សេតវិមានបាននិយាយកាលពីថ្ងៃអង្គារថា កិច្ចប្រជុំកំពូល ដែលគេទន្ទឹងរង់ចាំរវាងលោកប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន គឺនឹងប្រព្រឹត្តទៅនៅកោះរមណីយដ្ឋាន Sentosa របស់ប្រទេសសិង្ហបុរី។
អ្នកនាំពាក្យសេតវិមានលោកស្រី Sarah Sanders បាននិយាយថា “ទីកន្លែងសម្រាប់កិច្ចប្រជុំកំពូលក្នុងប្រទេសសិង្ហបុរីរវាងលោកប្រធានាធិបតីដូណាល់ត្រាំនិងមេដឹកនាំគីមជុងអ៊ុនគឺនឹងប្រព្រឹត្តទៅនៅសណ្ឋាគារ Capella លើកោះ Sentosa។ យើងសូមថ្លែងអំណរគុណដល់ម្ចាស់ផ្ទះសិង្ហបុរីចំពោះការបដិសណ្ឋារកិច្ចរបស់ពួកគេ”។
កិច្ចប្រជុំនៅថ្ងៃទី១២ខែមិថុនាគឺនឹងជាលើកដំបូងបំផុតរវាងមេដឹកនាំកំពុងកាន់តំណែងនៃប្រទេសទាំងពីរហើយនឹងផ្តោតលើការលុបបំបាត់នុយក្លេអ៊ែរចេញពីឧបទ្វីបកូរ៉េ។
កោះ Sentosa គឺជាកន្លែងសម្បូរទៅដោយឆ្នេរខ្សាច់ កាស៊ីណូ តំបន់ទេសចរណ៍និងកន្លែងវាយកូនគោលល្អៗមួយចំនួនប្រចាំតំបន់អាស៊ី។
វាក៏មានសណ្ឋាគារ Capella ដ៏ប្រណិតផងដែរដែលមានចម្ងាយឆ្ងាយពីមជ្ឈមណ្ឌលប្រជាជនដែលអាចត្រូវបានធានាសុវត្ថិភាពយ៉ាងងាយស្រួល។
ប្រភពដែលជិតស្និទ្ធិនឹងការរៀបចំនេះបានប្រាប់ AFP ថា អ្នកការទូតអាមេរិកបានជ្រើសរើសយករមណីយដ្ឋានកោះនេះដោយសារតែវាត្រូវបានភ្ជាប់ទៅនឹងកោះធំរបស់សិង្ហបុរីដោយច្រកតែមួយគត់ដែលអាចបិទចរាចរណ៍បានយ៉ាងងាយស្រួល។
កាលពីថ្ងៃអង្គារ អាជ្ញាធរសិង្ហបុរីបានកំណត់តំបន់មួយនៃកោះនេះដែលព័ទ្ធជុំវិញសណ្ឋាគារ Capella ដើម្បីរក្សាជាតំបន់សន្តិសុខពិសេសមុនកិច្ចប្រជុំកំពូលថ្ងៃទី១២ខែមិថុនា។
យោងតាមការបង្ហោះនៅលើគេហទំព័ររបស់រដ្ឋាភិបាលបានឲ្យដឹងថាអាវុធ ភ្លើងពណ៌ មេក្រូ ប្រព័ន្ធបំពងសំឡេងនិងបដានឹងត្រូវបានហាមឃាត់នៅក្នុងតំបន់ពិសេសខណៈដែលប៉ូលិសត្រូវបានអនុញ្ញាតឲ្យធ្វើការឆែកឆេរខ្លួនប្រាណទៅលើអ្នកដែលចូលក្នុងតំបន់នោះ។ យន្តហោះដ្រូនក៏មិនត្រូវបានអនុញ្ញាតផងដែរ។
រចនាដោយស្ថាបត្យករអង់គ្លេសលោក Norman Foster, សណ្ឋាគារ Capella បានទទួលបុគ្គលល្បីៗដូចជាតារាចម្រៀងប៉ុប Madonna និង Lady Gaga នៅពេលពួកគេឈប់សម្រាកនៅក្នុងរដ្ឋទីក្រុងនេះសម្រាប់ដំណើរទេសចរណ៍៕ AFP
Source: Kampuchea Thmey Daily
0 Comments