ភ្នំពេញ ៖ កម្មវិធីប្រឡងទេពកោសល្យ និងសមត្ថភាពលំដាប់ពិភពលោក Cambodia’s Got Talent ដែលទទួលស្គាល់ដោយស្ថាប័ន Guinness World Records និងជាកម្មវិធីទូរទស្សន៍ franchise ដ៏មានភាពជោគជ័យបំផុតនៅក្នុងពិភពលោកបានត្រឡប់មកវិញហើយ។
កម្មវិធី Cambodia’s Got Talent ដែលមាន១៣ វគ្គនេះ នឹងត្រូវធ្វើឡើងនៅសាលមហោស្រពដ៏ធំសម្បើមចាប់ពីថ្ងៃទី២៦ ខែមិថុនានេះ គឺសាលមហោស្រព NABA ដែលស្ថិតនៅក្នុងណាហ្គាទី ២! អ្នកដែលឈ្នះ នឹងទទួលបានរង្វាន់ដែលមានទឹកប្រាក់ ១០០ លានរៀល និងក្លាយជាសិល្បករ ឬសិល្បការិនីប្រចាំក្រុមហ៊ុនហង្សមាសគ្រុប។
នៅក្នុងសន្និសីទសារព័ត៌មានរួមគ្នាមួយកាលពីព្រឹកថ្ងៃទី២៥ ខែមិថុនា នៅ NABA ដែលជាសាលមហោស្រពបច្ចេកវិទ្យាវីដេអូ 3D mapping ដំបូងគេបង្អស់នៅកម្ពុជានិងជាទីតាំងផ្លូវការនៃកម្មវិធី Cam bodia’s Got Talent លោក Sean Kneale ដែលជាទីប្រឹក្សាប្រតិបត្តិនៃកម្មវិធី Got Talent ពិភពលោក បានមានប្រសាសន៍ថា “ខ្ញុំសូមថ្លែងអំណរគុណយ៉ាងជ្រាលជ្រៅបំផុតដែលក្រុមហ៊ុនណាហ្គាវើលដ៍អនុញ្ញាតឲ្យយើងដំណើរការ និងថតនៅក្នុងសាលមហោស្រព NABA ដ៏អស្ចារ្យនេះ! ខ្ញុំបានទៅសាលមហោស្រពជាច្រើនជុំវិញពិភពលោក ហើយសាលមហោស្រព NABA គឺជាសាលមហោស្រពលំដាប់ពិភពលោកពិតៗ”។
នាយកគ្រប់គ្រងកម្មវិធីនៃក្រុមហ៊ុនហង្សមាសលោក អ៊ឹង សុខលី បានឲ្យដឹងថា “សាលមហោស្រព NABAដ៏ធំនេះបានក្លាយជាទីកន្លែងសម្រាប់ការសម្តែងជាតិ និងអន្តរជាតិជាច្រើនចាប់តាំងពីបានបើកសម្ពោធកាលពីចុងឆ្នាំមុន។ ប្រព័ន្ធសំឡេង និងភ្លើងដ៏ទំនើបព្រមទាំងទីតាំងយុទ្ធសាស្ត្ររបស់ NABA បានធ្វើឲ្យ NABA ក្លាយជាទីតាំងដ៏ស័ក្ដិសមបំផុតសម្រាប់កម្មវិធី Cambodia’s Got Talent នេះ”។
នាយកប្រតិបត្តិផ្នែកទីផ្សារនៃក្រុមហ៊ុនណាហ្គាវើលដ៍ លោក Mike Ngai បានមានប្រសាសន៍ថា “យើងមានមោទនភាពយ៉ាងខ្លាំងដែលសាលមហោស្រព NABA របស់យើងនឹងក្លាយជាទីតាំងផ្លូវការនៃកម្មវិធី Cambodia’s Got Talent រដូវកាលទី ២ នេះ។ ក្នុងនាមជាមណ្ឌលកម្សាន្តចម្រុះលំដាប់កំពូលមួយប្រចាំតំបន់ យើងតែងតែទន្ទឹងរង់ចាំសហការជាដៃគូដ៏ល្អបែបនេះ ខណៈវានឹងផ្តល់នូវ ឱកាស ដ៏ល្អសម្រាប់ អ្នកដែលមានសមត្ថភាពអាចបង្ហាញទេពកោសល្យពិសេសរបស់ខ្លួននៅលើឆាកអន្តរជាតិ” ។
វគ្គauditionដែលមាន ៦ ថ្ងៃជាប់ៗគ្នា នឹងប្រព្រឹត្តទៅនៅសាលមហោស្រព NABA ពីថ្ងៃទី ២៦ ខែមិថុនារហូតដល់ថ្ងៃទី ១ ខែកក្កដា។ អ្នកប្រកួតទាំងអស់ ត្រូវបង្ហាញទេពកោសល្យ និងសមត្ថភាពរបស់ខ្លួនដើម្បីឈានទៅវគ្គបន្ទាប់! កម្មវិធីនេះ បើកឲ្យសាធារណជនទូទៅអាចចូលទស្សនាដោយសេរី! សូមចូលរួមធ្វើជាសាក្សី និងទះដៃអបអរដល់បេក្ខជន-បេក្ខនារីដែលអ្នកពេញចិត្តដើម្បីឲ្យពួកគាត់អាចឆ្លងទៅវគ្គពាក់កណ្តាលផ្តាច់ព្រ័ត្រ! កម្មវិធីនេះ មានការចូលរួមអត្ថាធិប្បាយពីពិធីករវោហារមិនចេះរីងស្ងួត លោកជា វិបុល និងលោកសាន វិសាល ចំណែកគណៈកម្មការ រួមមានកំពូលតារាចម្រៀងព្រាប សុវត្ថិ អ្នកនាង ខាត់ សុឃីម និងកំពូលតារាកំប្លែងនាយកុយ និងនាយក្រឹម។
NABA មានកៅអីសរុប ២,០០០ សម្រាប់វគ្គ audition នីមួយៗ! មកមុន បានមុន ចាប់ពីម៉ោង ១ រសៀលរហូតដល់ម៉ោង ៩ យប់រៀងរាល់ថ្ងៃ ពីថ្ងៃទី ២៦ មិថុនា ដល់ថ្ងៃទី ១ កក្កដានៅសាលមហោស្រព NABA ។ សាលមហោស្រព NABA មានទីតាំងនៅជាន់ទី ២ ណាហ្គាទី ២ ទល់មុខភោជនីយដ្ឋានប៊ុហ្វេអន្តរជាតិ 2Pangea ។ លោកអ្នក អាចចតរថយន្តនៅអាគារសណ្ឋាគារណាហ្គាទី ២ ដោយឥតគិតថ្លៃ ។
១៣ វគ្គផ្សេងទៀតនៃរដូវកាលនេះ នឹងត្រូវផ្សាយនៅលើកញ្ចក់ទូរទស្សន៍ហង្សមាសរៀងរាល់ថ្ងៃអាទិត្យនៅម៉ោង ៨ យប់ ចាប់ពីថ្ងៃទី ១២ សីហា រហូតដល់ថ្ងៃទី ៤ ខែវិច្ឆិកាដែលមានការផ្សាយវគ្គ audition វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ។ សូមតាមដាន និងជួបគ្នានៅសាលមហោស្រព NABA នៅណាហ្គាទី ២។
គួរបញ្ជាក់ថា ជាមួយការពង្រីកបន្ថែមថ្មីចុងក្រោយ ណាហ្គាវើលដ៍ មានបន្ទប់ប្រភេទស្វីត និងដឺលុច្សជាង ១.៦៥៨ បន្ទប់ ភោជនីយដ្ឋាន បានីយដ្ឋាន និងក្លឹប ២៧ កន្លែង មណ្ឌលស្ប៉ាប្រណីតពីរ សាលមហោស្រព NABA ដែលមាន ២.០០០ កៅអីនៅណាហ្គាទី ២ ហាងលក់ទំនិញរួចពន្ធប្រតិបត្តិការដោយក្រុមហ៊ុន China Duty Free Group ដែលជាផ្សារទំនើបក្រោមដីទីមួយក្នុងប្រទេសកម្ពុជាដែលមានលក់ទំនិញម៉ាកអន្តរជាតិល្បីៗ សេវាកម្សាន្តសម្បូរបែប និងសាលប្រជុំដែលបំពាក់ដោយបរិក្ខារទំនើបៗ៕
Source: Kampuchea Thmey Daily
0 Comments