិ មាន១៧ពិន្ទុ។ ក្រុមលេខ៨ ព្រះខ័នរាជស្វាយរៀង មាន១៤ពិន្ទុ លើក្រុមលេខ៩ អង្គរថាយហ្គឺរ មាន១១ពិន្ទុ ហើយក្រុមលេខ១០ សូលទីឡូអង្គរ មាន៨ពិន្ទុ ស្របពេលក្រុមអគ្គីសនីកម្ពុជា ឈរលេខ១១ មាន៥ពិន្ទុ និងក្រុមវេស្ទើនភ្នំពេញ ឈរលេខ១២ មិនទាន់មានពិន្ទុ។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship និងពានរង្វាន់ Singapore Cup ជាដើម៕
Source: Kampuchea Thmey Daily
0 Comments