កាលពីថ្ងៃអង្គារ អង្គការសហប្រជាជាតិ បានជំរុញឲ្យរដ្ឋាភិបាលក្រុងវ៉ាស៊ីនតោន បញ្ឈប់ភ្លាមៗនៃការអនុវត្តដ៏ចម្រូងចម្រាសរបស់ខ្លួនក្នុងការបំបែកកុមារអន្តោប្រវេសន៍អាមេរិកកណ្ដាលពីឪពុកម្តាយរបស់ពួកគេនៅតាមព្រំដែនភាគខាងត្បូង។
ការិយាល័យសិទ្ធិមនុស្សរបស់អង្គការសហប្រជាជាតិបាននិយាយថា ខ្លួនមានការព្រួយបារម្ភយ៉ាងខ្លាំងចំពោះគោលនយោបាយគ្មានការអត់ឱនដែលត្រូវបានណែនាំដោយរដ្ឋបាលរបស់លោកប្រធានាធិបតី Donald Trump ក្នុងគោលបំណងរារាំងការធ្វើអន្តោប្រវេសន៍ខុសច្បាប់។
អ្នកនាំពាក្យលោកស្រី Ravina Shamdasani បានព្រមានថា គោលនយោបាយរបស់សហរដ្ឋអាមេរិកបាននាំឲ្យមនុស្សដែលចូលទៅក្នុងប្រទេសនេះត្រូវបានទទួលការកាត់ទោសព្រហ្មទណ្ឌហើយជាលទ្ធផលកូនៗរបស់ពួកគេត្រូវបានគេនាំចេញទៅឆ្ងាយពីពួកគេ។
លោកស្រីបាននិយាយថា ព័ត៌មានដែលទទួលបានពីក្រុមសង្គមស៊ីវិលអាមេរិកបានបង្ហាញថា កុមាររាប់រយនាក់ត្រូវបានគេបំបែកចេញពីឪពុកម្តាយរបស់ពួកគេនៅឯព្រំដែនចាប់តាំងពីខែតុលាមកដោយរួមមានទាំងក្មេងអាយុមួយឆ្នាំម្នាក់ផងដែរ។
លោកស្រីបានប្រាប់អ្នកកាសែតនៅទីក្រុងហ្សឺណែវថា “អាមេរិកគួរតែបញ្ឈប់ការអនុវត្តនេះភ្លាម”។ លោកស្រីបន្តថា “ការអនុវត្តបំបែកគ្រួសារគឺអាចបង្កទៅជាការជ្រៀតជ្រែកមិនសមរម្យនិងខុសច្បាប់នៅក្នុងជីវិតគ្រួសារហើយគឺជាការរំលោភបំពានយ៉ាងធ្ងន់ធ្ងរទៅលើសិទ្ធិកុមារ”។
នៅក្នុង Twitter លោកប្រធានាធិបតី Trump បាននិយាយថា “ការបំបែកបំបាក់គ្រួសារនៅព្រំដែនគឺជាកំហុសនៃច្បាប់ដ៏អាក្រក់ដែលបានអនុម័តដោយពួកអ្នកប្រជាធិបតេយ្យ”។
ដោយឡែក លោក Jeff Sessions អគ្គមេធាវីអាមេរិកបានប្រាប់កម្មវិធីវិទ្យុរបស់អាមេរិកថា ការបំបែកកុមារចេញពីឪពុកម្តាយរបស់ពួកគេគឺស្របច្បាប់និងជាការចាំបាច់។
លោកបានប្រាប់កម្មវិធី Hugh Hewitt Show ថា “អ្នកមិនអាចផ្តល់អភ័យឯកសិទ្ធិដល់អ្នកដែលនាំកុមារមកជាមួយពួកគេដោយមិនប្រុងប្រយ័ត្ននិងមិនត្រឹមត្រូវនិងដោយខុសច្បាប់បាននោះទេ។ ពួកគេមិនគួរធ្វើបែបនេះឡើយ”។
លោក Sessions បានប្រកាសកាលពីដើមខែមុនថា នឹងមានគោលនយោបាយគ្មានការអត់ឱនដោយអ្នកណាដែលគ្មានឯកសារចូលសហរដ្ឋអាមេរិកគឺនឹងត្រូវបានចោទប្រកាន់ពីបទចូលដោយខុសច្បាប់៕ AFP
Source: Kampuchea Thmey Daily
0 Comments