អាជ្ញាធរម៉ាឡេស៊ី បានធ្វើការចាប់ខ្លួនជាលើកដំបូងនៅក្នុងរឿងអាស្រូវទឹកប្រាក់រាប់ពាន់លានដុល្លារនៅឯមូលនិធិ 1MDB របស់រដ្ឋដោយបានចាប់ខ្លួនអតីតជំនួយការរបស់លោកនាយករដ្ឋមន្ត្រីធ្លាក់តំណែង Najib Razak ដើម្បីជួយដល់ការស៊ើបអង្កេត។
រដ្ឋាភិបាលថ្មីរបស់ប្រទេសម៉ាឡេស៊ីដែលដឹកនាំដោយលោក Mahathir Mohamad អាយុ៩២ឆ្នាំបានបើកការស៊ើបអង្កេតឡើងវិញចូលទៅក្នុងទឹកប្រាក់រាប់ពាន់លានដុល្លារដែលត្រូវបានគេចោទប្រកាន់ថាបានលួចចេញពីមូលនិធិ 1Malaysia Development Berhad (1MDB) បន្ទាប់ពីរដ្ឋបាលរបស់លោក Najib ចាញ់ការបោះឆ្នោតកាលពីខែឧសភាដោយសារតែកំហឹងជុំវិញរឿងអាស្រូវនេះនិងការកើនឡើងតម្លៃនៃការរស់នៅ។
កាលពីថ្ងៃចន្ទ តុលាការថ្នាក់ក្រោមបានយល់ព្រមចំពោះសំណើមួយដែលដាក់ដោយមន្ត្រីប្រឆាំងអំពើពុករលួយក្នុងការបញ្ជូនជំនួយការរបស់អតីតនាយករដ្ឋមន្ត្រីឲ្យជួយក្នុងការស៊ើបអង្កេតរបស់ពួកគេទៅក្នុង 1MDB ។ នេះបើយោងតាមរបាយការណ៍របស់សារព័ត៌មាន Bernama ។
ជំនួយការអាយុ៤២ឆ្នាំរូបនេះដែលត្រូវបានរៀបរាប់នៅក្នុងរបាយការណ៍ថាបានធ្វើការឲ្យលោក Najib ចាប់តាំងពីឆ្នាំ២០០៩មកនោះគឺត្រូវបានគេចាប់ខ្លួនកាលពីយប់ថ្ងៃអាទិត្យបន្ទាប់ពីបានផ្តល់សេចក្តីថ្លែងការណ៍មួយនៅទីស្នាក់ការកណ្តាលរបស់គណកម្មាធិការប្រឆាំងអំពើពុករលួយម៉ាឡេស៊ី (MACC) នៅក្នុងទីក្រុង Putrajaya ។
កាលពីដើមខែនេះ អគ្គមេធាវីថ្មីរបស់ប្រទេសម៉ាឡេស៊ីបាននិយាយថា ការិយាល័យរបស់គាត់កំពុងតែសិក្សាសកម្មភាពព្រហ្មទណ្ឌនិងរដ្ឋប្បវេណីនៅក្នុងករណី 1MDB ។
អតីតនាយករដ្ឋមន្ត្រី Najib ដែលបានបង្កើត 1MDB គឺជាប្រធានបទនៃការស៊ើបអង្កេតអំពីការលាងលុយកខ្វក់។ ទោះជាយ៉ាងណាក៏ដោយ លោក Najib បានបដិសេធការធ្វើខុសណាមួយ។
នៅក្នុងការអត្ថាធិប្បាយយ៉ាងទូលំទូលាយបំផុតរបស់គាត់ពាក់ព័ន្ធរឿងអាស្រូវ 1MDB, លោក Najib បានប្រាប់រ៉យទ័រកាលពីសប្តាហ៍មុនថា គាត់មិនបានដឹងទេថាលុយរាប់រយលានដុល្លារដែលបានផ្ទេរតាមរយៈគណនីផ្ទាល់ខ្លួនរបស់គាត់គឺមកពី 1MDB ៕ REUTERS
[caption id="attachment_935573" align="aligncenter" width="700"]
[/caption]
Source: Kampuchea Thmey Daily
0 Comments